Aaisraeli yopethimbo lyonale oya li ya kutha ombinga miita — Omolwashike tse ihaatu shi ningi?

ESIKU limwe, omukwiita gumwe gwepangelo lyaNazi okwa ganda ongundu yOonzapo dhaJehova a ti: “Ngele kehe gumwe gwomune okwa tindi okukondjitha Fulaanisa nenge Ingilanda, oku na okusa!” Nonando opwa li pu na aakwiita yaNazi popepi nayo ya homata nokomayego, kapu na nando omumwatate gumwe a li i igandja kuyo. Oshinima shoka kasha li tuu sha pula uulaadhi! Oshi li lela oshiholelwa oshiwanawa shankene Oonzapo dhaJehova dha tala ko iita. Ohatu tindi okukutha ombinga miita yuuyuni mbuka. Nokuli nando yamwe oye tu thiminike kutya ngele itatu yi kiita otatu dhipagwa, ohatu kala twa tokola toko kaatu kuthe ombinga momaipumomumwe gomuuyuni.

1. AAPIYA YAKALUNGA OYA LI OSHIGWANA SHIMWE

Monakuziwa, Jehova okwa li a hogolola oshigwana shimwe shi ninge aantu ye, oshigwana shaIsraeli. Okwa li i ithana Aaisraeli mboka kutya ‘aantu ye mwene.’ (Eks. 19:5) Kalunga okwa li e ya pe oshitopolwa shimwe shokondandalunde. Onkee sho a li ha lombwele Aaisraeli ya ye kiita ya ka kondjithe iigwana yimwe, kaya li ye na okukondjitha nenge ya dhipage aalongelikalunga ooyakwawo.a

Kunena, aalongeli yaJehova oya za ‘momihoko adhihe, momaludhi agehe, miigwana ayihe nomomalaka agehe.’ (Eh. 7:9) Ngele oya kutha ombinga miita, nena otaya kondjithathana. Shimwe ishewe, otaya dhipaga nokuli ooitaali ooyakwawo.

2. JEHOVA OKWA LI A LOMBWELE AAISRAELI YA YE KIITA

Monakuziwa, Jehova okwa li ha tokola kutya uunake nomolwashike Aaisraeli ya li ya pumbwa okuya kiita. Pashiholelwa, Kalunga okwa li a lombwele Aaisraeli ya hanagule po Aakaanana, mboka ya li ye shiwikile okulongela oompwidhuli, oluhondelo lwa pitilila nosho wo okuyamba po aanona omafikilondjambo. Jehova okwa li a wilike Aaisraeli, opo ya kombe mo aakolokoshi ayehe mboka ya li mevi ndyoka u uvaneka okuya pa. (Lev. 18:24, 25) Konima sho Aaisraeli ya tula mEvi lyEuvaneko, Kalunga omathimbo gamwe, okwa li a lombwele Aaisraeli ya ka kondjithe aathiminiki yawo. (2 Sam. 5:17-25) Nonando ongawo, kapu na nando opompito yimwe Jehova a li a pitike Aaisraeli ya tokole kuyo yene ya ye miita. Uuna ya li ye shi ningi, oya li ya mono iilanduliko ya kwata miiti. — Num. 14:41-45; 2 Ondjal. 35:20-24.

Kunena, Jehova iha lombwele nando aantu ya ye kiita. Iigwana ohayi kondjo nelalakano lyokuhumitha komeho uuwanawa wayo yene, ihe hawaKalunga. Otashi vulika yi ye kiita nelalakano ya hala evi, okuyambapala nenge okuhumitha komeho opolotika. Ihe ongiini kombinga yaamboka haya ti kutya otaya kondjo ya gamene elongelokalunga lyawo nenge okudhipaga aatondi yaKalunga? Jehova ota ka gamena aapiya ye, nota ka hanagula po aatondi ye piita yaArmagedon monakuyiwa. (Eh. 16:14, 16) Piita mbyoka, etangakwiita lyaKalunga otali ka kala lya kwatela mo iishitwa yopambepo, ihe haapiya ye yopantu. — Eh. 19:11-15.

3. AAISRAELI OYA LI YA HUPITHA AANTU MBOKA YE NA EITAALO MUJEHOVA

Monakuziwa, etangakwiita lyAaisraeli olundji olya li lya sile ohenda aantu mboka ya li yu ulike eitaalo muKalunga, nolya li owala lya dhipaga mbono ya li ya tokolwa kuJehova ya dhipagwe. Natu taleni kiiholelwa mbika iyali. Nonando Jehova okwa li a gandja elombwelo Jeriko shi hanagulwe po, Aaisraeli kaya li ya dhipaga Rahab naantu yaandjawo, molwaashoka okwa li e na eitaalo. (Jos. 2:9-16; 6:16, 17) Konima yethimbo, oshilando ashihe shaGibeon osha li sha hupithwa, molwaashoka Aagibeon oya li yu ulike etilokalunga. — Jos. 9:3-9, 17-19.

