1925​ — Ngashingeyi pwa pita omimvo ethele

OYA KALA YA TEGELELA

Momumvo 1925, Aakonakoni yOmbiimbeli oyendji oya li ya tegelela kombanda yevi ku kale ishewe Oparadisa. Omolwashike mbela? Omumwatate Albert Schroeder, ngoka lwanima a ka ninga Oshilyo shOlutuwiliki, okwa ti: “Otwa li hatu dhiladhila kutya oshihupe shaalanduli aagwayekwa yaKristus otashi ka ya megulu shi ka ninge oshitopolwa shUukwaniilwa nosho wo kutya aalumentu aadhiginini yonale, ngaashi Abraham, David nosho wo yalwe, otaya ka yumudhwa ye li aawa ya ka pangele kombanda yevi.” Sho omumvo ngoka gwa thiki, ihe shoka ya li ya tegelela inashi ningwa, osha li shu uvitha nayi aamwatate yamwe nosha li she ya teya omukumo. — Omayel. 13:12.

Nonando oya li ya teka omukumo, Aakonakoni yOmbiimbeli oyendji oya tsikile niilonga yokuuvitha, noya li ya ndhindhilike nkene oshinakugwanithwa shawo shokukala Oombangi dhaJehova sha simana. Pashiholelwa, natu taleni kiilonga mbyoka ya li ya longo, opo ya taandelithe oshili komahala gokokule.

IITAASI YORADIO OYI INDJIPALA

Mo 1924, ositaasi yoradio yedhina WBBR oya kala tayi shi enditha nawa, shoka shi inyengitha Aakonakoni yOmbiimbeli ya ninge po ositaasi yoradio onkwawo yi na oonkondo popepi noChicago, moIllinois. Edhina lyositaasi ndjoka ompe olya li hali ithanwa WORD. Omumwatate Ralph Leffler, ngoka a li a kwathele nokweeta po ositaasi yedhina WORD, okwa ti, aantu ye li komahala ogendji gokokule oya li ya pulakene kositaasi ndjoka pethimbo lyokufu kongulohi. Pashiholelwa, uukwanegumbo wumwe mboka wa li hawu zi kokule noChicago nookilometa dhi vulithe 5,000 moshilando Pilot Station, moAlaska, owa li wa pulakene koopolohalama ndhoka dha kwatwa tango. Konima yokupulakena koopolohalama ndhoka, uukwanegumbo mboka owa li wa nyolele ontumwafo mboka haya longo kositaasi ndjoka, taye ya pandula sho ya longekidha opolohalama ndjoka ye ya tsa omukumo pambepo.

Oshungolangelo 1 Desemba 1925, oya yelitha kutya omolwashike aantu oyendji ya vulu okupulakena kositaasi shoradio ndjoka. Oya ti: “OWORD oyi li yimwe yomiitaasi yomoAmerika, mbyoka yi na oonkondo. Aantu mboka haya zi moAtlantic, koongamba dhEfuta lya Mwena, moKuba nosho wo kuumbangalantu wAlaska, oya li haya pulakene kositaasi ndjoka. Aantu oyendji mboka inaaya uva nando onale kombinga yoshili, oya li ye na ohokwe yokupulakena kositaasi ndjoka.”

Momukokomoko gwethimbo ndyoka, Aakonakoni yOmbiimbeli oya ningi wo oonkambadhala, opo ya kale taya longitha oradio ya uvithe onkundana ombwanawa moKanada. Mo 1924, ositaasi shoradio yedhina CHUC, oya tungwa moSaskatoon, shaSaskatchewan. Ositaasi ndjoka oya li yimwe yomiitaasi yoradio yomalongelokalunga moKanada. Mo 1925, ositaasi ndjoka onshona oya li yi na okutembudhwa. Onkee ano o-Watch Tower Society oya ningi ooyene yositaasi ndjoka, noya tembudhile oo-studio dhawo dhokutuma omawi mombepo metungo lyedhina Regent, ehala ekulu lyokudhanena iinyandwa moSaskatoon, ndyoka ya li ye li landa po noku li opalekulula, opo ya tule mo ositaasi shoradio.

Omolwositaasi ndjoka, aantu oyendji mboka ya li haya zi momikunda dhomoSaskatchewan moka kaamu na aantu oyendji, oya uvu onkundana ombwanawa oshikando shotango. Pashiholelwa, konima sho mee Graham, ngoka a li ha zi mondoolopa yi ikalela a pulakene kopolohalama ndjoka ya kwatwa, okwa nyolele kehangano ta pula iifo ya kankamena kOmbiimbeli. Omumwatate George Naish, okwa ti kutya, eindilo lyomukulukadhi ngoka tu mu kwathele, olya li lya endelela lela, onkene otwe mu tumine embo lyedhina Studies in the Scriptures. Omathimbo hamale, mee Graham okwa tameke okutaandeleka etumwalaka lyUukwaniilwa komahala gokokule.

