Kwathela “aakwiilongo” ya ‘longele Omuwa nenyanyu’
“Omuwa ota gamene aakwiilongo.” — EPS. 146:9.
1, 2. (a) Aamwatate naamwameme yamwe oya taalela omahepeko geni? (b) Omapulo geni tatu ka kundathana?
OMUMWATATE Lije okwa hokolola a ti: “Sho iita yopashigwana ya tameke moBurundi, tse nooyandjetu otwa adhika tu li koshigongi shoshitopolwa. Otwa li tu wete aantu taya matuka yo tayu umbu oondjembo. Aavali yandje, natse aamwayinathana tu li 11 otwa yi ontuku tu ka hupithe oomwenyo dhetu, tu na owala iinima iishona. Yandjetu yamwe oye shi pondola okuthika kokamba yoontauki moMalawi, pu na ookilomita dhi vulithe 1600. Oyendji yomutse otwa li twi ihana.”
2 Oontauki muuyuni awuhe ndhoka dha tembuka momagumbo gadho omolwiita nenge omahepeko odhi vulithe po 65 000 000, omwaalu omunene inaashi monika nale.a Mokati kadho omwa kwatelwa Oonzapo dhaJehova odhindjidhindji. Oyendji yomuyo oya li ya silwa aaholike yawo noya li ya kanitha omaliko gawo. Yamwe yomuyo oya li ya taalela omashongo geni? Ongiini tatu vulu okukwathela aamwameme naamwatate mbaka ya ‘longele Jehova nenyanyu,’ nonando otaya hepekwa? (Eps. 100:2) Ongiini tatu vulu okuuvithila nuulaadhi oontauki ndhoka inaadhi tseya natango Jehova onkundana ombwanawa?
ONKALAMWENYO YOONTAUKI
3. Ongiini Jesus naalongwa ye oyendji ya li ya ningi oontauki?
3 Konima sho omuyengeli a londodha Josef kutya omukwaniilwa Herodes okwa hala okudhipaga Jesus, Jesus naavali ye oya taukile kuEgipiti. Oya kala hoka sigo Herodes a si. (Mat. 2:13, 14, 19-21) Konima yomimvo odhindji, aalanduli yaJesus yonale oya li ya “halakanene omikunda adhihe dhaJudea nodhaSamaria” omolwomahepeko. (Iil. 8:1) Jesus okwa li e shi kutya aalanduli ye oyendji otaya ka thiminikwa ya tembuke mo momagumbo gawo. Onkee ano, okwe ya lombwelele a ti: “Ngele taye mu tidhagana moshilando shontumba, tembukileni kushilwe.” (Mat. 10:23) Okuthiga po owala egumbo lyoye ngeya kashi shi oshinima oshipu.
4, 5. Oontauki ohadhi kala moshiponga shini uuna (a) tadhi yi ontuku? (b) dhi li mookamba?
4 Oontauki otashi vulika dhi kale dhi li moshiponga uuna tadhi yi ontuku nenge dhi li mokamba yoontauki. Omumwatate Gad, onkelo yooLije okwa ti: “Otwe ende uule wiiwike yontumba, tatu taaguluka omidhimba dhaantu omathele. Ethimbo ndyono onda li ndi na omimvo 12. Oompadhi dhandje odha li dha zinda nayi e tandi lombwele yaandjetu ya thige ndje po. Tate ka li a hala okuthiga ndje po ndi adhike po kaanashipotha, onkee ano, okwa humbata ndje po. Otwa kala tatu hupu shokadhila esiku nesiku, tatu galikana notwi inekela muJehova, omathimbo gamwe otwa li hatu li owala omamengo ngoka ga mena momukunkulo gwondjila.” — Fil. 4:12, 13.
5 Oyendji yomaandjawo yaLije oya kala omimvo odhindji mookamba dhoontauki dhomIigwana ya Hangana. Ihe nonando ongawo, kaya li natango ye li megameno. Lije ngoka ngashingeyi e li omutonatelishikandjo, okwa a ti: “Aantu oyendji kaya li ye na iilonga. Oya li owala haya kala taya hokola yalwe, oonkolwe, taya ndombola, taya yaka notaya hondele.” Opo Oonzapo dhaJehova ndhoka dha li mookamba dhi kondjithe enwethomo ewinayi, odha li dha pumbwa okukala dhi ipyakidhila lela megongalo. (Heb. 6:11, 12; 10:24, 25) Odha li dha longitha ethimbo lyadho nawa, odhindji odha li dhe shi ningi mokukokola ondjila, opo dhi kale dhi na uupambepo wa kola. Odha kala dhi na omukumo sho dha kala tadhi dhiladhila kombinga yolweendo lwAaisraeli mombuga, nodha kala dhi na etegameno kutya okukala kwadho mookamba onaku ka hule po. — 2 Kor. 4:18.
