Yupu
10 “Kinnathanya okumi aka!
Kinamulocaka sa osoosiwa wa murima aka.
Nkikhuwaka sa wiikhupanyerya waka.
2 Kinamuloca wa Muluku: ‘Muhikivahe nthowa.
Mukileele ntakhara heeni munakithorihaanyu.
3 Apwanne munnaphuravo echu moorweela wa okihooxa,
Othanya muteko wa matata anyu,
Muniiha mweemereryaka miruku sa achu ootakhala?
4 Wakhweya murino miitho oomuchu,
Naari munoona hiihaa ntoko muchu onooneiye?
5 Apwanne mahiku anyu analikana ni mahiku aachu,
Naari iyaakha sanyu inalikana ni sa muchu,
6 Wi muneererya ophwanya yoohesa aka
Ni otitelela waavya yoocheka aka?
7 Moosuwela wi nkaano nthowa;
Nave haavo onawerya okoopola mmatani mwanyu.
8 Mata anyu takuupale ni okipaka
Nto vano, munachuna okitoloxa moomalela.
9 Khwoo, muupuwele wi mukumpe ni oloko,
Nto vano munnakikookiherya onchupini.
10 Apwanne himukimiinne ntoko eleite*
Ni okeeka ntoko ekeixu?
11 Nyuwo mookiwariha nrapala* ni ethayi,
Nave mookivathaanya ni makhuva ni misiphe.
12 Nyuwaano mookivaha okumi nave mookooniherya osivela woororomeleya,
Nave ni othokororya wanyu, mookhapelela munepa* aka.
13 Nto moovitheya, mwaalakelela weerano ichu seiha.*
Koosuwela wi ichu seiha inarwa wa nyuwo.
14 Kaachenke, nyuwaano mwaahaala okoona,
Nave himwaahaala olevelela yoohesa aka.
15 Waakhanle wi kookhalano nthowa, kootakhaliwa!
Nave naamwi kihirino nthowa, nkinawerya oviiha muru aka
Tiwi kootepa wuuliwa muru nave koosareya makacamiho.
16 Wakhala wi kooviiha muru aka, munnakisaya ntoko mwaco
Nave munnuuluula wooniherya owerya wanyu wa miyo.
17 Munnaaruuha anamoona avyaani wa miyo
Nave munnakhala oonyeenyeyaxa ni miyo,
Vaavaa makacamiho anaamviraaya ekirweelaka.
18 Vanonto ntakhara heeni mwaakikuminhaanyu mmirimani mwa amama?
Waamureeravo kaakhwile, ahikhanle okoonne.
19 Yaahaala okhala ntoko wi nkintonko okhala;
Kaaya ovirela khwili weiwo kiyaaka o mahiye.’