OSHILI YA SIMANA

Oshungolangelo 1 Maalitsa 1925, oya li yi na oshitopolwa sha simana shi na oshipalanyolo “Birth of the Nation.” Omolwashike oshitopolwa shoka sha li sha simana? Uule wethimbo lyontumba, Aakonakoni yOmbiimbeli oya li yi itaala kutya Satana oku na ehangano ihaa li monika megulu, li na iishitwa yopambepo iikolokoshi ihaayi monika, noli na wo omalongelokalunga, oongeshefa noongundu dhoopolotika kombanda yevi. Ihe okupitila moshitopolwa shika, “omupiya omudhiginini nomunandunge” okwa li a kwathele aamwatate naamwameme ya mone kutya Jehova naye oku na ehangano ndyoka lya yooloka ko thiluthilu kehangano lyaSatana, naamwatate ohaya tindi okuyambidhidha ehangano lyaSatana. (Mat. 24:45) Shimwe ishewe, omupiya okwa li a yelitha kutya Uukwaniilwa waKalunga owa dhikwa po mo 1914, momomumvo ngoka, megulu omwa tukuluka olugodhi,” naSatana noondemoni dhe oya li ya umbwa mo megulu, noya ngambekelwa kombanda yevi. — Eh. 12:7-9.

Yamwe yomAakonakoni yOmbiimbeli oya li ye shi mono oshidhigu okutaamba ko euvoko ndyoka epe. Onkene oshitopolwa shika osha ti: “Ngele opu na aaleshi yOshungolangelo mboka itaaya tsu kumwe naashoka sha popiwa mo, naya kale ye na eidhidhimiko nokukala ye na einekelo muJehova sho taya tsikile oku mu longela nuudhiginini.”

Tom Eyre, omwaandjaganeki gumwe gwiileshomwa (ngashingeyi hi ithanwa omukokolindjila) a za koBritania, ota hokolola nkene Aakonakoni yOmbiimbeli oyendji ya li ye uvitile oshitopolwa shoka, a ti: “Aamwatate oya li ya tuntukwa kefatululo lyEhololo ontopolwa 12.” Sho twa ndhindhilike kutya Uukwaniilwa owa dhikwa po megulu, otwa li twa nyanyukwa lela okulombwela yalwe kombinga yonkundana ndjika ombwanawa.” Osha li she tu ningitha tu kale twa hala okuuvitha shi vulithe nale, nosha li she tu kwathele tu mone kutya Jehova okwa li ta ka ninga iinima oyindji iiwanawa monakuyiwa.

TAYA UVITHA KOMBINGA YAJEHOVA

Kunena, Oombangi dhaJehova odhi shi nawa oohapu dhaJesaja 43:10 ndhoka tadhi ti: “One oonzapo [oombangi, NWT] dhandje; aantu yandje nde mu hogolola.” Ihe momimvo ndhoka dha tetekele omumvo 1925, enyolo ndyoka kalya li naanaa hali longithwa miileshomwa yetu. Ihe opwa li pwa ningwa elunduluko. Momumvo 1925, Oshungolangelo oya li ya kundathana enyolo lyaJesaja 43:10 no 12 miitopolwa yokukonakonwa yi li 11.

Pehulilo lyaAuguste 1925, Aakonakoni yOmbiimbeli oya li ya gongala poshigongi shoshitopolwa moIndianapolis, shaIndiana. Omumwatate Joseph F. Rutherford okwa li a hambelele aantu noohapu ndhoka dha nyolwa kokafo kelandulathano lyoshigongi tadhi ti: “Otwe ya koshigongi shika opo tu mone oonkondo ndhoka dha za kOmuwa, opo sho tatu ka shuna kiilonga yokuuvitha tu kale tu na oonkondo dhokugandja uumbangi kombinga ye.” Momukokomoko gwomasiku gahetatu goshigongi, ayehe mboka ya li po oya li ya ladhipikwa ya gandje uumbangi kombinga yaJehova pompito kehe taya mono.