ULUKILA OONTAUKI OHOLE
6, 7. (a) Ongiini “ohole yaKalunga” hayi inyengitha Aakriste ya kwathele aamwahe mboka ye li mompumbwe? (b) Gandja oshiholelwa?
6 “Ohole yaKalunga” ohayi tu inyengitha tu ulukile yalwe ohole, unene tuu uuna ye li moonkalo oondhigu. (Lesha 1 Johannes 3:17, 18.) Sho Aakriste yomuJudea yomethelemimvo lyotango ya li ye na oshikukuta oshidhigu, egongalo olya li lyu unganeke lyi ya kwathele. (Iil. 11:28, 29) Omuyapostoli Paulus naPetrus oya li wo ya ladhipike Aakriste ya kale haya yakulathana. (Rom. 12:13; 1 Pet. 4:9) Ngele Aakriste taya yakula aamwatate aatalelipo, itashi ka kala tuu oshiwanawa sho taya yakula ooitaali ooyakwawo mboka oonkalamwenyo dhawo dhi li moshiponga nenge mboka taya hepekwa omolweitaalo lyawo! — Lesha Omayeletumbulo 3:27.b
7 Omathimbo ga zi ko, Oonzapo dhaJehova omamiliyona, aalumentu, aakiintu naanona, oya yi ontuku omolwiita nomahepeko muuzilo waUkraine. Shinikitha oluhodhi, yamwe oya li ya dhipagwa. Ihe oyendji oya li ya kuthwa po kaamwatate moUkraine noyendji oya li ya pewa omahala kooitaali ooyakwawo moRussia. Miilongo ayihe mbika iyali, aamwatate oya li ya tokola kaaya kuthe ombinga mopolotika molwaashoka ‘kaye shi yomuuyuni,’ noya tsikile ‘okuuvitha Oohapu dhaKalunga’ nuulaadhi. — Joh. 15:19; Iil. 8:4.
KWATHELA OONTAUKI DHI KOLEKE EITAALO LYADHO
8, 9. (a) Omashongo geni tashi vulika oontauki dhi kale dha taalela miilongo iipe moka dhi li? (b) Omolwashike twa pumbwa oku dhi kwathela neidhidhimiko?
8 Oontauki dhimwe ohadhi thiminikwa dhi ka kale miitopolwa yilwe yomoshilongo shadho, omanga dhilwe odhindji hadhi thiminikwa dhi ka kale miilongo yilwe moka kaadhi shi nando onale. Omapangelo otashi vulika ga gandje iikulya, oonguwo nomahala gokukala, ihe nonando ongawo, iikulya mbyoka aantu haya li otashi vulika yi kale ya pumba. Oontauki dhimwe ndhoka dha za kiilongo kwa pupyala otashi vulika shi kale oshidhigu kudho okukala momahala moka mwa talala, notashi vulika dhi kale kaadhi shi lela kutya nadhi zale ngiini. Ngele odha za kiitopolwa yokuushayi otashi vulika dhi kale kaadhi shi okulongitha iikwamalusheno yoshinanena yomomagumbo gomondoolopa.
9 Omapangelo gamwe oge na oopolohalama dhokukwathela oontauki, opo dhi igilile oonkalo oompe miilongo moka dhi li. Ihe nonando ongawo, olundji muule woomwedhi oonshona oontauki odha tegelelwa dhi isile oshimpwiyu dho dhene, shoka tashi vulu okukala oshidhigu noonkondo. Dhiladhila koonkambadhala ndhoka hadhi ningi okwiilonga elaka epe, oompango oompe, omikalondjigilile oomipe nosho wo iinima ngaashi: okufuta iifendela, oosikola nokuputudha aanona poshikando shimwe. Mbela oto vulu ngaa okukwathela nesimaneko noneidhidhimiko aamwatate namwameme mboka ya taalela oonkalo oondhigu dha tya ngaka? — Fil. 2:3, 4.
