Kotokela oomwigo dhaSatana

“Manguluka mo momwigo gwaSatana.”—2 TIM. 2:26.

OTO YAMUKULA NGIINI?

Oshike twa pumbwa okuninga ngele otu na egamo lyokupopila yalwe muuwinayi?

Moshiholelwa shaPilatus noshaPetrus tatu ilongo mo shike ngele tashi ya puumbanda wokutila aantu nokuthiminikwa?

Oshike tashi ke tu kwathela twaa kale nokwiipa uusama sha pitilila?

1, 2. Moshitopolwa shino otatu ka kundathana oomwigo dhOndiaboli dhini?

SATANA okwa hala okuhwaka po aapiya yaJehova. Elalakano lye ka li shi oku ya dhipaga ngaashi omukongo ngoka ha dhipaga iinamwenyo mbyoka ta mono. Ihe elalakano lyOndiaboli olyo oku tu kwata nomwenyo, opo yi tu longithe ngaashi ya hala.—Lesha 2 Timoteus 2:24-26.

² Omuntu ohashi vulika a longithe elulo nenge omwigo a yule oshinamwenyo inaashi sa. Ethimbo limwe ohashi vulika e shi kondekele pokuma mpoka ta vulu oku shi kwatela nuupu. Ohashi vulika wo a tege omwigo e gu fumvika, opo a yule shoka a hala. Ondiaboli ohayi longitha oomwigo dha faathana yi kwate aapiya yaKalunga nomwenyo. Ngele inatu hala Satana e tu yule, otu na okukala twa tonata nokupulakena omalondodho ngoka tage tu kwathele kaatu ye moomwigo dhe ndhoka dhi li mokati ketu. Oshitopolwa shika otashi ke tu kwathela tu kotokele oomwigo ndatu ndhoka Ondiaboli hayi longitha nomupondo. Omwigo gumwe (1) okwaapangela elaka lyetu, (2) uumbanda nomathiminiko nosho wo (3) okwiipa uusama sha pitilila. Oshitopolwa tashi landula otashi ka kundathana natango oomwigo mbali dhilwe dhaSatana.

PANGELA ELAKA LYOYE

3, 4. Iizemo yini tatu ka mona ngele ihatu pangele elaka lyetu? Gandja oshiholelwa.

³ Aakongo yamwe ohashi vulika ya fike epeya, opo ya kwate iinamwenyo nuupu sho tayi kambadhala okufadhuka po. Oku shi popya pathaneko, Ondiaboli oya hala okufika epeya megongalo lyopaKriste. Uuna ya pondola, ohayi vulu okukutha iilyo yegongalo mehala ndyoka lyegameno noku yi manga yi kale mepangelo lyayo. Satana ota vulu oku tu yula ngiini miineya e tatu kala twa gama kombinga ye?

⁴ Omulongwa Jakob okwa popya kutya elaka olya fa omulilo. (Lesha Jakob 3:6-8.) Ngele ihatu pangele elaka lyetu, otatu vulu okutomeka epeya lyopathaneko megongalo. Ngiini mbela? Pokugongala otashi vulika pu ningwe etseyitho kutya omumwameme gwontumba okwa langekwa po e li omukokolindjila gwondjigilile. Konima yokugongala aauvithi yaali otashi vulika ya kundathane oshinima shoka. Gumwe otashi vulika a kale e shi nyanyukilwa nokuhalela omumwameme oonkondo a tsikile noshilonga she shoka oshipe. Mukwawo otashi vulika a kale ti ipula kutya omumwameme okwa yi muukokolindjila, molwaashoka okwa hala owala ondondo megongalo. Ogunipo pokati kaauvithi mbano wa hala a kale kuume koye? Otashi vulika itashi ka kala oshidhigu kungoye okumona kutya pokati kawo ogunipo a nika okutomeka epeya megongalo.

5. Oshike tu na okuninga ngele otwa hala okupangela elaka lyetu?

⁵ Oshike tashi ke tu kwathela tu pangele eleka lyetu? Jesus okwa ti: “Shoka shu udhilila momutima, osho shoka okana take shi popi.” (Mat. 12:34) Onkee ano, otu na okukonakona tango omitima dhetu. Mbela oho iyageke ngaa oohapu ndhoka tadhi teya po yalwe? Pashiholelwa, ngele otu uvu kutya omumwatate ota lalakanene uuthembahenda wontumba, mbela ohatu pandula ngaa iikala ye mbyoka iiwanawa nenge ohatu kala tatu fekele kutya ote shi ningi molwaashoka i ihole mwene? Ngele ohatu kala twa limbililwa aamwatate mboka taya longele Jehova, natu dhimbulukwe kutya Ondiaboli oya li wo ya popile muuwinayi omupiya omudhiginini gwaKalunga, Job. (Job 1:9-11) Pehala lyokukala twa limbililwa aamwatate, otu na okwiikonakona kutya omolwashike tatu ya dhiladhilile iinima iiwinayi. Mbela otu na ngaa etompelo ewanawa lyokuninga ngawo? Nenge pamwe omitima dhetu odha nwethwa mo owala kiikala yokwaa na ohole mbyoka tayi dhana onkandangala maantu momasiku ngaka gahugunina?—2 Tim. 3:1-4.

