‘Oye Kalunga kaanamwenyo’

Mbela eso oli vule Kalunga oonkondo? Hasho nando! Eso, nenge “omutondi” gulwe, otali ka kala ngiini li na oonkondo li vule “Kalunga Omunkondoawike?” (1 Aakorinto 15:26; Eksodus 6:3) Kalunga oku na oonkondo okuyumudha aantu meso nokwa uvaneka kutya ote ke shi ninga muuyuni we uupe.a Euvaneko ndyono oli shi tuu okwiinekelwa? Omwana gwaKalunga, Jesus, ote tu shilipaleke noohapu tadhi vulu oku tu pa etegameno lya kola.—Lesha Mateus 22:31, 32.

Sho Jesus a li ta popi nAasadukayi mboka ya li inaayi itaala meyumuko, okwa ti: “Kombinga yeyumuko lyaasi inamu lesha nani ndhoka mwe dhi lombwelwa kuKalunga, sho ta ti: ‘Ongame Kalunga kaAbraham, Kalunga kaIsak naKalunga kaJakob.’ Shika tashi ti, ke shi Kalunga kaasi, aawe, okaanamwenyo.” Mpaka Jesus okwa li ta popi kombinga yaashoka Moses naKalunga ya li ya kundathana poshihwa sha hwama omulilo lwomomumvo 1514 K.E.N. (Eksodus 3:1-6) Jesus ota ti kutya oohapu ndhoka Jehova a li a lombwele Moses kutya, “Ongame Kalunga kaAbraham, Kalunga kaIsak naKalunga kaJakob,” otadhi ulike kutya euvaneko li na ko nasha neyumuko oli na okugwanithwa. Omolwashike taku tilwa ngawo?

Tango natu tale kutya onkalo oya li ngiini sho oohapu ndhoka dha popiwa petameko. Pethimbo sho Jehova a popi naMoses, ootatekulululwa mbaka oya adhika ya sa nale, Abraham okwa adhika a sa pwa pita oomvula 329, Isak oomvula 224, omanga Jakob oomvula 197. Ihe Jehova okwa ti kutya “Ongame,” pehala lyokutya “Onda li” Kalunga kawo. Omolwashike Jehova a li a popi kombinga yootatekulululwa mbaka ya fa ya li ye na natango omwenyo?

Jesus okwe shi yelitha a ti: Jehova “ke shi Kalunga kaasi, aawe, okaanamwenyo.” Dhiladhila owala keityo lyoohapu ndhoka. Ngele kaku na eyumuko, otashi ti kutya Abraham, Isak naJakob otaya ka kala moshaasi sigo aluhe, itaya ka yumudhwa nando. Ngele ando osho sha li ngawo, Jehova ando oKalunga komidhimba. Naashoka ando otashi ulike kutya eso oli vule Jehova oonkondo a fa ando itaa vulu okumangulula aapiya ye aadhiginini moomango dheso.

Otatu vulu nduno okuthika pehulithodhiladhilo lini shi na ko nasha naAbraham, Isak, Jakob nosho wo aapiya yaJehova ayehe aadhiginini mboka ya sa nale? Jesus okwe shi yelitha ngeyi: “Mekwatathano [naKalunga] ayehe otaa kala ye na omwenyo.” (Lukas 20:38) Elalakano lyaJehova lyokuyumudha aapiya ye aadhiginini mboka ya sa ote ke li gwanitha shili nomolwaashono he ya tala ko ya fa ye na omwenyo. (Aaroma 4:16, 17) Jehova ota kaleke aapiya ye ayehe mboka momadhiladhilo ge sigo esiku lyoku ya galulila momwenyo lya thiki.

Mbela etegameno lyokuhanganitha ishewe aantu noonakusa yawo aaholike ewanawa kungoye? Ngele osho, dhimbulukwa kutya Jehova oku na oonkondo dha gwana okuyumudha aasi. Kapu na shimwe tashi vulu oku mu keelela a gwanithe po euvaneko lye lyokuyumudha aasi. Omolwashike itoo ilongo kombinga yeuvaneko lyeyumuko nosho wo kombinga yaKalunga ngoka te ke li gwanitha po? Okuninga ngaaka otaku ke ku hedhitha lela popepi naJehova, ‘Kalunga kaanamwenyo.’