Salmu
Wa muhooleli a macipo; ni ncipo nniichaniwa “Muhikitoloxe.” Salmu a Tavite. Mikitawu.* Vaavaa Sawuli aaruminheiye alopwana wi yawehereryeke empa ya Tavite,* wi emwiiphe.
59 Mukoopole wa amwiicani aka, khwoo Muluku aka;
Mukikhapelele wa yaale anakivinyerya.
2 Mukoopole wa achu aweera soonanara
Nave mukivuluxe wa achu a nlala.*
3 Nkoonani! Awo annakiipithela wi ekiphare;*
Alopwana akuru annakihiphela,
Nto ohiya wi kirimwaarukunuwela naari waachekela, khwoo Yehova.
4 Naamwi kihenre echu yoonanara, awo annachimaka nave anniirehererya wi ekiphare.
Mvinye ni okhuwela waka nave moone.
5 Woona wi nyuwo, khwoo Yehova, Muluku a anakhoco, muri Muluku a Isarayeli.
Murwe nave mwaalikhele yeeyo maloko anapakaaya.
Muhimmorele ikharari mmoharu mano a achu yaala oowoka aneera ichu sootakhala. (Selaha)
6 Awo annakooka waawiilakavo,
Annuuwa ntoko anapwa nave anneeceeca mu epooma.
7 Moone yeeyo enatekhuma* mwaano mwaya;
Iyano saya siri ntoko masipaatha,
Tiwi annaloca: “Taani oniiwa?”
8 Nto nyuwo, khwoo Yehova, munahaala waatheya yaawo;
Munamunyemula maloko oothene.
9 Khwoo Ikuru saka, kinamutitelela wooweheryaani;
Tiwi Muluku nipuro naka noochawelavo nookhapeleleya.*
10 Muluku yoowo onakooniherya osivela woororomeleya onamurwa wi akikhaviherye;
Muluku onamukeeriha woona ovoothiwa wa amwiicani aka.
11 Muhiwiiphe, wi achu aka ehicuwale.
Ni ikuru sanyu, muweerihe awo ohuwahuwa;
Mwaatolose, khwoo Yehova, eyaakiho ahu.
12 Awo eheiwe ni wiirumiha waya,
Wa nthowa na soocheka sa mwaano mwaya, na masu a mu iyano saya,
Wa nthowa na wuulumela ni wootha yoowo awo analocaaya.
13 Mwaamalihe yaawo mu esara anyu,
Mwaamalihe yaawo, wi ehikhaleru tho;
Nweerihe awo osuwela wi Muluku tonalamulela variyari va Yakopo ni ophiyerya weiwo elapo ekotenlaayawo. (Selaha)
14 Awo ekooke wiilakavo;
Yuuwe ntoko anapwa nave yeeceece mu epooma.
15 Awo ehuwahuwe yaavyaka echu ya olya,
Ehivone naari mano ophwanya nipuro na wiichuuwavo ohiyu.
16 Nto miyo, kinarwa kiipa vooloca sa ikuru sanyu;
Wooxixelo kinamuloca moohakalala sa osivela wanyu woororomeleya.
Woona wi nyuwo muri nipuro naka noochawelavo nookhapeleleya
Nave nipuro nenlo kinachawelaakawo vaavaa kinahoolelaaka sawuukhula.
17 Khwoo ikuru saka, kinarwa kiwiipelaani macipo oocicimiha,*
Woona wi Muluku nipuro naka noochawelavo nookhapeleleya, Muluku yoowo onakooniherya osivela woororomeleya.