Ohole yaKalunga otayi kala sigo aluhe

1-2. Eshongo lini Aakriste oyendji haya taalele?

DHILADHILA kowato yi li mokati koshikungulu oshinene. Omakuthikuthi omanene otaga undulile owato pombanda nopevi. Owato ndjoka otayi kaya kehe mpoka omakuthikuthi tayi ga undulile, ngele gumwe ina longitha ohangela. Ohangela otayi ka kankeka owato noku yi kwathela kaayi falwafalwe komakuthikuthi.

² Uuna wa taalela onkalo ondhigu, otashi vulika wu kale wa fa owato ndjoka. Omaiyuvo goye otaga vulu okulunduluka nziya. Esiku limwe owu na einekelo kutya Jehova oku ku hole note ku yambidhidha, ihe esiku lya landula ko owu na omalimbililo ngele oku wete ngaa onkalo ndjoka wu li muyo. (Eps. 10:1; 13:1) Otashi vulika kuume koye e ku lombwele oohapu tadhi hekeleke noho kala wu uvite hwepo uule wokathimbo. (Omayel. 17:17; 25:11) Ihe owa tameke ishewe okukala wu na omalimbililo. Otashi vulika nokuli wu kale twi ipula ngele Jehova oku na ko ngaa nasha nangoye natango. Ongiini to vulu okulongitha ohangela yopathaneko, uuna wu li monkalo ondhigu? Niitya yimwe, ongiini to vulu okushilipalekwa nokukala wu na uushili kutya Jehova oku ku hole note ke ku kwathela?

3. Uutumbulilo ‘esilohenda’ nenge ohole ihaayi lunduluka owa hala okutya shike, ngaashi sha popiwa mEpisalomi 31:7 nosho wo 136:1, nomolwashike tatu vulu okutya Jehova oku li oshiholelwa sha dhengambanda shohole ndjoka? (Tala wo ethano.)

³ Omukalo gumwe moka to vulu okulongitha ohangela yopathaneko uuna wu li muudhigu, omokudhimbulukwa esilohenda, nenge ohole yaJehova ihaayi lunduluka. (Lesha Episalomi 31:7; 136:1.) Uutumbulilo ‘esilohenda,’ nenge ohole ihaayi lunduluka, owu ukitha kekwatathano lya kola notali kalelele ndyoka omuntu gwontumba e na nagulwe. Jehova oku li oshiholelwa sha dhengambanda shohole ihaayi lunduluka. Nokuli Ombiimbeli oye mu popya kutya oku “udha esilohenda [‘oku na thiluthilu ohole ihaayi lunduluka,’ NWT].” (Eks. 34:6, 7) Ombiimbeli oya ti wo kutya Jehova: “Owu na esilohenda kumboka taye ku indile [‘oho ulikile ayehe mboka haye ku ithana ohole onene ihaayi lunduluka,’ NWT].” (Eps. 86:5) Dhiladhila kwaashoka shika tashi ti: Jehova ke na esiku a thige po aapiya ye aadhiginini! Ngele owa dhimbulukwa kutya Jehova omudhiginini, otashi ke ku kwathela momathimbo omadhigu. — Eps. 23:4.

DHIMBULUKWA KUTYA OHOLE YAJEHOVA OYI LI ELONGO LYOPETAMEKO LYOMBIIMBELI

4. Gandja iiholelwa yomalongo gopetameko gOmbiimbeli, e to yelitha kutya omolwashike ihaatu falwafalwa nuupu.

⁴ Omukalo omukwawo to vulu okulongitha ohangela yopathaneko uuna wu li monkalo ondhigu, omokudhimbulukwa kutya ohole yaJehova oyi li elongo lyopetameko lyOmbiimbeli. Uutumbulilo “elongo lyopetameko lyOmbiimbeli,” otawu ti shike kungoye? Otashi vulika to dhiladhila kombinga yomalongo gOmbiimbeli ngoka wi ilonga mOohapu dhaKalunga. Pashiholelwa, owi ilonga kutya edhina lyaKalunga oJehova, Jesus Omwana gwaKalunga epona, owi ilonga kutya oonakusa kaye na sho ye shi, nonokutya kombanda yevi otaku ka kala oparadisa moka aantu taya ka kala sigo aluhe. (Eps. 83:18; Omuuv. 9:5; Joh. 3:16; Eh. 21:3, 4) Sho wa taamba ko omalongo ngoka kutya ogoshili, kasha li oshipu okufalwafalwa. Omolwashike mbela? Oshoka owa li we shi ndhindhilike kutya oge li paushili. Natu ka taleni kutya okutala ko ohole yaJehova yi li elongo lyopetameko lyOmbiimbeli, otashi ke ku kwathela ngiini wu sinde omadhiladhilo ngoka kutya Jehova ke na ko nasha, nenge ke wete onkalo ondhigu moka wu li.

