Salmu

85 Mohooniherya mahala elapo anyu, khwoo Yehova;

Mohaakookiha anamwane a Yakopo yaawo yaakerihiwe wookapuroni.

 2 Moolevelela yoohesa ya achu anyu;

Moolevelela* soocheka saya soothene. (Selaha)

 3 Mookuphiha onanariwa wanyu woothene;

Nave moohiya esara anyu yoovarela.

 4 Muntikitherye wanaawiili,* khwoo Muluku a nivuluxo nahu,

Nave muhiye okhwipi ohisiveliwa wanyu ni hiyaano.

 6 Hamuneeriha okhala wanaawiili

Wi achu anyu ehakalale mwa nyuwo?

 7 Munooniherye osivela wanyu woororomeleya, khwoo Yehova,

Nave munivahe nivuluxo nanyu.

 8 Kinahaala owiriyana yeeyo Muluku eeparipari, Yehova, onaloceiye,

Woona wi owo onamulaleya murecele wa achu awe, wa yaale ari oororomeleya wa yoowo.

 9 Mweeparipari, nivuluxo nawe nri vakhiviru va yaale anamoova,

Wi ncicimiho nawe nikhaleke mu elapo ahu.

10 Osivela woororomeleya ni ororomeleya inamukumana;

Wookololowa ni murecele sinamvahana epeexu.

11 Ororomeleya onamphuwela veelaponi,

Nave wookololowa onahaala ovarerya vathi ovinyerya wirimu.

12 Aa, Yehova onamvaha yeeyo eri yaphaama,*

Nave elapo ahu enamwiimiha soohepha saya.

13 Wookololowa onamweecaka vamiithoni vawe

Nave onampaka ephiro wi Muluku achareke.