Salmu
Masikili.* Salmu a Asafi.
2 Kinamuhula eyano aka wi kiloce nsiposipo.
Kinamuthariha masu oosiphela a mu ilukuluku sakhalai.
3 Ichu seiho niiwalaahu ni nsuwenlaahu,
Seiho makholo ahu anitharihenlaaya,
4 Hinikhuwa wa anamwane aya;
Nnamuthariha wa muyareriwo woocharela
Saweera soocicimiheya sa Yehova ni ikuru sawe,
Ichu sootikhiniha seiho owo onapakeiye.
5 Owo ootikitherya onamoona* mwa Yakopo
Nave ootikitherya nlamulo mwa Isarayeli;
Owo aahaalamulela makholo ahu
Wi yaasuwelihe ichu seiha anamwane aya,
6 Wi muyareriwo woocharela osuwele seiha,
Anamwane yaawo yaahaala oyariwa.
Voocharela, awo yaahaala waatharihela seiho anamwane aya.
7 Mwawiihiiha, ala yaahaala okuha nroromelo naya mwa Muluku.
Hiyaahaala ocuwala miteko sa Muluku,
Nto yaahaala wiiwelelaka malamulo awe.
8 Mmukhalelo yoola, awo hiyaahaala okhala ntoko makholo aya,
Muyareriwo wa wiikhoma ni woomwaryeya,
Muyareriwo wa murima woohitikitheryeya,*
Nave yoowo wahaamuroromenle Muluku ni murima woothene.
9 Aefarayimu yaari ooreheryeya ni minra saya,
Nto yaakookela muculi mu nihiku na mukhico.
10 Awo hiyaakhapelenle nlakano na Muluku
Nave yaakhooca weeca mu nlamulo nawe.
11 Awo tho yaacuwala seiho owo eenreiye,
Miteko sawe sootikhiniha seiho owo aawoonihenryeiye.
12 Owo aapaka ichu sootikhiniha vamiithoni va makholo aya,
Mu elapo yo Yikuputu, makupa o Sowani.
13 Owo aakawanya ephareya wi awo elapuwe
Nave aheeriha maahi weemela ntoko ixiri.
14 Othana owo aanaahoolela nneeku,
Nave ohiyu woothene ni omwaleela wa mooro.
15 Owo aapwesa miyala mutakhwani
Nave owo aaweeriha owurya maahi ophiyerya ohikhalano nthanana, ntoko wi maahi awiixa.
16 Owo aheeriha mihice okhuma va mwala
Nave eeriha maahi ochimaka ntoko mihice.
17 Nto awo yaatitelela omuchekela,
Emmwareelaka Awiirimurimu mutakhwani.
19 Mwawiihiiha, awo yaanaloca wa Muluku,
Eriki: “Apwanne Muluku onanwerya orehererya meesa mutakhwani?”
20 Aari yoowo aamanne vamwala
Ophiyerya wi maahi yaakhuma nave eneeca.
“Apwanne owo tho onanwerya ovahererya epau
Naari ovahererya emece wa achu awe?”
21 Vaavaa Yehova awiiwaleiye, aanyeenyeya;
Mooro waavarela ntakhara Yakopo,
Nave esara awe yaanyahuwa ntakhara Isarayeli.
22 Woona wi hiyaarino nroromelo mwa Muluku;
Hiyaaroromenle owerya wawe wa waavuluxa.
23 Mwawiihiiha, owo aalamulela mahuruku wirimu,
Nave aahula masele a wirimu.
24 Owo aahimoriha mana, wi awo elye;
Aahaavaha yoolya ya wirimu.
25 Achu yaalya epau ya alipa oowerya;*
Owo aahaavahererya yoolya yawaakhwanela wi aahakalalihe yaawo.
26 Owo aaheeriha echeku ya makupa onakhumawo nsuwa woopa wirimu
Nave ni owerya wawe, aaheeriha echeku yoohico woopa.
27 Nave owo aahaamorihela emece ntoko nchupi,
Ipalame ntoko ehaava ya mphareya.
28 Owo aahaamorihela iho variyari va nipuro nookhalavo achu awe,
Orukurerya mixakala sawe soothene.
29 Nave awo yaalya ni yiipeliwa;
Owo aahaavaha yeeyo yaachunaaya.
30 Nto, ehakumve okhwaaniherya nchuno naya moomalela,
Nlelo yoolya eri mwaano mwaya,
31 Esara ya Muluku yaahaanyahuwela yaawo.
Owo awiipha achu a ikuruxa variyari vaya;
Aamoriha amiravo a Isarayeli.
32 Naamwi hiiha, awo yamvira emuchekelaka,
Nave hiyaarino nroromelo wa miteko sawe sootikhiniha.
33 Mwawiihiiha, owo aamaliha mahiku aya ntoko nwiya,
Nave aamaliha iyaakha saya ni epahu yootutuxa.
34 Nto, vaavaa ilukuluku soothene aawiipheiye, awo yaanamwaavya yoowo;
Yaanakookela muculi nave yaanamwaavya Muluku,
35 Yaanuupuwela wi Muluku aari Mwala aya
Nave wi Muluku Awiirimurimu aari Moopoli aya.*
36 Nyenya, awo yaaheererya onwoka yoowo ni eyano aya
Nave yaanaloca ichu sawootha wa yoowo ni nlumi naya.
