Ester

8 Nihiku nenle, Mwene Asuweru aamvaha Ester, mwaara a mwene empa ya Hamani, mwiicani a Ayuta. Nave Mortekayi aaphiya vamiithoni va mwene, woona wi Ester aahuupulula wi owo aari mmusi awe. 2 Vanonto, mwene aamurula muneela awe a sineti, yoowo aari ni Hamani nave aamunnya Mortekayi. Nave Ester aamunnyererya Mortekayi otokweene wa othokororya empa yeeyo yaari ya Hamani.

3 Ohoolo waya Ester aaya oloca ni mwene wanaawiili. Owo aakokhora va inaani sawe nave aninla avekaka wi mwene aviihevo yoonanara yeeyo yaatannyiwe ti Hamani a nloko na Akaki ni wi aviihevo yoolakelela awe ntakhara Ayuta. 4 Mwene aamuthoonya Ester ni ekopo awe yoomwene ya ooru, nave owo aavinya eemela vamiithoni va mwene. 5 Owo aahi: “Mwasiveliwa mwene, wakhala wi koophwanya mahala vamiithoni vanyu, yakhala yoophwanelela wa nyuwo mwene, nave waakhanle wi munnasiveliwa ni miyo, nipakiwe nlamulo wi ixipihiwe ikaarata sa Hamani, mwaana a Hametati, a nloko na Akaki, seiho owo aarempeiye ni yoolakelela ya waatoloxa Ayuta mu iprovinsiya soothene sa mwene. 6 Kini kiwerye hai ovilela vawoona epahu yeeyo enahaala waamorela achu a nloko naka? Kini kiwerye hai ovilela va owoona ahima aka etoloxiwaka?”

7 Mwawiihiiha, Mwene Asuweru aahi wa Ester, mwaara a mwene ni wa Mortekayi Muyuta: “Koomunnyererya Ester empa ya Hamani, nave koolamulela wi athomeiwe vamwirini wa nthowa na yoolakelela awe ya waahiphela* Ayuta. 8 Vano murepe nlamulo mu nsina na mwene wi mwaakhaviherye Ayuta, ntoko munachunelaanyuvo nave mweeyerye eneneeryo ni muneela a sineti a mwene. Tiwi nlamulo nnarempwa mu nsina na mwene ni weeyeriwa eneneeryo ni muneela a sineti a mwene hinnaxipihiwa.”

9 Vano nto, nihiku na makhumi meeli nararu na mweeri waneeraru, ela tiwi, mweeri wa Sivani,* alipa oorepa a mwene yaahiichaniwa. Awo yaarepa soothene Mortekayi aalamulenleiye wa Ayuta, hiihaa ntoko wa ahooleli, alamuleli ni asitokweene a iprovinsiya, ovinyerya o Intiya ophiyerya o Itiyopiya, iprovinsiya nsana nimoha makhumi meeli nathanu napiili.* Ikaarata iho saarempwe echarihiwaka marepeliwo a eprovinsiya ti eprovinsiya ni mu elocelo ya nloko ti nloko, nave tho echarihiwaka marepeliwo ni mu elocelo ya Ayuta.

10 Mortekayi aarempe ikaarata mu nsina na Mwene Asuweru nave eeyerya eneneeryo ni muneela a sineti a mwene. Aarumiha ikaarata iho moorweela wa anamichaka yaawenle akavalo; yaari yaale yaawela akavalo oochimaka yaaphariheliwa mmuteko wa omwene. 11 Mu ikaarata seiha, mwene aahiweemererya Ayuta a ipooma soothene wi ethukumane ni waakiha ikumi saya. Nave tho yaahaala waakwasa, owiipha ni waatoloxa achu a maloko naari a iprovinsiya yaawo yaahaala waahiphela, ophitaanyerya athiyana ni anamwane, ni okuxa muhakhu aya. 12 Ela yaaphwanela weereya mu nihiku nimohamoha mu iprovinsiya soothene sa Mwene Asuweru, mu nihiku naneekhumi nararu na mweeri waneekhumi napiili, ela tiwi, mweeri wa Atar.* 13 Masu a mu ikaarata seiha yaaphwanela olaleiwa ntoko nlamulo mu iprovinsiya soothene. Yaaphwanela olaleiwa wa maloko oothene, wi Ayuta yiirehererye nihiku nenle wi yinle ikuhu wa amwiicani aya. 14 Moorweela wa nlamulo na mwene, anamichaka yaacimula mwawaakuveya, echimakaka, yaawenle akavalo yaaphariheliwa mmuteko woomwene. Nlamulo nno tho naalaleiwa o epooma yoolipihiwa yo Susani.*

15 Vano Mortekayi aapwahavo vamiithoni va mwene awanre soowara soomwene sooripelela ni saweela, aanwara tho korowa mutokweene a ooru ni yoowara yaphaamaxa yooxeerya; nave achu a epooma yo Susani* yaanakhuwela moohakalala. 16 Variyari va Ayuta waakhalavo otaphuwa,* ohakalala, ochapa ni ncicimiho. 17 Mu iprovinsiya soothene ni mu ipooma soothene, weiwo masu ni nlamulo na mwene saaphiyaayawo, Ayuta yaanahakalala, ochapa, opaka ifesta ni opuha. Nave achu ancipale a maloko makina yaaniiseera Ayuta, woona wi yaanawoova vancipale yaawo.