Ruti
1 Mmahiku athoriha yaalamulelaaya, yaachoowa etala mweelaponi; nave mulopwana mmoha aacimula o Petelehemu o Yuta, aya amaka ntoko namarwa elapo yo Mowape, owo vamoha ni amwaariye ni anamwane awe apiili aasilopwana. 2 Mulopwana owo iichaniwa Elimeleki,* amwaariye yiichaniwa Nowemi,* nave masina a anamwane awe apiili yeeriwa Maloni* ni Kiliyoni.* Awo yaarwenle o Efrata, ela tiwi, o Petelehemu o Yuta. Awo yaaphiya elapo yo Mowape nave emaka weiwo.
3 Evinrevo elukuluku, Elimeleki, aiyawe Nowemi, yaahikhwa, nave owo ahala ni anamwane awe apiili aasilopwana. 4 Ohoolo waya, anamwane ale yaahaathela athiyana o Mowape: Mmoha iichaniwa Orpa nave mukina iichaniwa Ruti. Awo yaakhala weiwo echu ya iyaakha khumi. 5 Voocharela anamwane ale eeli, Maloni ni Kiliyoni, yaahikhwa tho, nave Nowemi aahala meekheiye ahirino anamwane awe eeli ni aiyawe. 6 Mwawiihiiha, Nowemi ni asaara a anaawe* yaacimula o elapo yo Mowape, woona wi nlelo ari o Mowape aahiiwa wi Yehova ohaakookela achu awe, aavahaka yoolya.*
7 Owo aacimula o nipuro nenlo aakhaleiyewo vamoha ni asaara a anaawe eeli. Vaavaa yeecaaya mphironi ekookelaka elapo ya o Yuta, 8 Nowemi aahiloca wa asaara a anaawe ariki: “Mukooke, mmoha ti mmoha akookele wa amamaawe. Yehova awooniheryeeni osivela woororomeleya, hiiha ntoko nyuwo moonihenryaanyu wa asiiyanyu akhwile vamoha ni miyo. 9 Yehova oovaheeni wiichuuwa,* mmoha ni mmoha veechokoni vawe ni aiyawe.” Voocharela owo aahaavaha epeexu, nave awo yaapacerya wunla vatokotoko. 10 Awo yaatitelela oloca wa yoowo eriki: “Hooye, nnahaala oya ni nyuwaano wa achu anyu.” 11 Nto Nowemi aaloca: “Mukooke, anaaka. Ntakhara heeni mwaahaalaanyu okichara? Apwanne nlelo kinanwerya waayara anamwane yaawo yaahaala okhala asiiyanyu? 12 Mukooke, anaaka. Muroweke, tiwi kootepa wuuluvala wi kitheliwe. Naamwi kaarino ewehereryo ya otheliwa ohiyu yoola wa olelo ni waayara anamwane aasilopwana, 13 apwanne mwaahaala waaweherya ophiyerya yunnunwe? Mwaahaala okhala hiiha muhitheliwe mwaaweheryaka yaawo? Hooye anaaka, kootepa osooseya murima ni yeeyo eweenreeni, ntakhara ntata na Yehova nookirukunuwela.”
14 Awo yaahinla tho vatokotoko, nave voocharela Orpa aahaavaha epeexu asookora* awe acimula. Nto Ruti aawaakeelela. 15 Mwawiihiiha, Nowemi aahi: “Nkoona! Mukhwaa ookookela wa achu awe ni wa amuluku awe. Okooke vamoha ni yoowo.”
16 Nto Ruti aahi: “Muhikititelelihe wi koohiyeeni ni ohoocharaani, tiwi, weiwo munayaanyuwo miyo tho kinamuyawo, nave weiwo muneeraanyu mukonewo, miyo tho kinaya okona weiwo. Achu anyu eni ekhale achu aka, nave Muluku anyu oni akhale Muluku aka. 17 Weiwo muneeraanyu mukhwewo, kinahaala okhwa weiwo nave kinahaala ovithiwa weiwo. Yehova akilake ni okooniha ekoyi, yakhala wi echu ekina voohikhala okhwa yookimwalanya ni nyuwo.”
18 Vaavaa Nowemi oonneiye wi Ruti aamwaakeelela, owo aamaala oloca sa mwaha yoowo. 19 Nave oopiili yaatitelela mukwahaaya ophiyerya o Petelehemu. Vaavaa awo yaaphin’yaaya o Petelehemu, achu oothene a epooma yaahitikhina, nave athiyana yaanakoha: “Ola tahi Nowemi?” 20 Owo aanawaakhula athiyana ariki: “Muhikiichaneke Nowemi.* Mukiichaneke Mara,* ntakhara Aikuru Soothene ookiruuhela soohooxa mu okumi aka. 21 Kaakhalano soothene kivinyaka wenno, nto Yehova ookikookiha kihirino echu. Ntakhara heeni munakiichanaanyu Nowemi, aniiso tho ari Yehova okirukununwenle ni Aikuru Soothene okiruuhenle epahu?”
22 Ola waari mukhalelo Nowemi aakonkeiye arwaaka elapo yo Mowape vamoha ni mwaara a mwanawe o Mowape awiichaniwa Ruti. Awo yaaphin’ye o Petelehemu omapacereryo wa ohemphwa wa sevata.