6, 7. (a) Iinima yini hashi vulika yi tu ningithe tu popile yamwe muuwinayi? (b) Otu na okwiinyenga ngiini uuna gumwe e tu tuka?

⁶ Opu na wo iinima yimwe mbyoka hayi tu nwetha mo tu popile yalwe muuwinayi. Shimwe ohashi vulika tu kale twa hala okupondola, opo tu fuule yalwe. Ohashi vulika tu kale twa hala okulyatela yalwe pevi nokuulika kutya otu ya vule. Nenge tu kale hatu ipopile kutya omolwashike inaatu ningila oshinima shontumba shoka twa li tu na okuninga. Uuna uuntsa, okatili nenge efupa tayi tu hwahwameke tu ninge sha, nena itatu tungu, ihe otatu teya owala.

⁷ Ohashi vulika tu kale tu wete shi li nawa okunyana gumwe ngoka naye a li e tu popila muuwinayi. Otashi vulika nokuli a li e tu tulitha muudhigu nokupopya kwe. Kutya nduno osho shi li ngawo, kashi li nawa oku mu galulila uuwinayi. Uuna to shi ningi, owa fa owala omuntu ta tile omulilo omahooli. Shimwe ishewe, ito longo ehalo lyaKalunga, ihe olyOndiaboli. (2 Tim. 2:26) Oshi li nawa tu landule oshiholelwa shaJesus moshinima shika. Sho a li a tukwa “ina tuka mboka ye mu tuku.” Pehala lyaashono, “okwi inekele Kalunga, omupanguli omuyuuki.” (1 Pet. 2:21-23) Jesus okwa li e na einekelo kutya Jehova ota ka katuka onkatu pethimbo lyo opala. Otu na wo okuninga sha faathana. Ngele otatu longitha elaka etalala, otashi ka humitha komeho ‘uukumwe wombili’ megongalo lyetu.—Lesha Aaefeso 4:1-3.

INO ETHA WU YE MELULO OMOLWUUMBANDA NOKUTHIMINIKWA

8, 9. Omolwashike Pilatus a li a dhipagitha Jesus?

⁸ Einyengo lyoshinamwenyo shi li momwigo ohali kala lya ngambekwa. Sha faathana, omuntu ngoka ta ningi sha molwaashoka a tila, nenge molwaashoka ta thiminikwa, iha kala a manguluka. (Lesha Omayeletumbulo 29:25.) Natu taleni kiiholelwa iyali yaalumentu mboka ya li yi igandja omolwuumbanda nomolwokuthiminikwa nokutala kutya oshike tatu ilongo mo.

⁹ Omupangeli Omuroma Pontius Pilatus, ka li a hala Jesus a ningilwe uuwinayi, molwaashoka okwa li e shi kutya ina yona sha. Pilatus okwa li a popi montaneho kutya Jesus “ina ninga nando osha shoku mu dhipagitha.” Ihe nonando ongaaka, Pilatus okwa li a gandja epitikilo Jesus a dhipagwe. Oshike sha li she mu thiminike? Ongundu yaantu. (Luk. 23:15, 21-25) Aatondi yaJesus oya li yi igidha mokuule taya ti: “Ngele oto mu mangulula, nena otashi ti kutya ku shi kuume komupangeli Omuroma.” (Joh. 19:12) Pilatus otashi vulika a li a tila okukanitha ondondo ye, ngele okwa gamene Kristus. Shika oshe mu thiminike i igandje a gwanithe po ehalo lyOndiaboli.

10. Oshike sha li sha ningitha Petrus i ikale Jesus?

¹⁰ Omuyapostoli Petrus okwa li gumwe gwomaalongwa mboka ihaaya pu ponto yaJesus. Okwa li e shi popi montaneho yaantu kutya Jesus oye Mesiasa. (Mat. 16:16) Petrus okwa kala omudhiginini sho aalongwa yamwe ya thigi po Jesus, molwaashoka kaya li yu uvite ko shoka a hala okutya. (Joh. 6:66-69) Sho aatondi yaJesus ye ya oku mu kwata, Petrus okwa li a pweya mo egongamwele lye a gamene Jesus. (Joh. 18:10, 11) Ihe konima yethimbo Petrus okwa li a kwatwa kuumbanda e ti ikala nokuli Jesus Kristus. Okathimbo hoka Petrus okwa li a kwatwa kuumbanda wokutila aantu nosha li she mu imbi a zale onyati.—Mat. 26:74, 75.

11. Omanwethomo omawinayi geni hashi vulika ga kale ge tu taalela?

¹¹ Tu li Aakriste, otu na okukala tatu ikanyuna kehe shimwe shoka tashi tu imbi tu nyanyudhe Kalunga. Aahona yetu otashi vulika ye tu thiminike tu longe iilonga ya nika uumbudhi nenge ye tu heke tu ye nayo momilalo dha nyata. Aalongwa otashi vulika ya kale taya thiminikwa kuyakwawo ya yake mekonakono, ya tale omathano giipala, ya hile omakaya, ya longithe iingangamithi, ya nwe sha pitilila nenge ya kale ye na iihole nayamwe. Ngele oshe tu ningilwa, oshike tashi ke tu kwathela kaatu ye momwigo gwuumbanda nogwomathiminiko ngoka hagu tu ningitha tu teye omakotampango gaJehova?

