2 Yohani

1 Mulopwana awuuluvala,* wa muthiyana oothanliwa ni wa anamwane awe, yaawo kinaasivelaaka mweeparipari, ohiya pahiru yoomi, nyenya tho oothene yaawo asuwenle eparipari, 2 wa nthowa na eparipari yeeyo enatitelela okhala mwa hiyo nave eni ekhale ni hiyo okhala wookhala. 3 Enarwa ekhala ni hiyaano mahala matokweene, ikharari, ni murecele woorweela wa Muluku Atiithi ni woorweela wa Yesu Kristu, Mwaana a Atiithi, vamoha ni eparipari ni osivela.

4 Koohakalala vancipale osuwela wi anamwane anyu akina anneeca mu eparipari, hiiha ntoko naakhenlaahu malamulo oorweela wa Atiithi. 5 Vano muthiyana, kinnooveka wi nisivelaneke mukina ni mukhwaawe. (Nkinoorepela nlamulo mvyaani, nto nenle nryaahuno ovinyerya woopaceryani.) 6 Nave osivela wene ti wu: Wi nititelele weeca mwawiiwanana ni malamulo awe. Nlamulo nene ti nla, hiiha ntoko mwiiwalaanyu ovinyerya woopaceryani: Nyuwo munaphwanela otitelela weeca mu osivela. 7 Tiwi, alipa oowoka ancipale aasareya mweelaponi, yaawo ahineemererya wi Yesu Kristu oorwa mwa mwiili. Awo alipa oowoka ni awiiseera kristu.

8 Mukhaleno ephoole wi muhiyeleele ichu seiho nipankaahu moorweela wa muteko wakuru, nyenya wi mwaakhele nchuwelo nawaakhwanela. 9 Oothene yoole onapwaha mphimo mmahusiheryo a Kristu nave ahinatitelela mwa seiho, haano Muluku. Yoowo onatitelela mmahusiheryo yaala, ti yoowo orino Atiithi vamoha ni Mwaana. 10 Wakhala wi muchu oorwa wa nyuwaano nave ahiruuha mahusiheryo yaala, muhimwaakhele vaate vanyu, naari mano omulocela. 11 Tiwi, yoole onamulocela, onnuukano miteko sawe soonanara.

12 Naamwi kirinono ichu sincipale sa woorepelaani, nkinachuna weerano va epapeli ni etinta, nto kinnaweherya wooxekuryaani wi niloce noonanaka, wi ohakalala wanyu okhale wawaakhwanela.

13 Anamwane a murokoraa, oothanliwa, annoovonyerya mooni aya.