Yupu
15 Elifasi o Temani aahaakhula:
2 “Apwanne muchu a miruku aahaala waakhula ni masu a siiyo?*
Naari aahaala osareiha erukulu awe ni echeku ya makupa onakhumawo nsuwa?
3 Ovaanya ni masuru hiwaano muteko,
Nave oloca pahi honaphuriha echu.
4 Tiwi nyuwo munnaceecheiha omoova Muluku.
Nave munnavevula omulapa Muluku.
5 Woona wi yoocheka anyu ennooniherya yeeyo munalocaanyu,*
Nave nyuwo munnathanla masu oovyaka.
6 Eyano anyu ene ennoothorihaani, ohiya miyo;
Iyano sanyu sinnaweerelaani onamoona.
7 Apwanne nyuwo muri muchu oopacerya oyariwa,
Naari mwaayariwe miyaako ihaakumve okhala?
8 Akhweya munniiwa ovaanela woovitheya wa Muluku,
Naari ti nyuwaano pahiru murino miruku?
9 Tiheeni musuwenlaanyu hiyaano nihisuwenlaahu?
Tiheeni muniiwexexaanyu hiyaano nihiniwexexaahu?
10 Variyari vahu aakhalavo achu a ipwiini ni awuuluvala,
Achu awuuluvalaxa waapwaha apapa anyu.
11 Apwanne ohakararya wa Muluku honawaakhwanaani,
Naari masu ookurumuxa murima munaleeliwaanyu?
12 Nthowa taani murima anyu oryaaya wooturuwa,
Nave ntakhara heeni miitho anyu anaaryaaya ni esara?
13 Tiwi munnanyeenyeya ni* mwaneene Muluku,
Nave munnakumiha mwaano mwanyu masu si yaala.
14 Onaweryeya hai muchu okhala aweela murima,
Naari onaweryeya hai muchu ooyariwa ti muthiyana okhala awookololowa?
15 Onani! Owo hanaaroromela aweela awe murima,
Nave ophiyerya wi erimu heri yaweela vamiithoni vawe.
16 Hanka nto muchu oothanyeya ni ootakhala,
Muchu yoowo onawurya ohookololowa ntoko maahi!
17 Kinamooleelaani echu emoha, mukiwiriyane!
Kinamooleelaani yeeyo koonnaaka,
18 Yeeyo alipa a miruku aloncaaya, hiiha ntoko yiiwalaaya ni asitiithi aya,
Ichu seiho awo ahikhunwaaya.
19 Elapo yaavahiwe yaawo pahiru,
Nave variyari va yaawo haavinrevo namarwa.
20 Oonanara murima onnahoosiwa mahiku awe oothene,
Owo onnoona ekoi iyaakha soothene sa okumi awe.
21 Oruma wawoopiha onniiweya owaruni wawe;
Mu elukuluku ya murecele, alipa oohuhula* annamuhiphela.
22 Owo haneemererya wi onahaala okophola mweepiiphini;
Owo oothoriheliwa nlema.
23 Owo onnahuwahuwa aavyaka yoolya,* nave onnaloca: ‘Eri woowi?’
Owo onnasuwela phaama ene wi nihiku na epiiphi nohaacamela.
24 Sawuukhula ni osoosiwa murima sinnamoopopiha,
Iho sinnarwa wa yoowo ntoko mwene iireherenrye wi awanihe ekhoco.
25 Tiwi owo onnaviiha ntata nawe wi avaanyihane ni mwaneene Muluku
Nave onneererya omvaha mapokha* Aikuru Soothene;
26 Mwa wiikhoma, owo onnamuchimakela Muluku,
Ateenxe yawiisaakihano awe yoolimela ni yoolipa;
27 Owo tooneneva ethoi
Nave tho tooneneva eyuunu.
28 Owo onakhala mu ipooma ini ikhale milepe,
Mu ipa oni ohikhaliwekemo,
Seiho inahaala okhala maluku awuukeliwa.
29 Owo hareela, nave muhakhu awe hiwaaca,
Naari mano sookhalano sawe hisimwalamwalela veelaponi.
30 Owo harwa akophola wa epiiphi;
Owo onamukhala ntoko mwiri yoowo mirai* saya inavya ni mooro,
Nave owo onamucakanela ni nwiya wa mwaano mwa Muluku.*
31 Owo hanaphwanela ohuwela naari mano ororomela yeeyo ehirino muteko,
Tiwi yeeyo ehirino muteko ti yeeyo onahaaleiye waakhela;
32 Ela enamweereya nihaakumve ophiya nihiku nawe,
Nave mirai sawe hirwa iphuwa ithutu.
33 Owo onamukhala ntoko mwiri wa uuva yoowo sawiima saya imonre iri ikithi,
Nave ntoko mwiri wa asitona yoowo ithutu saya ivakaren’ye.
34 Tiwi nikhuuru na achu oonanara murima* ti noohiyara,
Nave mooro onamweeyela mixakala sa achu a makhwankwa.
35 Awo anarupala makacamiho nave anayara yeeyo eri yootakhala,
Nave erukulu aya ennakumiha soowoka.”