12. Oshike tatu ilongo moshiholelwa shaPilatus noshaPetrus?

¹² Oshike tatu ilongo moshiholelwa shaPilatus noshaPetrus? Pilatus okwa li e na ontseyo onshona kombinga yaJesus. Ihe nonando ongaaka, okwa li e shi kutya Jesus ke na ondjo nosho wo kutya ka li omuntu gwowala. Pilatus okwa li e na uuntsa, ye ka li e hole Kalunga kashili. Osha li oshipu kOndiaboli oku mu kwata nomwenyo. Petrus okwa li e na ontseyo yashili, ye okwa li e hole Kalunga. Oshoshili kutya opwa li pu na oshikando shimwe a yi pombambo, omolwuumbanda nomolwokuthiminikwa. Manga Jesus inaa sa, Petrus okwa li i itadha ta ti: “Nando ayehe oya ye ontuku, ngame itandi yi ontuku.” (Mark. 14:29) Petrus okwa li e na okwiilongekidhila omamakelo ngoka ga li tage ke mu adha a fa omupisalomi ngoka a li i inekela thiluthilu muKalunga. Omupisalomi okwi imbi a ti: “OMUWA oku li pamwe nangame, onkee itandi tila sha; aantu otaa ningi ndje shike?” (Eps. 118:6) Ongulohi yahugunina, manga Jesus inaa dhipagwa okwa li a kutha Petrus nosho wo aayapostoli ye yalwe yaali e taya yi mokati keyana lyaGetsemane. Petrus naayapostoli ooyakwawo oya li ya kumuka, molwaashoka oya li taya nyengwa okutonata. Jesus okwe ya pendula e ta ti: “Tonateni, mu galikane, mwaa pwile memakelo.” (Mark. 14:38) Ihe Petrus okwa ka kotha natango, lwanimwa, okwi igandja omolwuumbanda nomolwokuthiminikwa.

13. Oshike tashi ke tu kwathela tu ikanyune omathiminiko?

¹³ Mwaashoka sha ningwa kuPilatus naPetrus otatu ilongo mo oshinima shimwe sha simanenena. Opo twi ikanyune omathiminiko otwa pumbwa ontseyo yashili, eifupipiko, eitaalo, ohole yokuhola Kalunga, etilo lyoku mu tila, pehala lyokukala twa tila aantu. Ngele eitaalo lyetu olya tungilwa kontseyo yashili, nena otatu ke li popila nomukumo. Shika otashi ke tu kwathela tu kondjithe omathiminiko nosho wo tu sinde uumbanda wokutila aantu. Katu na okukala hatu itadha. Pehala lyaashono, otu na okuzimina kutya otwa pumbwa oonkondo dhaKalunga tu kondjithe omathiminiko. Otu na okupula Jehova e tu pe ombepo ye notu na okweetha ohole yoku mu hola yi tu inyengithe tu simaneke edhina lye nomithikampango dhe. Shimwe ishewe, natu kale twi ilongekidhila omathiminiko manga inaage ya. Oto vulu okukwathela aamwoye komeho yethimbo ya kale ye shi nkene ye na okuyamukula uuna taya hekwa koomakula ya ninge sha sha puka.—2 Kor. 13:7.a

INO ETHA WU DHENGWE PEVI KIIKALA YOKWIIPA UUSAMA SHA PITILILA

14. Ondiaboli oya hala tu itaale shike shi na ko nasha nomapuko ngoka twa ninga nale?

¹⁴ Iinamwenyo yimwe, ohayi kwatwa noshiliya shoka hashi tulwa mondjila yayo, opo shi yi mbatekele po. Uuna oshinamwenyo sha gumu ko kashona, oshiliya ohashi dhenge oshinamwenyo noku shi thelekenya. Ngele ohatu kala nokwiipa uusama ethimbo nethimbo, nena otwa fa owala twa dhengwa nenge twa thelekenywa koshinima oshidhigu. Uuna tatu dhiladhila komapuko ngoka twa ninga nale, ohashi vulika tu kale tu uvite twa “dhengwa twa pwa po thilu.” (Lesha Episalomi 38:3-5, 8.) Satana okwa hala tu dhiladhile kutya Jehova ita vulu oku tu sila ohenda nosho wo kutya itatu vulu okugwanitha po iitegelelwa ye.

15, 16. Ongiini to vulu okuyanda omwigo gwokwiipa uusama sha pitilila?