10. Ongiini tatu vulu okukoleka eitaalo lyoontauki ndhoka tadhi ya moshilongo shetu? (Tala kethano lyopetameko.)
10 Omathimbo gamwe omapangelo ohage shi ningi oshidhigu kaamwatate mboka ye li oontauki ya kwatathane negongalo. Omahangano gamwe, ohaga ningile aamwatate omatilitho kutya itage ke ya ambidhidha we, ngele oya tindi okutaamba ko iilonga mbyoka tayi ya imbi okuya kokugongala. Omolwuumbanda nokukala yu uvite kaaye na ngu te ya kwathele, aamwatate yamwe oyi igandja. Onkee ano, osha simana okuyakula aamwatate yetu mboka ye li oontauki meendelelo ngaashi tashi vulika konima ngele ya thiki moshilongo shetu. Oya pumbwa okumona kutya otu na ko nasha nayo. Ohenda nekwatho lyetu otayi vulu okukoleka eitaalo lyawo. — Omayel. 12:25; 17:17.
GANDJA EKWATHO TALI OPALELE KOONTAUKI
11. (a) Petameko oontauki ohadhi kala dha pumbwa lela shike? (b) Ongiini oontauki tadhi vulu okuulika olupandu?
11 Petameko aamwatate otashi vulika twa pumbwa oku ya pa iikulya, oonguwo nosho wo oompumbwe dhilwe dhakehe esiku.c Nokuli nuunima uushona ngaashi, oku ya pa otaye, otashi ti sha kuyo. Ngele aamwatate oontauki oyu ulike olupandu nokukala ihaayi indile okanima kehe, otashi ka nyanyudha mboka haye ya kwathele. Osha simana oontauki dhi kambadhale okwiikwatha dho dhene, shoka tashi ke dhi kwathela dhi kale dhi isimaneka nokukala dhi na ekwatathano ewanawa nayalwe. (2 Tes. 3:7-10) Ihe odha pumbwa ekwatho tali opalele.
Ongiini tatu vulu okukwathela aamwatate naamwameme yetu mboka ye li oontauki? (Tala okatendo 11-13)
12, 13. (a) Ongiini tatu vulu okukwathela oontauki? (b) Gandja oshiholelwa.
12 Okukwathela oontauki itashi pula iimaliwa oyindji, ihe ethimbo lyetu nokunakonasha kwetu. Otashi vulika wa pumbwa owala oku dhi ulukila iiyenditho mbyoka hayi longithwa kwaayehe moshilongo sheni, nkene tadhi vulu okulanda iikulya mbyoka yi li nawa noyi na ombiliha, nenge nkene tadhi vulu okumona iilongitho ngaashi: omashina gokuhondja nogokuteta okangwena, opo dhi vule okwiimonena okamaliwa kasha. Shoka sha simanenena, oto vulu oku dhi kwathela dhi kale hadhi endathana aluhe negongalo lyadho epe. Dhi faalela kokugongala mpoka tashi wapa. Dhi yelithila omikalo dhokupopya naantu yomoshitopolwa sho tadhi ya uvithile etumwalaka lyUukwaniilwa. Kala ho yi pamwe nadho muukalele.
13 Sho aagundjuka yane oontauki ye ya megongalo limwe, aakuluntugongalo yi ili noyi ili oya li ye ya longo okuhinga, okutopatopa, okunyola oo-CV nosho wo nkene ye na okwiitulila po elandulathano lyokulongela Jehova. (Gal. 6:10) Nziya ayehe yane oya ningi aakokolindjila. Omolwekwatho ndyoka ya pewa kaakuluntugongalo nosho wo oonkambadhala dhawo dhokulalakanena iilonga yaJehova, odhe ya kwathele ya ninge ehumokomeho pambepo noya yande okunwethwa mo kuuyuni waSatana.
14. (a) Emakelo lini oontauki dhi na okukondjitha? (b) Gandja oshiholelwa.
