Liivuru Oopacerya a Matharihelo
15 Nave Tavite aatitelela opaka ipa sawe o epooma ya Tavite; owo tho aarehererya nipuro na Arka a Muluku eeparipari nave aaheemesa muxakala ntakhara Arka. 2 Tavite aaloca ariki: “Ahikhale ani amuteexe Arka a Muluku eeparipari voohikhala Alevi, woona wi Yehova ohaathanla yaawo wi emuteexeke Arka a Yehova nave elapeke muteko awe ilukuluku soothene.” 3 Voocharela, Tavite aahaathukumanya achu oothene a Isarayeli o Yerusalemu, wi aruuhiwe Arka a Yehova nave akuhiwe va nipuro owo aareherenryeiye ntakhara yoowo.
4 Tavite aathukumanya muyareriwo wa Aroni ni wa Alevi: 5 wa Akowatita, aakhalavo muhooleli Uriyeli ni asinnawe nsana nimoha ni makhumi meeli;* 6 wa Amerari aakhalavo muhooleli Asaiya ni asinnawe masana meeli ni makhumi meeli;* 7 wa Axersoni, aakhalavo muhooleli Yoweli ni asinnawe nsana nimoha ni makhumi mararu;* 8 wa muyareriwo wa Elisafa, aakhalawo muhooleli Simeya ni asinnawe masana meeli;* 9 wa muyareriwo wa Heporoni, aakhalawo muhooleli Eliyeli ni asinnawe makhumi mathanu namararu;* 10 wa muyareriwo wa Usiyeli aakhalawo muhooleli Aminatapi ni asinnawe nsana nimoha ni khumi napiili.* 11 Mwawiihiiha, Tavite aawiichana alipa a mukucho Satoki ni Apiyatare, ni Alevi Uriyeli, Asaiya, Yoweli, Samaiya, Eliyeli ni Aminatapi, 12 nave aaloca ni yaawo ariki: “Nyuwaano mwa ahooleli a imusi sa makholo anyu sa Alevi. Mwiiseelihe, nyuwaano ni asinninyu, nave mmuruuhe Arka a Yehova Muluku a Isarayeli mmukerihe o nipuro kireherenryaakavo wi akhalevo. 13 Woona wi ekwaha yoopacerya nyuwo himwaamutenxe, esara ya Yehova Muluku ahu yaahinnyahuwela, nthowa nawi hinaamvye ohoolela wawe.” 14 Mwawiihiiha, alipa a mukucho ni Alevi yaahiiseeliha wi emuruuhe Arka a Yehova Muluku a Isarayeli.
15 Voocharela, Alevi yaamukapaca Arka a Muluku eeparipari mmakhatani mwaya ni ikopo, hiiha ntoko Mose aalamulenleiye moorweela wa masu a Yehova. 16 Voocharela Tavite aaloca ni ahooleli a Alevi wi yaathanle asinnaya alipa awiipa wi yiipeke moohakalala, echarihaka ni ikaruma sa macipo: ikaruma sooruma, achakare ni apankwe.
17 Mwawiihiiha, Alevi variyari va nihimo naya akhalavo Hemani mwaana a Yoweli, Asafi mwaana a Perekiya ni Etani mwaana a Kusaiya, a emusi ya Merari. 18 Vamoha ni yaawo, yaakhalavo asinnaya a nikhuuru nanaawiili: Sakariya, Peni, Xasiyeli, Semiremoti, Xeyeli, Uni, Eliyapi, Penaiya, Maseiya, Matatiya, Elifelewu, Mikineiya, vamoha ni alipeleli a milako Opeti-etomi ni Xeyeli. 19 Alipa awiipa Hemani, Asafi ni Etani ti yaawiipa apankwe a enyacu; 20 Sakariya, Asiyeli, Semiremoti, Xeyeli, Uni, Eliyapi, Maseiya ni Penaiya yaaniipa ikaruma sooruma saafinaariwe o Alamoti;* 21 nave Matitiya, Elifelewu, Mikineiya, Opeti-etomi ni Xeyeli ni Asasiya yaanawiipa achakare awaafinaariwa o Seminiti* elapaka ntoko ahooleli. 22 Kenaniya, muhooleli a Alevi, taavareryela oteexiwa wa Arka, woona wi aaniiwexexa sa oteexiwa wa Arka. 23 Nave Perekiya ni Elikana ti yaari alipeleli a milako ntakhara Arka. 24 Alipa a mukucho Sepaniya, Yosafati, Nataniyeli, Amasayi, Sakariya ni Penaiya, ni Eliyeseri ti yiipa mapenka moovuwa variyari va Arka a Muluku eeparipari, nave Opeti-etomi ni Yehiya ti yaarumeela tho ntoko alipeleli a milako ntakhara Arka.
25 Voocharela, Tavite ni asitokweene a Isarayeli vamoha ni ahooleli a makhuuru ncikhwi, yaaya vaate va Opeti-etomi ehakalanle wi emukuxe Arka awaataana a Yehova. 26 Vaavaa Muluku eeparipari aakhavihenryeiye Alevi yaawo yaamuteexa arka awaataana a Yehova, awo yaavaha mukucho imope seelopwana thanu napiili ni ipucepuche seelopwana thanu napiili. 27 Tavite aawara yoowara yahaarino miwono ya ekuwo yoovyavyaala, hiiha ntoko Alevi oothene yaawo yaamuteexa Arka, vamoha ni alipa awiipa ni Kenani muhooleli a omuteexa Arka ni a alipa awiipa. Tavite aanwara tho eefoti a eliinyu. 28 Aisarayeli oothene yaanamuhoola Arka awaataana a Yehova ekhuwelaka moohakalala ewoopaka a pusina, mapenka, apankwe, yiipaka moovuwa ikaruma soovuwa vamoha ni achakare.
29 Nyenya vaavaa Arka awaataana a Yehova aaphin’yeiye o epooma ya Tavite, Mikali mwaana amwaamuthiyana a Sawuli, aaweha va exanela nave amoona Tavite iinaka moohakalala ni ochapela.