¹⁵ Ongiini to vulu okuyanda omwigo ngoka hagu tu dhenge twa pwa po? Ngele owa yono sha kwata miiti, ninga po sha nziya wu opaleke ekwatathano lyoye naJehova. Inda kaakuluntugongalo e to ya pula ye ku kwathele. (Jak. 5:14-16) Ninga ngaashi to vulu wu ulike kutya owa geela uuwinayi mboka wa ninga. (2 Kor. 7:11) Ngele owa pewa egeelo lyontumba, ino teka omukumo. Egeelo oli li euliko kutya Jehova oku ku hole. (Heb. 12:6) Kala wa tokola toko ku endulule we epuko ndyoka e to kala kokule niinima mbyoka ya li ye ku fala mepuko. Ngele owi iyele ombedhi e to igaluluka, kala wi itaala lela kutya oondjo dhoye otadhi vulu okudhimwa po omolwekuliloyambo lyaJesus Kristus.—1 Joh. 4:9, 14.

¹⁶ Aantu yamwe ohaya tsikile okukala tayi ipe uusama omolwomayono ngoka ya ninga nale noye ga dhiminwa po. Ngele nangoye osho wu li, dhimbulukwa kutya Jehova okwa li a dhimine po Petrus nosho wo aayapostoli yalwe sho ya li ya thigi po Omwana omuholike, Jesus, pethimbo ndyoka a li a pumbwa ekwatho enene. Jehova okwa li a dhimine po omulumentu ngoka a li a kondwa megongalo lyomuKorinto omolwoluhondelo lwa nyata, konima sho i iyele ombedhi. (1 Kor. 5:1-5; 2 Kor. 2:6-8) Oohapu dhaKalunga otadhi popi wo kutya okwa li a dhimine po aantu yamwe mboka ya yona sha kwata miiti sho yi iyele ombedhi.—2 Ondjal. 33:2, 10-13; 1 Kor. 6:9-11.

17. Ekuliloyambo otali vulu oku ku ningila shike?

¹⁷ Ngele owi iyele ombedhi shili nokutaamba esilohenda lyaJehova, ote ke ku dhimina po nokudhimbwa omapuko goye ngoka wa ninga nale. Ino kala wu uvite kutya ekuliloyambo lyaJesus itali vulu nando okudhima po oondjo dhoye. Ngele osho ho kala wu uvite ngawo, oto ka ya mugumwe gwomoomwigo dhaSatana. Ondiaboli oya hala wu itaale kutya ekuliloyambo itali vulu okudhima po omayono gaayehe mboka ya yona noyi iyela ombedhi. (Omayel. 24:16) Ngele owi itaala mekuliloyambo, otali vulu oku ku yakula komutenge ngoka wa humbata gwokukala to ipe uusama sha pitilila, notali vulu oku ku pa oonkondo wu longele Kalunga nomutima aguhe, nomadhiladhilo goye agehe nonomwenyo gwoye aguhe.—Mat. 22:37.

OMAKOTO GASATANA OTU GA SHI

18. Ongiini tatu vulu okuyanda oomwigo dhOndiaboli?

¹⁸ Satana ke na ko nasha kutya otwa ya momwigo gwe guni. Shoka a hala oku tu kwata owala. Molwaashoka otu shi omakoto ge, otatu vulu oku ga yanda nuupu. (2 Kor. 2:10, 11) Itatu ka ya momalulo nomoomwigo dhe, ngele ohatu galikana Kalunga e tu pe uunongo tu ungaunge nomaupyakadhi getu. Jakob okwa nyola a ti: “Ngele oku na gumwe gwomune a pumbwa oondunge, ne dhi indile kuKalunga, oye note dhi mu pe. Oshoka Kalunga ke shi omundalapata, ihe oha pe ayehe nopwaa na omanyenyeto.” (Jak. 1:5) Otwa pumbwa okukatuka metsokumwe nomagalikano getu mokukonakona aluhe Oohapu dhaKalunga paumwene nokutula miilonga shoka tatu ilongo. Iikwathithi yopaMbiimbeli mbyoka ya nyanyangidhwa kongundu yomupiya omudhiginini nomunandunge ohayi tu kwathele tu mone nuupu oomwigo dhOndiaboli nonkene tu na oku dhi kukuma.

19, 20. Omolwashike tu na okutonda shoka oshiwinayi?

¹⁹ Egalikano nokukonakona Ombiimbeli ohaku humitha komeho mutse ohole yokulonga shoka oshiwanawa. Ihe osha simana wo tu kale tu tonde shoka oshiwinayi. (Eps. 97:10) Okutedhatedha iilanduliko mbyoka hayi tu adha ngele tatu lalakanene omahalo gopaumwene otashi vulu oku tu kwathela tu yi kukume. (Jak. 1:14, 15) Ngele otu tonde shoka oshiwinayi notu hole shoka oshiwanawa, itatu ka ya moomwigo dhaSatana.

²⁰ Inatu nyanyukwa tuu sho Kalunga he tu kwathele kaatu ninge iihakanwa yaSatana! Jehova ohe tu hupitha “muuwinayi” okupitila mombepo ye, mOohapu dhe nomehangano lye. (Mat. 6:13) Moshitopolwa tashi landula otatu ki ilonga nkene tatu vulu okuyanda oomwigo dhilwe mbali ndhoka Ondiaboli hayi longitha noya mona kutya ohadhi kwata nawa aapiya yaKalunga nomwenyo.