14 Ngaashi Aakriste ayehe, oontauki nadho odha pumbwa okukondjitha emakelo nethiminiko ndyoka tali dhi ethitha po ekwatathano lyadho naJehova, opo dhi lalakanene iinima yopamaliko.d Lije ngoka a popiwa metetekelo naamwayina otaya dhimbulukwa oshiholelwa sha simana shoka he a li e ya tulila po kombinga yeitaalo, manga ya li taya fadhuka po iita. Okwa ti: “Tate okwe ende te ekelehi kooshimwe nooshimwe iinima yimwe mbyoka twa li inaatu pumbwa naanaa. Hugunina okwa yelutha ondjato yi na owala iinima iishona e ta popi ti imemeha ta ti: ‘Omu wete? Mbino oyo owala mwa pumbwa.’” — Lesha 1 Timoteus 6:8.
SILA OSHIMPWIYU OMPUMBWE ONENE YOONTAUKI
15, 16. Ongiini tandi vulu okuyambidhidha oontauki (a) pambepo? (b) pamadhiladhilo?
15 Oontauki odha pumbwa unene okusilwa oshimpwiyu pambepo nopamadhiladhilo shi vulithe pamaliko. (Mat. 4:4) Aakuluntugongalo otaya vulu okukwathela oontauki moku dhi monena iileshomwa melaka lyadho noku dhi kwathela dhi kwatathane naamwahe mboka haya popi elaka lyadho. Oontauki odhindji odha thiminikwa dhi thige po omahala gadho ngoka dhi igilila. Odha pumbwa okuulukilwa ohole nohenda yaJehova mokati kooitaali ooyakwawo. Ngele itadhi shi ningilwa, otashi vulika dhi ka konge ekwatho kaantu yalwe mboka ya za koshilongo shadho, mboka ihaaya longele Jehova. (1 Kor. 15:33) Uuna tatu dhi ningitha dhi kale dhu uvite dha taambiwa ko megongalo, kungawo otatu longo pamwe naJehova ‘mokugamena aakwiilongo.’ — Eps. 146:9.
16 Ngaashi Jesus noyaandjawo, oontauki otashi vulika dhi kale itaadhi vulu okushuna kiilongo yadho omanga aahepeki yadho oyo taya pangele natango. Lije okwa ti: “Aavali oyendji mboka ya mona yamwe yomaandjawo taya kwatwa koonkondo notaya dhipagwa, inaya hala we okushuna naanona yawo kiilongo hoka ya zile.” Opo ya vule okukwathela mboka ya pita moonkalo oondhigu dha tya ngaaka, aamwatate mboka ye li miilando moka hamu ya oontauki oya pumbwa ‘okukala ye dhi hole ongaamwayina, oku dhi sila ohenda nokukala aaifupipiki.’ (1 Pet. 3:8) Omahepeko oga ningitha oontauki dhimwe dhi kale ihaadhi endathana nayalwe notashi vulika dhi kale dha sa ohoni okupopya kombinga yokumona iihuna kwadho, unene tuu komeho guunona wadho. Ipula to ti: ‘Ando ongame nda li monkalo ya fa yadho, mbela ando ote kala nda hala aantu yu ungaunge nangame ngiini?’ — Mat. 7:12.
UVITHILA OONTAUKI NDHOKA KAADHI SHI OONZAPO
17. Ongiini okuuvithila oontauki haku dhi etele epepelelo?
17 Odhindji dhomoontauki odha za kiilongo hoka iilonga yetu yokuuvitha yi indikwa. Oonzapo ndhoka hadhi longo nuudhiginini miilando moka hamu ya oontauki, odhi shi okupandulwa, oshoka oontauki odhindji odhu uvithilwa “oohapu dhOshilongo” oshikando shotango. (Mat. 13:19, 23) Oyendji mboka ya “humbatekwa uudhigu” ohaya mono epepelelo lyopambepo pokugongala kwetu nohaye shi zimine kutya ‘Kalunga oku li mokati ketu.’ — Mat. 11:28-30; 1 Kor. 14:25.
18, 19. Ongiini tatu vulu okuulika uunongo uuna tatu uvithile oontauki?