5. Yelitha nkene omuntu ta vulu okutinda omalongo giifundja.

⁵ Tango sho wa tameke okukonakona Ombiimbeli, oshike she ku kwathela wu tinde omalongo giifundja? Otashi vulika wa kwathelwa kokuyelekanitha shoka wa longwa kelongelokalunga moka wa li nOmanyolo. Tala koshiholelwa shika. Natu tye andola owa li wi itaala kutya Jesus oKalunga Omunankondoawike. Ihe sho wa konakona Ombiimbeli, owi ipula to ti, ‘Mbela elongo ndyoka olyoshili ngaa?’ Konima sho wa mono uumbangi wi ikolelela kOmanyolo, owa li wa vulu okuyamukula kutya aawe kali shi lyoshili. Opo ihe pehala lyokukala wi itaala elongo ndyoka lya puka, owa taamba ko oshili ndjika yOpamanyolo kutya: Jesus oye “omutango gwiishitwa ayihe,” “Omuna gwaKalunga epona.” (Kol. 1:15; Joh. 3:18) Odhoshili kutya omalongo giifundja ohaga kala ge na “omakankameno ga kola,” nomadhigu okuhanagula po. (2 Kor. 10:4, 5) Ihe sho wa vulu oku shi ninga, ino shuna we komalongo giifundja ngoka wa thiga konima. — Fil. 3:13.

6. Omolwashike to vulu okukala nuushili kutya ‘ohole yaJehova ihaayi lunduluka otayi kala sigo aluhe’?

⁶ Oto vulu okulongitha omukalo gwa faathana ngele tashi ya pwaashoka Ombiimbeli tayi longo kombinga yohole yaJehova. Uuna wa taalela eshongo lyontumba, ngele owa tameke okukala wu na omalimbililo ngele Jehova oku ku hole ngaa, ipula ngeyi, ‘Mbela otandi dhiladhila ngaa mondjila?’ Yelekanitha omalimbililo ngoka wu na kombinga yohole yaJehova noohapu dhEpisalomi 136:1, ndhoka dhi li enyolo lyenenedhiladhilo lyoshitopolwa shika. Omolwashike Jehova a ti kutya ‘esilohenda lye,’ nenge ohole ye ‘ihayi lunduluka’? Omolwashike oohapu ‘esilohenda lye otali kala sigo aluhe,’ nenge ohole ye ihaayi lunduluka otayi kala sigo aluhe, dha endululwa iikando 26 mepisalomi ndyoka? Ngaashi twe shi kundathana, ohole yaJehova ihaayi lunduluka oyi li elongo lyOmbiimbeli lya simanenena, ngaashi owala omalongo galwe ngoka wa taamba ko nuupu okuza mOohapu dhaKalunga. Onkene okukala wi itaala kutya Jehova okwe ku tala ko waa na oshilonga, nenge kutya ke ku hole, iifundja yowala. Tinda okukala wi itaala iifundja mbyoka, ngaashi owala to ka tinda okwiitaala iifundja kehe.

7. Gandja iiholelwa yomanyolo gamwe ngoka tage ku shilipaleke kutya Jehova oku ku hole.

⁷ Mombiimbeli omu na wo uumbangi owundji mboka tawu tu shilipaleke kutya Jehova oku tu hole. Pashiholelwa, Jesus okwa ti kaalanduli ye: “Omwa simana unene mu vule omanza ogendji.” (Mat. 10:31) Jehova okwa ti ye mwene kaantu ye kutya: “Otandi ku kankameke e tandi ku kwatha; otandi ku gamene notandi ku hupitha.” (Jes. 41:10) Ndhindhilika nkene omipopyo ndhoka dha yela nawa. Jesus ina tya ‘Otashi vulika mu kale mwa simana unene,’ na Jehova ina tya kutya, ‘Otashi vulika ndi ke ku kwathele.’ Pehala lyaashono, oya ti: “Omwa simana unene” nosho wo kutya, “Otandi ku kwatha.” Uuna wa ka adhika kuudhigu, e to kala wu na omalimbililo, omanyolo ga tya ngawo itage ke ku kwathela owala wu tye po hwepo, ihe otage ke ku kwathela wo wu kale wu shi kutya Jehova oku ku hole. Omanyolo ngoka oge li paushili. Ngele owa galikana nokutedhatedha kwaashoka, otashi ke ku kwathela wu popye oohapu ndhoka dhi li muJohannes gwotango 4:16, tadhi ti: “Otse otwa tseya ohole ndjoka Kalunga e yi na oku tu hola notwe yi itaala.”a

8. Oshike to vulu okuninga ngele omathimbo gamwe oho kala wa limbililwa ngele Jehova oku ku hole?

⁸ Ongiini ngele omathimbo gamwe, oho kala natango wa limbililwa ngele Jehova oku ku hole? Yelekanitha nkene wu uvite naashoka wu shi. Omaiyuvo ihagi inekelwa naanaa ngaashi iinima mbyoka yi li paushili, ihe ohole yaJehova oyoshili, ngaashi Ombiimbeli tayi tu longo. Ngele inatu itaala kutya Jehova oku tu hole, kungawo otatu ipwililikile uukwatya we mboka wa simanenena, ano ohole ye. — 1 Joh. 4:8.