[Enyolo lyopevi]

[Ethano pepandja 21]

Okwaapangela elaka otaku vulu okweeta uupyakadhi oundji megongalo lyopaKriste

[Ethano pepandja 24]

Oto vulu okuyakulwa komutenge gwokwiipa uusama sha pitilila

Kandeka nokukukuma oomwigo dhaSatana

‘Kandeka omakotokelo omawinayi gomuhindadhi.’—EF. 6:11.

OTO YAMUKULA NGIINI?

Oshike tashi ka kwathela aapiya yaJehova kaaya ye momwigo gwokuhola omaliko?

Oshike tashi ka kwathela aaihokani Aakriste kaaya gwile mekelo lyokuyona ondjokana?

Omolwashike shi li nawa okukandeka ohole yokuhola omaliko noluhondelo?

1, 2. (a) Omolwashike Satana kee na ohenda naagwayekwa nosho wo ‘noonzi dhilwe’? (b) Oomwigo dhaSatana dhini tatu ka kundathana moshitopolwa shika?

SATANA ONDIABOLI ke na ohenda naantu, unene tuu naalongeli yaJehova. Satana ota kondjitha a mana mo oshihupe shaagwayekwa. (Eh. 12:17) Aakriste aagwayekwa oyo taya kwatele komeho iilonga yokuuvitha Uukwaniilwa kunena. Oye shi ulika puuyelele kutya Satana oye omupangeli gwuuyuni mbuka. Ondiaboli oyi tonde wo ‘oonzi dhilwe’ ndhoka tadhi ambidhidha aagwayekwa nodhi na etegameno lyokukala nomwenyo sigo aluhe ndyoka Satana kee na. (Joh. 10:16) Itashi kumitha sho e na ondjahi. Kutya nduno otu na etegameno lyomegulu nenge olyokombanda yevi, Satana ke na ko nasha natse. Okwa hala owala tu ninge iihakanwa ye.—1 Pet. 5:8.

² Oha longitha oomwigo dhi ili nodhi ili, opo a gwanithe po elalakano lye ndyoka. Satana okwa ‘pukitha omadhiladhilo’ gaantu mboka inaa itaala. Onkee ano, ihaya taamba ko elaka etoye noihaya mono oomwigo dhe. Ondiaboli ohayi yulu wo yamwe mboka ya taamba ko etumwalaka lyUukwaniilwa. (2 Kor. 4:3, 4) Oshitopolwa sha tetekele oshe tu ulukila nkene tu na okuyanda oomwigo ndatu dhaSatana, ngaashi: (1) okwaapangela elaka lyetu, (2) uumbanda nomathiminiko nosho wo (3) okwiipa uusama sha pitilila. Ngashingeyi natu tale nkene tatu vulu okukandeka oomwigo mbali dhaSatana. Omwigo gumwe ogwo ohole yokuhola omaliko nomukwawo emakelo lyokuyona ondjokana.

OHOLE YOKUHOLA OMALIKO OYO OMWIGO HAGU THININIKE

3, 4. Ongiini iimpwiyu yuuyuni mbuka tayi vulu okukokela omuntu momwigo gwokuhola omaliko?

³ Jesus meyele lye limwe okwa popi kombinga yoombuto dha kunwa moongwena. Okwa ti kutya omuntu otashi vulika u uve oohapu, “ihe oshimpwiyu shuuyuni mbuka nefundjaleko lyuuyamba otayi thininike oohapu, noita imike iiyimati.” (Mat. 13:22) Eeno shili, omutondi gwetu Satana oha longitha omwigo gwokuhola omaliko e tu kwate.

⁴ Opu na iinima iyali mbyoka tayi vulu okuthininika oohapu. Oshinima shimwe osho ‘oshimpwiyu shuuyuni mbuka.’ Opu na iinima oyindji mbyoka hayi tu etele iimpwiyu ‘momathimbo ngaka omadhigu’ tu li mugo. (2 Tim. 3:1) Otashi vulika shi kale oshidhigu kungoye okugwanitha po iipumbiwa yoye omolwiinima mbyoka ya ninga ondilo nomolwokwaa na iilonga hoka kwi indjipala. Otashi vulika wu kale to ipula kombinga yonakuyiwa notashi vulika wi ipule to ti: ‘Mbela otandi ka kala ngaa ndi na iiyemo ya gwana konima ngele nda penzelwa?’ Omolwoshimpwiyu sha tya ngaaka, yamwe oya kokelwa momwigo gwokulalakanena omaliko, taya dhiladhila kutya iimaliwa otayi vulu oku ya gamena aluhe.

5. Omomukalo guni ‘uuyamba’ tawu vulu oku tu fundjaleka?

⁵ Oshinima shilwe shoka Jesus a popi nasho tashi vulu okuthininika oohapu, osho iimpwiyu nosho wo ‘efundjaleko lyuuyamba.’ Ombiimbeli otayi ti kutya “iimaliwa oyo egameno.” (Omuuv. 7:12) Ihe kashi li pandunge oku yi lalakanena. Aantu oyendji oye shi mona kutya ohaya gwile moomwigo dhilwe dhokuhola omaliko, uuna ya hala okuninga aayamba. Yamwe oya ninga nokuli aapika yokukonga omamona.—Mat. 6:24.