Kunena, iigwana mbyoka hayi kondjithathana ohayi dhipaga aantu mboka ye na eitaalo. Omathimbo gamwe naantu mboka kaaye shi aakwiita, ohaya dhipagelwa momaipumomumwe ngoka.

4. AAISRAELI OYA LI HAYA LANDULA OOMPANGO DHAKALUNGA DHI NA KO NASHA NIITA

Monakuziwa, Jehova okwa li a tegelela aakwiita Aaisraeli yi ihumbate metsokumwe nomalombwelo ge, ge na ko nasha niita. Pashiholelwa, Kalunga omathimbo gamwe okwa li ha pula Aaisraeli ya gandje “ompito yokwiigandja” koshilando shoka ya hala okuponokela. (Deut. 20:10) Jehova okwa li wo a tegelela aakwiita Aaisraeli ya kale ya yogoka palutu nopamikalo. (Deut. 23:9-14) Omanga aakwiita yomiigwana mbyoka ye ya kundukidha, olundji ya li haya kwata aakiintu onkonga yomiitopolwa mbyoka ya kwata ko. Jehova okwa li i indike Aaisraeli kaaya ninge oshinima shoka. Nokuli, kaya li ya pitikwa ya hokane omukiintu ngoka ya kwata ko, manga inaapu pita omwedhi konima yokukwata ko oshilando. — Deut. 21:10-13.

Kunena, iilongo oyindji oya shaina euvathanotsokumwe lyopaigwana li na ko nasha nankene ye na okwiihumbata, uuna ye li miita. Nonando shika osha nuninwa okugamena aakwashigwana, shiyemateka iilongo mbyoka olundji ohayi teya oompango ndhoka.

5. KALUNGA OKWA LI A KONDJELE OSHIGWANA SHE

Monakuziwa, Jehova okwa li a kondjele Aaisraeli, nolundji okwa li a longo iikumithalonga opo ya sindane molugodhi. Pashiholelwa, Jehova okwa li a kwathele ngiini Aaisraeli ya sinde oshilando shaJeriko? Ngaashi Jehova a ti, sho Aaisraeli ‘ya kugilile, edhingililokuma olya kumuka po,’ shoka she shi ningitha oshipu ya kwate ko oshilando shoka. (Jos. 6:20) Oshe ende ngiini ishewe opo ya sinde Aayamori? “Omuwa okwe ya lokithile omamanya omanene goompawe . . . Mboka ya si koompawe, oya li oyendji ye vule mboka ya dhipagwa kAaisraeli.” — Jos. 10:6-11.

AAKRISTE YASHILI AAKONDJELI YOMBILI

Ngaashi twe shi mona, onkalo yetu oya yooloka ko kwaandjoka yAaisraeli yopethimbo lyonale. Nonando ongawo, omayooloko ngoka hago owala omatompelo kutya omolwashike ihaatu yi kiita. Opu na wo galwe. Pashiholelwa, Kalunga okwa li a hunganeke kutya momasiku gahugunina, mboka ya longwa kuye itaye ki ‘ilongekidhila we olugodhi,’ noitaya ka kutha ombinga mugo. (Jes. 2:2-4) Shimwe ishewe, Kristus okwa ti kutya aalongwa ye ‘kaye shi yomuuyuni’; itaya ka kutha ombinga momaipumomumwe gomuuyuni. — Joh. 15:19.

Kristus okwa li a ladhipike ishewe aalanduli ye ya ninge oshinima shilwe. Okwa li e ya lombwele ya yande iikala mbyoka tayi etitha onkone, ongeyo nosho wo iita. (Mat. 5:21, 22) Okwa li wo e ya lombwele ya kale “aakondjeli yombili” nokukala ye hole aatondi yawo. — Mat. 5:9, 44.

Ongiini kombinga yetu pauhandimwe? Otashi vulika kaatu na ehalo lyoku ka kondja miita, ihe mbela otu na ongeyo momitima dhetu ndjoka tayi vulu okweetitha omaipumomumwe nenge etopoko megongalo? Natu tsikileni okukambadhala tu ethe po omaiyuvo kehe ga tya ngaaka momitima dhetu. — Jak. 4:1, 11.

Pehala lyokukutha ombinga momaipumomumwe giigwana, ohatu humitha komeho ombili nohole mokati ketu. (Joh. 13:34, 35) Onkee natu kaleni twa tokola toko kaatu kuthe ombinga miinima yopapolotika, sho twa tegelela nondjuulukwe esiku ndyoka Jehova ta ka hulitha po iita ayihe sigo aluhe. — Eps. 46:9.