Salmu
Wiikhupanyerya wa Tavite, owo iipaleiye wa Yehova ntakhara masu a Kuxi, a nihimo na Penxami.
7 Khwoo Yehova Muluku aka, miyaano koochawela wa nyuwaano.
Mukivuluxe wa oothene yaale anakiikara nave mukoopole.
2 Mwaaheerano, awo anamukimwasanya* ntoko amwaco,
Ekiphare ahikhanlevo ookoopola.
3 Khwoo Yehova Muluku aka, waakhanle wi koohesa hiihaa,
Waakhanle wi koheera echu moohookololowa,
4 Waakhanle wi koomweerela yoonanara yoole okeerenle yaphaama,
Naari waakhanle wi koomwaakha mwiicani aka ichu sawe ohirivo nthowa,*
5 Vanonto mwiicani aka akiikare nave akiphwanye,*
Anyikalele vathi okumi aka
Nave eerihe wi ncicimiho naka ncakanele vanchupini. (Selaha)
6 Vinyani mu esara anyu, khwoo Yehova;
Muwane ni amwiicani aka yaawo ari oonyeenyeya;
Vinyani wi mukikhaviherye, nave mweerihe wi opakiwe wookololowa.
7 Maloko a achu yoorukureryeeni;
Nave nyuwo, ovinyerya o munyukhu anyu, munarwa mwaathoriha yaawo.
8 Yehova onamuthoriha maloko.
Mukithorihe, khwoo Yehova, mwawiiwanana ni wookololowa waka
Nave mwawiiwanana ni ororomeleya waka.
9 Khwoo, mmalihe saweera soonanara sa achu ootakhala,
Nto mwaatikitherye awookololowa murima; tiwi nyuwo mwa Muluku awookololowa, munaalikhela murima ni miyoonelo sawiiseelaxa.*
10 Muluku eyaakiho aka, mvuluxa a yaale ari awookololowa mmurimani.
11 Muluku muthoriha awookololowa;
Muluku onnalaleya othoriha* wawe mahiku oothene.
12 Wakhala wi muchu hanacharuwa, owo onnanola nlema nawe;
Owo onnareya munra awe nave onnarehererya.
13 Owo onnarehererya mavaka awe awiipha;
Owo onnarehererya mavaka awe oovarela.
14 Mmoone yoole onatannya sootakhala;
Owo onnarupala makacamiho nave onnayara sawootha.
15 Owo onnakaca nlici nave onniixiha;
Nto onnamorela mu nlici nene nenlo othimpeiye.
16 Makacamiho owo onatannyeiye enarwa ekookela vamuru vawe;
Nlala nawe nnarwa nimorela vamuruni vawe.
17 Kinarwa kimucicimiha Yehova wa nthowa na wookololowa wawe;
Kinarwa kiipa macipo oocicimihano* nsina na Yehova, Awiirimurimu.