6, 7. (a) Omuhona gwoye ota vulu oku ku kokela ngiini mohole yokuhola omaliko? (b) Omukriste oku na okudhiladhila kombinga yashike, uuna e etelwa edhiladhilo lyokulonga olutaima?

⁶ Otashi vulika tu ye momwigo gwokuhola omaliko nopwaa na oku shi nongela. Pashiholelwa, omuhona gwoye otashi vulika e ku lombwele ta ti: “Ondi ku na onkundana ombwanawa! Ehangano olya pewa okondalaka onenenene yiilonga. Shika otashi ti kutya otu na okulonga olutaima olundji moomwedhi ndhoka tu uka. Ihe otandi ku shilipaleke kutya ondjambi yoye otayi ka kala yo ondoka.” Oto ki inyenga ngiini? Oshoshili kutya owu na oshinakugwanithwa sha simana shokusila oshimpwiyu painiwe aanezimo yoye, sha hala okutya, aanegumbo lyoye. Ihe shoka hasho owala oshinakugwanithwa wu na. (1 Tim. 5:8) Opu na wo iinima yontumba mbyoka wu na okukaleka momadhiladhilo. Ethimbo li thike peni tamu ka longa olutaima? Mbela otashi ka ya moshipala omaipyakidhilo goye gopambepo, mwa kwatela okugongala nosho wo Esiku lyElongelokalunga lyUukwanegumbo?

⁷ Dhiladhila kutya oshike sha simanenena kungoye, mbela olutaima ndoka talu ke ku petha ondjambi yo ondoka nenge ekwatathano lyoye naJehova? Mbela oto ke etha okupititha komeho iinima yUukwaniilwa, molwaashoka wa hala okwiilikolela iimaliwa oyindji? Owu shi ngaa kutya uupambepo woye nowaanegumbo lyoye otawu ka ya moshiponga ngele owa kala to lalakanene iinima yopamaliko? Ngele oshe ku ningilwa, ongiini to ka kandeka nokwiiyageka kuu thiminikwe kiinima yopamaliko?—Lesha 1 Timoteus 6:9, 10.

8. Iiholelwa yini yopaMbiimbeli tayi ku kwathele wu konakone onkalamwenyo yoye?

⁸ Kala nokukonakona onkalamwenyo yoye, opo kuu kwatwe ko omboko kohole yokuhola omaliko. Ino kala nando wa fa Esau ngoka a li a dhina iinima yopambepo. (Gen. 25:34; Heb. 12:16) Nenge wu kale wa fa omulumentu omuyamba ngoka a li a lombwelwa a landithe po iinima ye ayihe, iimaliwa e te yi pe oohepele e ta landula Jesus. Pehala lyoku shi ninga, omulumentu okwa “zi po a sa oluhodhi, oshoka okwa li e na eliko olindji.” (Mat. 19:21, 22) Omolwohole yeliko, omulumentu ngoka okwa li a kanitha uuthembahenda uunene wokulandula omuntu omunenenene ngoka a li ko nale. Otu na wo okukala twa kotoka kaatu kanithe uuthembahenda wokuninga aalongwa yaJesus Kristus.

9, 10. Ombiimbeli otayi tu kumagidha ngiini shi na ko nasha niinima yopamaliko?

⁹ Opo kaatu kale tatu ipula unene niinima yopamaliko, otu na okupulakena kekumagidho lyaJesus ndyoka tali ti: “Inamu kala mu na oshimpwiyu mu tye: ‘Otatu li shike?’ nenge: ‘Otatu nu shike?’ nenge: ‘Otatu zala shike?’ Ayihe mbika otayi lalakanenwa kaapagani. Oshoka Ho yeni yomegulu oku shi shi kutya omwa pumbwa mbika ayihe.”—Mat. 6:31, 32; Luk. 21:34, 35.

¹⁰ Opo kaatu ye momwigo gwefundjaleko lyuuyamba, otu na okukala netaloko lya fa lyomunyoli gwOmbiimbeli Agur ngoka a ti: “Uuyamba nenge oluhepo ino lu pa ndje; palutha ndje noshikwiila shoka sha yeleka ndje.” (Omayel. 30:8) Agur okwa li e shi kutya okwa pumbwa iimaliwa omolwuuhupilo, ihe okwa li wo a kotokela efundjaleko lyuuyamba. Okwa li e shi kutya oshimpwiyu shuuyuni mbuka nefundjaleko lyuuyamba otayi vulu okuyona po ekwatathano lye naJehova. Okukala to ipula unene niinima yopamaliko otashi vulu okumana po ethimbo lyoye, oonkondo dhoye notashi ku ningitha wu kale kuu na ehalo lyokupititha komeho iinima yUukwaniilwa. Onkee ano, kala wa kotoka, opo kuu kwatwe komwigo gwaSatana gwokuhola omaliko.—Lesha Aahebeli 13:5.

OLUHONDELO OLWA FA EKELO LYA SIIKILWA

11, 12. Ongiini Omukriste tashi vulika a makelwe a yone ondjokana uuna e li kiilonga?

