“Oya li ya hala ndi mone ngame mwene shoka Ombiimbeli tayi ti”

ONAKUZIWA YANDJE:

Onda valelwa moSanto Domingo, moDominican Republic nondi li omutine mokuvalwa. Aavali yandje oya li aalongwantu noya li ya hala ye tu putudhile momudhingoloko mu na aantu aawanawa naanashili. Oomvula ne manga inaandi valwa, aavali yandje oya li ya tsakanene naatumwa yelongelokalunga lyOshimormon. Molwaashoka oya li ya fuuka sho ya mono aalumentu mboka aagundjuka ya kululwa nawa noya zala nawa, oya li ya tokola nziya kutya aanegumbo lyaandjetu oyo taya ningi yotango mokantuntu hoka okuninga iilyo yongeleka yo-Church of Jesus Christ of Latter-day Saints, nenge Ongeleka yaMormon.

Sho nda koko, onda li handi nyanyukilwa omainyanyudho mongeleka yetu nonda li nda simaneka onkalamwenyo yomegumbo nomithikampango dhopamikalo dhAamormon. Onda li nda nyanyukwa okukala Omumormon nonda li ndi itulila po elalakano okuninga omutumwa.

Sho nda li ndi na oomvula 18, otwa tembukile koAmerika, opo ando ndi ka hite kouniveesiti yi li nawa. Konima yomumvo, omumwayina gwameme nomusamane gwe mboka ye li Oonzapo dhaJehova oye ya ye tu talele po koFlorida. Oye tu hiya tu ye nayo koshigongi shopaMbiimbeli. Onda li nda kumwa sho kehe gumwe mpoka nda li nda kuutumba ta kongo omanyolo nota nyola shoka tashi popiwa. Onkee ano, onda pula ndi pewe opena nokafo e tandi tameke okuninga sha faathana.

Konima yoshigongi omumwayina gwameme nomusamane gwe oya lombwele ndje kutya molwaashoka onda hala okuninga omutumwa otaya vulu okukwathela ndje ndi ilonge Ombiimbeli. Onda li ndi wete kutya edhiladhilo ewanawa, molwaashoka pethimbo mpoka onda li ndi shi nawa Embo lyOshimormon shi vulithe Ombiimbeli.

NKENE OMBIIMBELI YA LUNDULULA ONKALAMWENYO YANDJE:

Sho omumwayina gwameme nomusamane gwe taya kundathana nangame Ombiimbeli mongodhi, oya li haya kumagidha ndje aluhe ndi yelekanithe shoka ndi itaala nomalongo gOmbiimbeli. Oya li ya hala ndi mone ngame mwene shoka Ombiimbeli tayi ti.

Onda li ndi i itaala iinima oyindji yeitaalo lyOshimormon, ihe kanda li ndi na uushili ngele otayi tsu ngaa kumwe nOmbiimbeli. Omumwayina gwameme okwa tumine ndje oshifo sho-Awake! ya ga 8 Novomba 1995, sha nyanyangidhwa kOonzapo dhaJehova, moka mwa li mu na iitopolwa yimwe tayi popi kombinga yeitaalo lyAamormon. Onda li nda kumwa sho kaanda li ndi shi ogendji gomomalongo gOshimormon. Osha ningitha ndje ndi ye kehala lyokointaneta lyopambelewa lyAamormon ndi tale ngele shoka sha popiwa mo-Awake! oshoshili ngaa. Osha li shoshili, nuushili mboka owa li wa kolekwa ishewe sho nda li nda talele po omusiuma yAamormon muUtah.

Onda li owala ndi itaala kutya Embo lyaMormon nOmbiimbeli itayi kondjithathana. Ihe sho nda tameke okulesha Ombiimbeli nuukeka, onda mono kutya omalongo gAamormon otaga kondjithathana nOmbiimbeli. Pashiholelwa, muHesekiel 18:4 Ombiimbeli otayi ti kutya omwenyo ohagu si. Ihe Embo lyaMormon muAlma 42:9 otali ti: “Omwenyo ihagu si nando.”

Kakele komalongo ga yoolokathana, onda li tandi ipula kombinga yelongo lyuukwashigwana ndyoka nda longwa kAamormon. Pashiholelwa, Aamormon ohaya longwa kutya oshikunino shaEden osha li momukunda gwaJackson County, moMissouri, muAmerika. Naawiliki yongeleka ohaya longo kutya “Uukwaniilwa waKalunga otawu ya okupangela evi alihe okupitila mepangelo lyAmerika.”

Onda li handi ipula nankene Aamormon haya longo aantu kutya oshike tashi ka ningilwa iilongo yilwe ngaashi moka nda valelwa. Sho omugundjuka gumwe Omumormon ngoka a li ti ilongele uutumwa a dhengele ndje ongodhi ongulohi yimwe, onda li nda kundathana naye oshinima shoka. Onda li nde mu pula ngele ota ka kala a hala okukondjitha Aamormon ooyakwawo ngele ando oshilongo shawo otashi lwitha oshilongo shilwe. Onda li nda kumwa sho a ti kutya ote ke shi ninga. Onda konakona muule omalongo geitaalo lyandje lyOngeleka yaMormon nonda li wo nda kundathana naakwatelikomeho yayo. Onda li nda lombwelwa kutya omayamukulo gomapulo gandje oga kwatela mo iiholekwa mbyoka tayi ka hololwa owala sho uuyelele tawu ende tawu yele.

Efatululo lyawo olya li lya teya ndje omukumo e tandi tameke okwiipula ngele onda tala ngaa nawa kutya omolwashike nda hala okuninga omutumwa Omumormon. Onda li nda mono kutya etompelo lyandje okuninga omutumwa olya li okukwathela yalwe. Etompelo lilwe olya li kutya onda li nda hala aantu ya kale ya simaneka ndje. Ihe kanda li ndi shi oshindji kombinga yaKalunga. Nonando onda li ngaa handi tala mo iikando oyindji mOmbiimbeli, kanda li nde yi simaneka naanaa. Kanda li ndi shi kutya elalakano lyaKalunga li na ko nasha nevi nenge naantu olyashike.

NKENE SHA KWATHELA NDJE:

Mekonakono lyandje lyOmbiimbeli nOonzapo dhaJehova ondi ilongo iinima ngaashi, edhina lyaKalunga, shoka hashi ningwa po peso nosho wo onkandangala ndjoka Jesus ta dhana megwanitho lyelalakano lyaKalunga. Osho nduno nda tameke okutseya nawa embo ndika ewanawa nonda li handi nyanyukilwa okulombwela yalwe kombinga yoshili ndjoka nda li tandi ilongo. Onda kala ndi shi kutya Kalunga oko e li, ihe ngashingeyi otandi vulu okupopya naye megalikano e li Kuume kandje. Onda ninginithwa ndi ninge Onzapo yaJehova mo 12 Juli 2004 nokonima yoomwedhi hamano onda tameke iilonga yuukalele wethimbo lyu udha.

Uule woomvula ntano onda kala handi longo koombelewa oonene dhOonzapo dhaJehova moBrooklyn shaNew York. Onda li shili handi nyanyukilwa okukwathela mokunyanyangidha Oombiimbeli nosho wo iileshomwa yilwe yOmbiimbeli mbyoka hayi kwathele aantu omamiliyona kongonga yevi alihe, notandi tsikile okukwathela yalwe nenyanyu ya tseye Kalunga.