18 Mboka hayu uvithile oontauki oya pumbwa okukala ya “kotoka” nokukala ye li ‘oonkotoki.’ (Mat. 10:16; Omayel. 22:3) Oya pumbwa okupulakena neidhidhimiko kwaashoka oontauki tadhi ipula nasho, ihe inaya popya nadho kombinga yopolotika. Oya pumbwa okulandula omalombwelo ngoka ya pewa koshitayimbelewa nokaakwanepangelo yomoshilongo moka, opo kaayi itule moshiponga nenge ya tule mo yalwe. Molwaashoka oontauki odha za momalongelokalunga nomomaputuko ga yoolokathana, otwa pumbwa okwiilonga nokusimaneka omaiyuvo gadho nomadhiladhilo gadho. Pashiholelwa, aantu ya za kiilongo yimwe ohayu uvithwa nayi nuupu kokwaazala nawa kwoomeme. Onkee ano, uuna tatu yu uvithile, otashi ka kala shi li nawa tu zale momukalo ngoka itaagu yu uvitha nayi.
19 Ngaashi Omusamaria omunamutimahenda gwomeyele lyaJesus, otwa hala okukwathela aamwatate mboka taya mono iihuna, mwa kwatelwa aantu mboka kaaye shi Oonzapo. (Luk. 10:33-37) Omukalo gwa dhenga mbanda moka tatu vulu oku shi ninga, oku dhi uvithila onkundana ombwanawa. Omukuluntugongalo gumwe ngoka a kwathela oontauki odhindji okwa ti: “Osha simana oku dhi lombwela kutya tse Oonzapo dhaJehova, nelalakano lyetu lya simana olyo okukwathela aantu pambepo, ihe hapamaliko, molwaashono dhimwe otashi vulika dhi tameke okweendathana natse molwuuwanawa wadho wopaumwene.”
IIZEMO YINYANYUDHA
20, 21. (a) Uuwanawa wuni hawu zi mokuulukila oontauki ohole yopaKriste? (b) Oshike tatu ka kundathana moshitopolwa tashi landula?
20 Okuulukila “aakwiilongo” ohole yopaKriste ohaku eta iizemo iiwanawa. Sho omusamane gwomumwameme gwedhina Alganesh a si, okwa li a yi ontuku pamwe noyana yahamano omolwomahepeko ngoka ga li muEritrea. Konima yolweendo luvulitha lwomasiku gahetatu taya taakana ombuga, oya thiki muSudan. Omumwameme okwa ti: “Aamwatate yamo oya li yu ungaunga natse twa fa aakwanezimo yawo, oye tu pe iikulya, oonguwo, ehala lyokulala nosho wo iimaliwa yomalweendo. Oolye mbela ishewe taya vulu okutaamba ko aantu kaaye ya shi momagumbo gawo, molwaashoka owala haya longele Kalunga gumwe nayo? Oonzapo dhaJehova owala hadhi shi ningi.” — Lesha Johannes 13:35.
21 Ongiini kombinga yaanona oyendji mboka ye li oontauki pamwe naavali yawo nosho wo aatembukilimo yalwe? Moshitopolwa tashi landula, otatu ka konakona nkene atuheni tatu vulu oku ya kwathela ya longele Jehova nenyanyu.
a Moshitopolwa shika otwa longitha oshitya “oontauki” shoka tashi ulike kwaamboka ya tembukila kondje yiilongo nenge komahala gamwe miilongo yawo omolwiita, omahepeko nenge iiponga yopaunshitwe. Omutumwakalelipo omukuluntu gwoontauki a za kIigwana ya Hangana okwa ti kutya kunena “omuntu gumwe gwomaantu 113” muuyuni awuhe, “okwa thiminikwa a tembuke.”
b Tala koshitopolwa “Inamu dhimbwa okutaamba aayenda momagumbo geni” mOshungolangelo yaKotoba 2016, epandja 8-12.
c Mbalambala ngele oontauki dha thiki moshilongo shetu, aakuluntugongalo oya pumbwa okulandula omalombwelo ngoka ge li membo Organized to Do Jehovah’s Will, ontopolwa 8, okatendo 30, mOshiingilisa. Opo aakuluntugongalo ya vule okukwatathana nomagongalo hoka kwa za oontauki, oye na okunyolela koshitayimbelewa shoka tashi tonatele omagongalo ngoka, taya longitha epandja lyetu lyokointaneta, jw.org. Pethimbo mpoka otaya vulu okupula noondunge kombinga yuupambepo wontauki ndjoka.
d Tala iitopolwa “Kaku na ngoka ta vulu okulongela aawa yaali” nosho wo “Kala wu na omukumo, Jehova ote ku kwatha!” mOshungolangelo 15 Apilili 2015, epandja 17-26.