¹¹ Uuna aakongo ya hala okukwata oshinamwenyo oshinene, ohaya fulu ekelo ele mondjila moka shi hole okweenda. Kekelo ohaku yalwa uuti e taku filwa nomavi. Satana naye oha longitha omwigo gumwe gwa fa ekelo hagu pondola. Omwigo ngoka ogwo eyonondjokana. (Omayel. 22:14; 23:27) Aakriste oyendji oya yulwa komwigo ngoka, molwaashoka ohayi iyethele moonkalo moka taya vulu okuya nuupu moluhondelo. Aaihokani yamwe Aakriste oya yona ondjokana sho ya tameke okukala ye na iihole nayalwe.

¹² Iihole mbyoka otayi vulu okutamekela kiilonga. Ekonakono limwe otali ulike kutya maaihokani yane mboka ya yona ondjokana, kutya nduno aasamane nenge aakulukadhi, yatatu yomuyo oye shi ninga pamwe naamboka haya longo nayo. Mbela oho longo pamwe naantu yuukashikekookantu wa yooloka ko kuwoye? Ngele osho, ekwatathano lyoye nayo oli li ngiini? Mbela oli na ngaa ongamba noiho pitike li shituke shimwe shi ili? Pashiholelwa, omumwameme otashi vulika a kale i inekela omuniilonga pamwe naye gwomulumentu ngele oya kala haya kundathana olundji naye. Omumwameme ngoka otashi vulika nokuli a tameke oku mu lombwela uupyakadhi womondjokana ye. Omumwatate otashi vulika a pange uukuume nomukiintu ngoka haya longo pamwe naye. Otashi vulika a tye: “Omukiintu nguka okwa simaneka ndje noha pulakene ngele tandi popi naye. Oha pandula ndje wo. Ando nokegumbo osho nee sha li ngeyi!” Mbela otu wete nee nkene Aakriste tashi vulika ya makelwe ya yone ondjokana?

13. Ongiini iihole tayi vulu okutameka pokati kayamwe megongalo?

¹³ Yamwe megongalo lyopaKriste otashi vulika wo ya kale ye na iihole pokati kawo. Natu tale koshiholelwa shimwe sha ningwa shili. Tate Daniel nomukadhi, Sara,a oya li aakokolindjila yondjigilile. Daniel okwa ti: “Ngame omukuluntugongalo ngoka ihaa tindi oshilonga.” Uuthembahenda kehe ta pewa ohe wu taamba owala. Okwa li a konakona Ombiimbeli naalumentu aagundjuka yatano. Lwanima, yatatu yomuyo oya ka ninginithwa. Aamwatate mbano opo ya ninginithwa oya li ya pumbwa natango ekwatho. Olundji omumwameme Sara oye a li ha kwathele aamwatate mboka manga Daniel i ipyakidhila niilonga yilwe yegongalo. Osho sha kala ngaaka. Aamwatate mboka ya konakona naDaniel oya li ya pumbwa okutsuwa omukumo, na Sara oye a li e ya tsu omukumo. Sara naye okwa li ha kala a sa uuza, naakonakoni yaDaniel oyo ya li haye mu kutha uuza. Onkalo ndjoka oya li ya nika oshiponga kuyo ayehe. Daniel okwa ti: “Oomwedhi adhihe ndhoka omukulukadhi gwandje a kala nokukwathela [aakonakonimbiimbeli yandje] oshe mu nkundipaleke pambepo nopamaiyuvo. Shika osha ningwa, molwaashoka ka nda li handi mu pe eitulomo, noshe etitha iizemo iiwinayi noonkondo. Okwa li a yono ondjokana nagumwe gwomaakonakoni yandje yonale. Omomeho gandje sho ta nkundipala pambepo, ihe inandi shi ndhindhilika, molwaashoka onda li owala nda pwila unene miinakugwanithwa yegongalo.” Oshike tashi ku kwathele wu yande oshiponga shika?

14, 15. Oshike tashi vulu okukwathela aaihokani Aakriste kaaya yone ondjokana?

¹⁴ Opo kuu yone ondjokana, dhimbulukwa kutya osha simana okukala omudhiginini kuyo. Jesus okwa ti: “Shono Kalunga e shi tula kumwe, inashi kuthwa kumwe komuntu.” (Mat. 19:6) Onkee ano, iilonga yegongalo hayo ya simana nando yi vulithe omukulukadhi gwoye. Ekwatathano lyeni otali ka nkundipala ngele oho kala ethimbo ele ongoye awike wi ipyakidhila niilonga inaayi simana. Shoka otashi vulu okufala meyonondjokana.

¹⁵ Ongiini ngele owu li omukuluntugongalo, mbela ku na okusila oshimpwiyu uusita? Omuyapostoli Petrus okwa nyola a ti: “Kaleni aasita yoshigunda shoka mwe shi pewa kuKalunga, mu shi tonatele nehalo ewanawa, hakethiminiko. Inamu longa nelalakano tali sitha ohoni lyokukonga eliko, ihe onehalo tali zi momwenyo.” (1 Pet. 5:2) Omukuluntugongalo oku na okukala e na ko nasha niilyo yegongalo. Ihe ke na owala okukala ha longo nuudhiginini megongalo e ta dhimbwa omukadhi. Osha nika oshiponga okupalutha owala egongalo, omanga omukulukadhi gwoye ta “si ondjala” pambepo. Daniel okwa ti: “Omuntu ku na owala okukala to kondjo niilonga yegongalo, omanga egumbo lyoye tali teka po.”