DHILADHILA KOMBINGA ‘YOHOLE NDJOKA JEHOVA E KU HOLE NAYO’

9-10. Jesus okwa li ta popi kombinga yashike sho a popi oohapu ndhika, “Tate oku mu hole,” tadhi adhika muJohannes 16:26, 27? (Tala wo ethano.)

⁹ Otatu vulu okwiilonga oshindji kombinga yohole yaJehova mokutala kwaashoka Jesus a lombwele aalongwa ye sho a ti: “Tate oku mu hole.” (Lesha Johannes 16:26, 27.) Jesus ina popya oohapu ndhika opo ando a uvithe nawa aalongwa ye. Oshoka, oohapu ndhoka otadhi ulike kutya ka li ta popi kombinga yomaiyuvo gawo pompito ndjoka. Pehala lyaashono, okwa li ta kundathana kombinga yoshinima shimwe, ano egalikano.

¹⁰ Jesus opo owala a adhika a lombwele aalanduli ye kutya oye na okugalikana okupitila muye, ihe haku ye. (Joh. 16:23, 24) Osha li sha simana opo ya kale ye shi oshinima shoka. Konima yeyumuko lye, aalongwa otashi vulika ya li ya hala okugalikana kuJesus. Komeho gaayihe, Jesus okwa li kuume kawo. Otashi vulika ya li taya dhiladhila kutya molwaashoka okwa li e ya hole unene, ota ka pulakena komagalikano gawo, nota ka pula He e ya kwathele. Nonando ongawo, Jesus okwa ti kutya inaya dhiladhila momukalo ngoka. Omolwashike mbela? Oshoka, okwe ya lombwele a ti: “Tate oku mu hole.” Oshili ndjoka oyi li oshitopolwa shomalongo gOmbiimbeli gopetameko kombinga yegalikano. Tala kwaashoka shika tashi ti kungoye: Okupitila mokukonakona Ombiimbeli, owa tseya Jesus nokukala wu mu hole. (Joh. 14:21) Ihe ngaashi aalongwa yomethelemumvo lyotango, nangoye oto vulu okugalikana kuKalunga wu na einekelo, oshoka owu shi kutya ‘oku ku hole.’ Ethimbo kehe to galikana kuJehova, oho ulike kutya owu na eitaalo moohapu ndhoka. — 1 Joh. 5:14.

KALA WU SHI SHOKA HASHI KU NINGITHA WU KALE WU NA OMALIMBILILO

11. Omolwashike Satana ta ka kala a nyanyukwa, ngele otwa kala tu na omalimbililo kombinga yohole yaJehova?

¹¹ Mbela omalimbililo kombinga yohole yaJehova ohaga zi peni? Otashi vulika wu yamukule kutya ohaga zi kuSatana, na owu li mondjila kashona. Ondiyapoli otayi “kongo ngoka, te mu ninagula po.” (1 Pet. 5:8) Komeho gaayihe, ohole yaJehova oye mu inyengitha a gandje ekuliloyambo, oshinima shoka Satana a hala tu kale tu uvite inaatu gwana oku shi pewa. (Heb. 2:9) Ihe mbela ngele otwa kala tu na omalimbililo kombinga yohole yaJehova, olye ha mono mo uuwanawa? OSatana. Shimwe ishewe, mbela ehalo lyalye tali ka gwanithwa po, ngele otwa etha po okulongela Jehova? OlyaSatana. Tala kiineya yaSatana mbyoka ha longitha a kambadhale oku tu ningitha tu kale tu na omalimbililo kombinga yohole yaJehova. Paushili wo wene, Satana oye kee holike kuJehova. Sho osho ha kambadhala okulongitha limwe ‘lyomomakotokelo’ ge ogendji, e tu ningithe tu kale tu uvite kutya otse kaatu holike kuJehova nonokutya okwe tu ekelahi. (Ef. 6:11) Uuna twa ndhindhilike shoka omutondi gwetu ta kambadhala okuninga, otatu ka kala twa tokola toko ‘okukondjitha Satana.’ — Jak. 4:7.