37 Murima aya hiwaari wootikitheryeya mwa yoowo;
Awo hiyaari oororomeleya wa nlakano nawe.
38 Nto owo aari a ikharari;
Aanalevelela* yoohesa aya nave haatoloxa.
Wiiliwiili owo aanavareryela esara awe,
Ohiya wooniherya onanariwa wawe woothene.
39 Woona wi owo aanuupuwela wi awo yaari mwiili,
Echeku yeeyo enavira nave ehikooka.*
40 Mu ikwaha sincipale awo yaammwareela owo mu elapo yawuuma
Nave emuthananiha mutakhwani!
43 Mukhalelo oonihenryeiye ineneeryo sawe o Yikuputu
Ni sootikhiniha sawe makupa o Sowani,
44 Ni mukhalelo owo aatatunxeiye mihice mikhaani sa muhice Nilu okhala nikhami,
Ophiyerya awo ohiwurya maahi aya.
45 Owo aarumiha ikulihi sawaaca, wi saamwasanye*
Nave anaphulu wi yaatoloxe.
46 Owo aaperekha soolya saya wa misope sawoopiha,
Sawiima sa muteko aya wakuru wa muloko wa misope.
47 Owo aananariha miri saya sa uuva ni maralala
Nave mikuukhu saya ni epula ya maralala.
48 Owo aahiwiipha axinama aya ooteexa maphuta ni maralala
Nave aahiipha muhuwo aya ni overunya.*
49 Owo aahaavonyerya yaawo esara awe yoovarela,
Owali, onyeenyeya ni wuukhuwa;
Aahaarumihela makhuuru a ankeelo wi yaaruuhele epahu.
50 Owo aahooniherya esara awe.
51 Wookuchulani, owo aahiwiipha anamwane oothene oopacerya oyariwa o Yikuputu;
Sawiima soopacerya sa ikuru saya sa oyara, mmixakalani sa Hami.
52 Voocharela, owo aahiweeriha achu awe okhumawo ntoko muhuwo
Nave aahaahoolela ntoko ipuchepuche mutakhwani.
53 Owo aahaahoolela mookhapeleleya,
Nave awo hiyoovaru;
Ephareya yaahaamirya amwiicani aya.
54 Nave owo aahaaphiyiha mu elapo awe yaweela,
Makupa yaala a miyaako yaawo ntata nawe noolopwana naakunxaaya.
55 Owo aahiikara maloko vamiithoni vaya;
Ni mukoi woophimano aakawa yoohiyeryiwaaya variyari vaya;
Aatikitherya mahimo a Isarayeli mu ichoko saya.
56 Nto awo yaahititelela omwaakaaha* Muluku Awiirimurimu, emmwareelaka yoowo;
Awo hiyawiriyanne sawuupuxerya sawe.
57 Awo yaahuwela nave yaari oowoka ntoko makholo aya.
Hiyaari oororomeleya, ntoko munra wawuuca.
58 Awo yaanamunyeenyeiha ni mapuro aya oocukhuwa
Nave yaatannya esara awe ni soophwaniherya saya.
59 Muluku aahiiwa nave asarasareya,
Mwa yeeyo, aamukhooca Isarayeli moomalela.
60 Vookuchula, aamunyanyala tapernaakulu o Silo,
Muxakala yoowo owo aakhaleiyemo variyari va achu.
61 Owo aaheemererya wi eneneeryo ya ikuru sawe ekerihiwe wookapuroni;
Ni wi ncicimiho nawe nimorele mmatani mwa mwiicani.
62 Owo aahaaveleela achu awe wa nlema
Nave aanyeenyeya ni yoohiyeryiwa awe.
63 Amiravo awe yaahitoloxiwa ni mooro,
Nave wa asimwali awe hiyaarivo macipo a othela yiipiwa.*
64 Anamukucho awe yaahiiphiwa ni nlema,
Nave asaaraya hiyaawinlenle yaawo.
65 Voocharela, Yehova aahivinya ntoko wi aamukona,
Ntoko mukhoco yoowo aahapaliwe onavinya eviinyu emuukununwe.
66 Nave aahiwiikara amwiicani awe;
Owo aahaaveleela awo wa munyemu woohimala.
67 Owo aakhooca muxakala wa Yosefe,
Nave haathanlile nihimo na Efarayimu.
68 Nto aathanlile nihimo na Yuta,
Mwaako Siyoni, yoowo owo onasiveleiye.
69 Owo aapaka nipuro nawe naweela noolekela ntoko erimu;*
Ntoko elapo yavathi, yeeyo owo otikithenryeiye okhala wookhala.
70 Owo aamuthanla Tavite, mulapeli awe,
Nave aamviihawo o makholani wa ipuchepuche,
71 Weiwo aakhapeleleiyewo ipuchepuche seiho saamwiha;
Owo aamweera okhala mukukhula a Yakopo
Ni a Isarayeli, achu awe.
72 Owo aahaakukhula ni murima woororomeleya,
Nave aahaahoolela ni matata a mavyakelo.