16, 17. (a) Oshike tashi vulu okukwathela Aakriste aaihokani kaaya kale niihole nayalwe kiilonga? (b) Iitopolwa yini tayi vulu okukwathela aaihokani kaaya yone ondjokana?

¹⁶ Omayele omawanawa ngoka taga kwathele aaihokani kaaya yone ondjokana, otaga adhika mOoshungolangelo nomoo-Awake! Pashiholelwa, Oshungolangelo yo 15 Septemba 2006 otayi tu londodha tayi ti: “Yanda oonkalo ndhoka tadhi vulu okufala miihole kiilonga nenge poompito dhilwe dhi ili. Pashiholelwa, okukala ho longo ethimbo ele nomuntu gwuukashikekookantu wa yooloka ko kuwoye otaku vulu oku ku fala momamakelo. Wu li omulumentu a hokana nenge omukiintu a hokanwa, owu na okuulika momapopyo goye nomeihumbato lyoye kutya ino hala okukala nandonando wu na iihole nomuntu. Omolwetilokalunga lyoye, ito ka ningitha yamwe ya ye miihole nangoye mokukala niikala mbyoka tayi hilile momilalo nenge mokuzala nokwiiyopaleka momukalo ngoka tagu pendutha omahalo gomilalo. . . . Okutsilika omathano gakuume koye kopandjokana nosho wo gaamwoye mombelewa yoye otashi ke ku kwathela wu ya kaleke momadhiladhilo manga wu li kiilonga, notaga ka londodha aaniilonga ooyakweni ya kale ye shi kutya owa hokanwa nenge owa hokana. Kala wa tokola thiluthilu okuyanda iikala mbyoka tayi hilile yalwe miihole, noino etha nando wu hililwe miihole kuyalwe.”

¹⁷ Mo-Awake! yaApilili 2009, omu na oshitopolwa: “Marital Fidelity—What Does It Really Mean?” (Okwiinekelathana mondjokana otashi ti naanaa shike?) shoka tashi tu londodha twaa dhane nomaiyuvo gagumwe ngoka kee shi kuume ketu kopandjokana. Oshitopolwa shoka otashi popi kutya okudhana nomaiyuvo gagumwe, otashi vulu okufala nziya meyonondjokana. (Jak. 1:14, 15) Onawa aaihokani ya kale haya konakona pamwe uuyelele mboka omathimbo nomathimbo. Ondjokana oya dhikwa po kuJehova noyi li oshinima oshiyapuki. Ngele owi itulile po ethimbo lyokukala ho popi nakuume koye kopandjokana, otashi ku ulika kutya owa lenga iinima iiyapuki.—Gen. 2:21-24.

18, 19. (a) Okuyona ondjokana oku na iilanduliko yini? (b) Okwiinekelathana mondjokana oku na uuwanawa wuni?

¹⁸ Uuna wi iyadha to makelwa wu ye miihole nagumwe, dhiladhila kiilanduliko iiwinayi mbyoka hayi etwa koluhondelo nokeyonondjokana. (Omayel. 7:22, 23; Gal. 6:7) Mboka haya hondele ohaya yemateke Jehova. Ohayi iyemateke yo yene nosho wo ookuume kawo kopandjokana. (Lesha Maleaki 2:13, 14.) Mepingathano naashoka, tedhatedha omauwanawa ngoka haga monika kwaamboka ye na eihumbato ewanawa. Kaye na owala etegameno lyoku ka mona omwenyo gwaaluhe, ihe oye na wo onkalamwenyo tayi ti sha ngashingeyi nosho wo eiyuvo lya yela.—Lesha Omayeletumbulo 3:1, 2.

¹⁹ Omupisalomi okwi imbi a ti: “Mboka ye ku hole [Kalunga], oye na ombili, nokaku na shoka tashi ya pukitha.” (Eps. 119:165) Otu na okukala tu hole oshili. Onkee ano, natu ‘ikonakoneni ano nawa, nkene tu na okukala. Inatu kala ngashika omagoya, ihe ongaashi aanandunge’ muuyuni mbuka wa kolokosha. (Ef. 5:15, 16) Mondjila moka tatu ende Satana okwa napeka mo oomwigo, ndhoka a hala okuyula nadho aalongelikalunga yashili. Ihe otwa homatekwa nawa tu vule okwiipopila. Jehova okwe tu pa shoka twa pumbwa tu ‘kandeke’ Satana notu ‘dhime iikuti ye ayihe ya hwama omulilo.’—Ef. 6:11, 16.

[Enyolo lyopevi]

[Ethano pepandja 26]

Ohole yokuhola omaliko otayi vulu okuthininika uupambepo womuntu. Ino etha shi ku ningilwe

[Ethano pepandja 29]

Okudhana nomaiyuvo gagumwe otaku vulu okufala meyonondjokana