Saweeriwa ti Arummwa
25 Voocharela, amalinhe mahiku mararu aphin’ye oprovinsiya ni avahiwe omwene, Festu aawela o Kaisareya ayaaka o Yerusalemu. 2 Ahooleli a alipa a mukucho ni alopwana oocicimiheya a Ayuta yaamusomela Paulo wa yoowo. Mwawiihiiha awo yaapacerya omveka mootitelela Festu 3 wi aweemererye omukookiherya Paulo o Yerusalemu. Nto yoolakelela aya waari omwiipithela Paulo mphironi wi emwiiphe. 4 Nyenya, Festu aawaakhula wi Paulo aaphwanela otitelela okhala mukariposo o Kaisareya nave wi yoowo mwaneene aahaala okookelawo moohilekela. 5 Owo aaloca ariki: “Vano, ekhuruwe vamoha ni miyo ahooleli anyu nave yamusomele, waakhanle wi mulopwana owo oheera echu yoonanara.”
6 Mwawiihiiha, evinre mahiku mathanu namararu naari khumi ari ni yaawo, owo aakhuruwela o Kaisareya, mmeeloni mwaya aakiraathi mu nipuro noothoriha, alamulela wi aruuhiwe Paulo. 7 Vaavaa aavolonweiye, Ayuta yaawo yaakhurunwe orweela o Yerusalemu yaamurukurerya, enamusomela ni ichu sincipale itokotoko seiho yahaaweryaaya ovaha sawooniherya.
8 Nto Paulo aahiisaakiha ni masu ala: “Nkichekenle Nlamulo na Ayuta naari empa ya Muluku, naari nkimuchekenle Kaisara.” 9 Festu, achunaka waahakalaliha Ayuta, aamwaakhula Paulo ii: “Onnachuna owela o Yerusalemu wi wathorihiwe weiwo vamiithoni vaka, vooloca sa ichu seiha?” 10 Nto Paulo aahaakhula ariki: “Keemenle va nipuro noothoriha na Kaisara, kinaphwanelaaka othorihiwavo. Nkeenre echu yoonanara wa Ayuta, ntoko nyuwaano munasuwelaanyu phaama. 11 Waakhanle wi chiryene kamulipa a wiipha nave koheera echu yoophwanela wiiphiwa, nkinakhooca okhwa; nyenya waakhanle wi ichu alopwana ala anakisomelaayano hisaano mathipelo, haavo orino ophwanelela wa okiveleela wa yaawo. Kinaveka oya wa Kaisara!” 12 Voocharela, Festu amanle oloca nnikhuuru na anamiruku, aahaakhula ariki: “Ovenke oya wa Kaisara, wa Kaisara onamuyawo.”
13 Evinre mahiku vakhaani, mwene Akripa ni Pernise yaaphiya erwaaka o Kaisareya wi emulocele Festu. 14 Woona wi yaahaala omalihawo mahiku mancipale weiwo, Festu aamuleela mwene mwaha wa Paulo, ariki:
“Ookhala mulopwana Felix omuhin’yeiye mukariposo; 15 vaavaa kaaryaaka o Yerusalemu, ahooleli a alipa a mukucho vamoha ni atokweene a Ayuta, yaakileela vooloca sa yoowo nave ekiveka wi kimuthorihe ni omphwanyerya nthowa. 16 Nyenya kaawaakhula wi tahi meerelo a Aroma omveleela muchu ahipacenre toko okumana ni yaale amusomenle ethoi ni ethoi wi akhaleno ekari ya wiisaakiha osomeliwa wawe. 17 Mwawiihiiha, vaavaa yaaphin’yaaya wenno, moohilekela nihiku noocharela kaakiraathi mu nipuro noothoriha, kilamulela wi aruuhiwe mulopwana owo. 18 Vaavaa alipa oomusomela yaavinnyaaya wi eloce, hiyaalonce ichu soonanara seiho kaanyiheryaaka vooloca sa yoowo. 19 Awo pahiru yaarino ovaanyihana vooloca sa malapelo aya* ni vooloca sa mulopwana awiichaniwa Yesu, yoowo okhwile, nyenya Paulo anatitelela oloca wi owo mukumi. 20 Kihisuwelaka mukhalelo wa omaliha ovaanyihana wuuwu, kaamukoha yoowo waakhanle wi aahaala osiveliwa oya o Yerusalemu wi athorihiwe weiwo vooloca sa miyaha seiha. 21 Nyenya, vaavaa Paulo aavenkeiye wi atitelele okhala mukariposo aweheryaka yoolakelela ya Akustu,* kaalamulela wi akhale mu kariposo ophiyerya kimveleenle wa Kaisara.”
22 Mwawiihiiha, Akripa aaloca wa Festu: “Kinnachuna kinwiriyanne mulopwana yoowo.” Festu aahi: “Omeelo onamunwiriyana.” 23 Mwawiihiiha, mmeeloni mwaya Akripa ni Pernise, yaarwa yoonihaka otokweene aya woothene, evolowa mu nipuro na mithukumano, vamoha ni ahooleli aanakhoco ni alopwana oovuwa a epooma; vaavaa Festu aalamulenleiye, Paulo aaruuhiwa. 24 Festu aahi: “Mwene Akripa ni achu oothene muri vaava, munnamoona mulopwana ola yoowo muloko woothene wa Ayuta okiveenkaaya wenno naari o Yerusalemu, okhuwelaka wi hanaphwanela okhala mukumi. 25 Nto kaahiiwexexa wi ola henreno echu yoophwanela wi akhwe. Mwawiihiiha, vaavaa mwaneene owo aavenkeiye okerihiwa wa Akustu, kaalakelela omurumiha. 26 Nyenya miyaano nkaano echu ya waarepela Apwiya aka vooloca sa yoowo. Mwawiihiiha, koomuruuha vamiithoni vanyu, xaxaxa wa nyuwo Oocicimiheya, Mwene Akripa, wi mmanle omukoha, kikhaleno echu ya orepa. 27 Vawi tahi yaphaama wa miyo omurumiha mulipa oophariwa kihilonce tho mwaheene.”