12-13. Ongiini uulunde mboka twa thigulula tawu vulu oku tu ningitha tu kale tu na omalimbililo kombinga yohole yaJehova?

¹² Omalimbililo kombinga yohole yaJehova ohaga vulu okuza konzo yimwe ishewe. Oyini mbela? Uulunde mboka twa thigulula. (Eps. 51:5; Rom. 5:12) Uulunde owa ningitha aantu kaaya kale ye na ekwatathano nOmushiti. Owa yonagula wo omadhiladhilo gaantu, omitima dhawo nosho wo omalutu gawo.

¹³ Uulunde ohawu gumu omaiyuvo getu momukalo omwiinayi, nohawu tu ningitha tu kale tu uvite tu na ondjo, iimpwiyu, tu uvite inaatu gamenwa nokukala twa sa ohoni. Otashi vulika tu kale tu uvite ngawo, uuna twa yona eyono lya kwata miiti. Otashi vulika wo tu kale tu uvite ngaaka, molwaashoka otu shi kutya tse aalunde, ihe Jehova hasho nando a shita aantu ya kale ye uvite ngawo. (Rom. 8:20, 21) Ngaashi owala osheenditho shoka shi na etaiyela lya papa ihaashi vulu okulonga nawa ngaashi shi na okulonga, natse ihatu vulu okuninga iinima kutse yene pakuudha ngaashi twa li twa shitwa tu ninge, oshoka inatu gwanenena. Onkene itashi kumitha sho omathimbo gamwe hatu kala tu na omalimbililo kombinga yohole yaJehova. Ngele shoka osha ningwa, otwa pumbwa okudhimbulukwa kutya Jehova ‘oKalunga omunene nomukumithi, ngoka ha ulukile mboka ye mu hole ohole ihaayi lunduluka, nohaya gwanitha shoka a ti.’ — Neh. 1:5, yelekanitha NWT.

14. Ongiini okudhiladhila kombinga yekulilo taku vulu oku tu kwathela tu yande okudhiladhila kutya Jehova ke na esiku a kale e tu hole? (Aaroma 5:8) (Tala wo oshimpungu “Yanda ‘okufundjalekwa kuulunde.’”)

¹⁴ Odhoshili kutya omathimbo gamwe ohatu kala tu uvite inaatu gwana okukala tu holike kuJehova. Ihe uushili mboka kutya inatu gwana okukala tu holike kuJehova, owo hawu ningitha ohole yaJehova yi kale yi ikalekelwa. Jehova ke tu hole molwaashoka twe shi ilongela. Nonando ongaaka, ekulilo ohali dhimi po omayono getu, na Jehova okwa ninga elongekidho ndyoka molwaashoka oku tu hole. (1 Joh. 4:10) Dhimbulukwa wo kutya Jesus okwa li e ya okuhupitha aalunde, ihe haantu mboka ya gwanenena. (Lesha Aaroma 5:8.) Kapu na nando ogumwe gwomutse ha vulu okuninga iinima momukalo gwa gwanenena, na Jehova iha kala a tegelela tu ninge ngawo. Uuna twe shi uvu ko kutya okwaagwanenena kwetu ohaku vulu oku tu ningitha tu kale tu na omalimbililo kombinga yohole yaJehova, ohashi tu kwathele tu kale twa tokola toko oku ku kondjitha, opo kaaku kwate ko omadhiladhilo getu. — Rom. 7:24, 25.

HOGOLOLA OKUKALA OMUDHIGININI

15-16. Uushili wuni tu na, ngele otwa kala aadhiginini kuJehova, nomolwashike? (2 Samuel 22:26)

¹⁵ Jehova okwa hala tu ninge omatokolo gomondjila ‘mokudhama muye.’ (Deut. 30:19, 20) Ngele otwa ningi ngawo, otatu vulu okukala nuushili kutya ota ka kala aluhe omudhiginini kutse. (Lesha 2 Samuel 22:26.) Shampa owala tu li aadhiginini kuJehova, otatu vulu oku mwi inekela e tu kwathele momathimbo kehe omadhigu ngoka tage tu adha monkalamwenyo yetu.

¹⁶ Ngaashi twe shi kundathana, otu na etompelo kehe lyokukala twa ngungumana sho tatu taalele omaudhigu. Otu shi kutya Jehova oku tu hole note ke tu kwathela aluhe. Shoka osho Ombiimbeli tayi longo. Ngele otwa ka adhika komalimbililo kombinga yohole ye, otatu vulu okudhiladhila kombinga yaashoka tu shi kombinga yohole yaJehova, pehala lyokugandja eitulomo kombinga yankene tu uvitile ohole ye. Natu kale tu na einekelo lyi ikolelela koshili yOmbiimbeli kutya ohole yaJehova ihaayi lunduluka otayi kala sigo aluhe.