MOlyomakaya yomasiku 29 Auguste, omumwatate Rutherford okwa li a gandja oshipopiwa shi na oshipalanyolo “A Call to Action.” Moshipopiwa she, okwa li a tsu omuthindo esimano lyokugandja uumbangi a ti: “Jehova okwa ti koshigwana she . . . : ‘One oonzapo [oombangi, NWT] dhandje . . . ongame Kalunga.’ Opo nduno okwe ya lombwele oohapu dha yela tadhi ti: ‘Yeluthileni iigwana ombaaneli!’ Aantu yaJehova kombanda yevi oyo owala taya vulu okugandja uumbangi kombinga ye, oshoka ohe ya wilike nombepo ye ondjapuki.” — Jes. 43:12; 62:10.

Konima yoshipopiwa she, omumwatate Rutherford okwa li a lesha ondokumende hayi ithanwa “Message of Hope.” Aantu mboka ya li ya gongala, oya tsu kumwe netumwalaka ndyoka tali ti kutya Uukwaniilwa waKalunga owo owala etegameno lyashili lyoku ka mona “omayambeko ngaashi ombili, ehepuluko, uundjolowele, omwenyo gwaaluhe, emanguluko nenyanyu lyaaluhe.” Lwanima, ondokumende ndjoka oya li ya tolokwa momalaka ogendji nokupilintwa molupe lwuufo. Ookopi dhi li omamiliyona 40 lwaampono, odha li dha andjaganekwa.

Uule womimvo odhindji, Aakonakoni yOmbiimbeli kaya li hayi ithanwa Oombangi dhaJehova. Ihe oya li ye shi uvite ko kutya oye na oshinakugwanithwa sha simana shokugandja uumbangi kombinga ye.

OKUSHUNA KWAAMBOKA YU ULIKA OHOKWE

Sho omwaalu gwAakonakoni yOmbiimbeli gwe ende tagu indjipala muuyuni auhe, nayo oya kala ye na omukumo gwokushuna kwaamboka yu ulika ohokwe monkundana ombwanawa. Konima yoshikonga shokwaandjaganeka okafo Message of Hope,a okwa li kwa gandjwa elombwelo tali ti: “Shuneni komagumbo hoka aauvithi ya li ya thiga ko okafo hoka Message of Hope, ihe hakwaangoka inaaya gandja iifo.”

Mokafo kedhina Bulletin kaJanuali 1925, omwa li oshitopolwa shi na olapota yomukonakonimbimbeli gwomoPlano, shaTexas, tayi ti: “Otwa tuntukwa okumona kutya iitopolwa mbyoka twa kala nokulonga lwiikando, oyi na aantu haya pulakene nawa yi vulithe iitopolwa mbyoka iipe. Otwa kala nokulonga mokandoolopa kamwe okashona moshitopolwa shetu iikando itano, momukokomoko gwomimvo omulongo dha ka pita . . . Omathimbo opo ga zi ko, omumwameme Hendrix nameme gwandje, oya li ye ku uvithila ishewe kokandoolopa hoka, noya li ya gandja omambo ogendji shi vulithe nale.”

Omwaandjaganeki gumwe gwiileshomwa gwomoshilongo Panama, okwa nyola a ti: “Aantu oyendji mboka ya li haya tidha ndje po piiyelo yomagumbo gawo, oya lundulula iikala yawo oshikando oshitiyali nenge oshititatu sho nda shuna ko ishewe. Omumvo nguka, onda kala nokulonga olundji tandi uvithile aantu mboka nda li nda uvithila nale, nonda mona iizemo iiwanawa nayamwe yomuyo.”

YA TALA KONAKUYIWA

Omumwatate Rutherford okwa li a ngongo ontumwafo ye yokomumvo ndjoka a nyolela aayandjaganeki yiileshomwa noohapu tadhi ti: “Momukokomoko gwomumvo gwa zi ko, omwa li mu na uuthembahenda wokuhekeleka oyendji mboka ya li ye uvite nayi. Iilonga mbika oya nyanyudha omitima dheni . . . Momumvo gwa landula ko, otamu ka kala mu na oompito odhindji dhokugandja uumbangi kombinga yaKalunga nUukwaniilwa we, nokuulika kutya omu li lela oshigwana she. . . . Natu tsikileni okulongitha omawi getu twi imbileni Kalunga ketu nOmukwaniilwa gwetu omaimbilohambelelo.”

Sho omumvo 1925 gwe ende gu uka popepi, aamwatate oya li ya ningi oompangela ya gwedhele omatungo gomoBrooklyn. Omumvo 1926 ogwa li tagu ka kala etameko lyooproyeka dhokutunga oonene, ndhoka ehangano inaali ninga nando onale.