IINIMA MBYOKA YA NINGWA MONDJOKONONA YOONZAPO DHAJEHOVA

“Tu na uulaadhi nohole momitima dhetu shi vulithe nale”

MUSEPTEMBA 1922 onkalo yombepo oya li ya talala noonkondo mEtitano pethimbo lyongula sho aantu 8 000 taya mbombolokele mokapale. Omunashipundi okwa li a tseyitha kutya pethimbo ndika lyoshiningwanima sha simana, kehe gumwe okwa manguluka okuza mo moshinyanga, ihe ita pitikwa a galukile mo.

Omaimbilo oga li tagi imbwa manga omutumba gwoshigongi inaagu tameka, nokonima omumwatate Joseph F. Rutherford okwa yi komutuni. Aantu oyendji oya li ya tegelela oshipopiwa she nenyanyu. Yamwe oya li ya loloka kokweenda momutenya. Omupopi okwe ya lombwele ya kuutumbe, opo ya pulakene. Sho oshipopiwa sha tameke, mbela opu na ngaa ngoka a li a mono kutya opu na elapi lya gonwya nawa lye endjelela pombanda puule komutuni?

Omumwatate Rutherford okwa gandja oshipopiwa shi na oshipalanyolo: “Uukwaniilwa wegulu owu li popepi.” Konima yowili netata, ewi lye olya li tali mbolongondja muule moshinyanga sho ta popi nkene aapolofeti yonale ya li ya popi yaanuumbanda sho taya tseyitha okuya kwUukwaniilwa. Sho a thiki penenedhiladhilo lyoshipopiwa she, okwa pula a ti: “Omwi itaala ngaa kutya Omukwaniilwa gweyadhimo okwa tameka okupangela?” Aantu oya yamukula mokule ya ti: “Eeno!”

Omumwatate Rutherford okwa popi nomuthindo a ti: “Ano, shuneni mepya ne oyana yaKalunga omukombandambanda. Tseyeni kutya Omukwaniilwa ota pangele nale! One aakalelipo ye yoku mu tseyitha. Onkee ano, uvitheni, uvitheni, uvitheni Omukwaniilwa nuukwaniilwa we!”

Konima yethimbo sho elapi ndyoka lya li lya gonywa, lya gonyununwa, olya li li na enyolo tali ti: “Uvitheni Omukwaniilwa nuukwaniilwa we.”

Ray Bopp okwa ti: “Aakalipo oya li ya tuntukwa.” Anna Gardner okwa ti: “Omitengi dhiipilangi dhoshinyanga odha li tadhi inyenge sho aantu taya hakele omake.” Fred Twarosh okwa ti: “Aantu ayehe oya li ya thikama oshita.” Evangelos Scouffas okwa ti: “Opwa li pwa fa pu na sha shi na oonkondo she tu yambula po pomitumba dhetu, naasho twa thikama omeho getu oga li gu udha omahodhi.”

Oyendji mboka ya li poshigongi shoka ohaya taandelitha nale onkundana ombwanawa yUukwaniilwa. Oya li yu uvite ya tsuwa omukumo ya tsikile niilonga yokuuvitha. Ethel Bennecoff okwa ti: “Aakonakonimbiimbeli oya li ye na uulaadhi nohole momitima dhawo shi vulithe nale.” Odessa Tuck ngoka ethimbo ndyoka a li e na omimvo 18, koshigongi okwa zi ko a tokola okutula miilonga epulo ndyoka tali ti: “Olye ta ningi omutumwa?” Okwa ti: “Kanda li ndi shi hoka tandi tumwa nokanda li ndi shi kutya otandi yi ko ngiini notandi ka ninga ko shike. Shoka nda li ndi shi osho kutya onda li nda hala okukala nda fa Jesaja, ngoka a ti: “Otandi yi! Tuma ndje!” (Jes. 6:8) Ralph Leffler okwa ti: “Esiku ndyoka linyanyudha olya li lela etameko lyoshikonga shokutseyitha Uukwaniilwa shoka tashi ningwa muuyuni awuhe kunena.”

Osha yela kutya oshigongi shika sha ningilwe moCedar Point, Ohio, mo 1922, osha li sha simanenena mondjokonona. George Gangas okwa ti: “Oshigongi shoka osha pendutha mungaye ehalo lyokwaafaula oshigongi nando oshimwe.” George ota dhimbulukwa nawa kutya sigo oompaka ina faula oshigongi nando oshimwe. Julia Wilcox okwa nyola a ti: “Oshikando kehe tandi lesha miileshomwa yetu kombinga yoshigongi shoka sha ningilwe moCedar Point mo 1922, ihandi kala ndi na iitya nomatumbulo. Ohandi kala aluhe nda hala okutya: ‘Tangi Jehova sho wa pitike ndje ndi kale po.’”

Otashi vulika oyendji yomutse kunena natse hatu dhimbulukwa iinima iiwanawa mbyoka ya ningwa piigongi, unene tuu mbyoka tayi nyanyudha omitima dhetu noye tu pa uulaadhi nohole yokuhola Kalunga ketu omunene nOmukwaniilwa gwe. Uuna tatu dhimbulukwa iinima mbyoka natse wo ohashi tu inyengitha tu tye: “Tangi Jehova sho wa pitike ndje ndi kale po.”

Egalikano lyetu olya yamukulwa inaatu shi tegelela

Arthur naNellie Claus poshinyanga oya thiki po kuyele, opo ya mone omahala ge li nawa. Arthur okwa ti: “Onda li nda pulakena kehe shimwe tashi popiwa po.” Arthur okwa adhika kuuwehame womepunda ombaadhilila. Nonando ka li a hala okuza mo moshinyanga, okwa zi mo e shi kutya ita vulu we okugalukila mo. Omuyakuli okwe mu pula a ti: “Omolwashike to piti mo ethimbo ndino?” Arthur oku shi kutya oku na okuza mo, molwaashoka ote ehama mepunda.

Sho ta galuka, oku uvu aantu taya hakele omake moshinyanga. Okwa kala ta kongo mpoka ta vulu okuuva ko nawa shoka tashi popiwa mo. Okwa mono mpoka ta londele, a ye pombanda pu na uule woometa 4.8 lwaampo.

Mpono Arthur a thikile, okwa adha po aamwatate oyendji kaaye shi kutya naya ninge shike, opo ya mone omupopi. Oya kongo po ondunge ya tete oongodhi poshikando, opo elapi ndyoka lya li lye ya shiga li gwe po. Ihe opo ya vule okuteta oongodhi ndhoka, oya li ya pumbwa oshimbele. Mbela Arthur okwa li e na okambele komondjato ke na omayego? Lagwenene okwa li e ka na. Arthur nosho wo yalwe oya kala ya thikama ya tegelela shoka tashi landula ko. Sho omumwatate Rutherford a popi oshikando oshitiyali a ti: “Uuvitheni,” oya tete oongodhi.

Mboka ya li po oya li ya hokolola nkene elapi enene li na omalwaala gatatu lya gonyununuka mo sho oongodhi dha tetwa. Pokati kelapi ndyoka opwa li pwa thanekwa Jesus.

Konima yaashono, aamwatate oya li ya yelithile Arthur kutya pombanda oya yi po ya londele kompani, ihe konima ompani oya kuthwa po. Kaya li ye na shoka taya vulu okuninga po, onkee oya galikana Jehova e ya tumine omumwatate e na oshimbele. Aamwatate mboka oya li yu uvite lela kutya Jehova okwa yamukula egalikano lyawo momukalo naanaa ngoka ya hala, sho e ya tumine Arthur e na oshimbele.