Liivuru Oopacerya a Matharihelo
22 Tavite aahiloca: “Empa ya Yehova Muluku eeparipari, eni ekhale vaava nave altare a soovaha soopahiwa sa Isarayeli ani akhale vaava.”
2 Voocharela, Tavite aahilamulela wi ethukumanyiwe anamarwa yaawo yaakhala o Isarayeli, nave aahaavaha muteko ntoko alipa ookwasa maluku wi ekwaseke maluku ni orehererya wi etekiwe empa ya Muluku eeparipari. 3 Tavite aahivahererya mithipo sawaaca wi ipakiweno ipereko sa masele ni ikaruma sa okumanyano ichu, vamoha ni muchove wawaaca wahaawerya ophwimmwa. 4 Nave tho miri sa seetru sawaaca, woona wi achu o Sitoniyu ni o Tiru yaaruuha wa Tavite miri sa seetru sawaaca. 5 Tavite aaloca: “Mwanaka Solomoni mmiravo, nave haano mavyakelo, nave empa enahaala otekiwa ntakhara Yehova enaphwanela okhala etokweenexa wi ovuwa waya ni oreera waya osuweliwe mu elapo yoothene. Mwa yeeyo, kinampaka marehereryo ntakhara yoowo.” Mwawiihiiha, Tavite aarehererya ikaruma sincipale ahaakumve okhwa.
6 Vanonto, Tavite aamwiichana mwanawe Solomoni, nave amuleela wi ateke empa ntakhara Yehova Muluku a Isarayeli. 7 Tavite aahiloca ni mwanawe Solomoni: “Yoochuna aka yaari oteka empa ntakhara nsina na Yehova Muluku aka. 8 Nyenya, kaahaakhela masu oorweela wa Yehova eriki: ‘Weyaano wootepa oyeeha nikhami nave wootepa owana ikhoco. Mwawiihiiha, hoteka empa ntakhara nsina naka, woona wi vamiithoni vaka wootepa oyeeha nikhami veelaponi. 9 Nkoona! Weyaano onahaala okhalano mwaana nave oni akhale mulopwana a murecele,* kinammuvaha wiichuuwa wa amwiicani awe oothene oorukurerya! Woona wi nsina nawe nni nikhale Solomoni* nave mmahiku awe kinahaala omvaha murecele ni omaaleleya wa Isarayeli. 10 Ti yoowo onahaala oteka empa ntakhara nsina naka. Owo anarwa akhala mwanaka nave miyo kinarwa kikhala tiithi awe. Kinamutikitherya moolipa munyukhu wa olamulelo awe ntakhara Isarayeli okhala wookhala.’
11 “Vano mwanaka, Yehova akhale ni weyo nave okhumelele phaama wi oteke empa ya Yehova Muluku aa hiiha ntoko aalonceiye sa weyo. 12 Yehova oovahe miruku ni wiiwexexa vaavaa oneereiye oovahe olamulelo ntakhara Isarayeli, wi otitelele okhapelela nlamulo na Yehova Muluku aa. 13 Mwa yeeyo, onarwa okhumelela phaama wakhala wi onnachariha phaama ene* malakiheryo ni mathorihelo yaawo Yehova aamulamulenleiye Mose wi aavahe Aisarayeli. Okhale oolipa murima ni akuru. Ohikhale awoova naari awiiniwa murima. 14 Kohiilipixerya wi kirehererye ichu ntakhara empa ya Yehova, italentu macikhwi nsana nimoha sa ooru,* italentu milyawu mmoha* sa eparata vamoha tho ni muchove wawaaca ni mithipo seiho sihinawerya ophwimmwa. Koorehererya tho miri ni maluku, nyenya weyo onahaala wiimwaaceereryavo. 15 Weyaano wookhalano anamuteko ancipale: alipa ookwasa maluku, alipa ooteka, makarpinteru ni anamuteko oothene arino mavyakelo a miteko soohiyanahiyana. 16 Waaca wa ooru, eparata, muchove ni mithipo ti woohaalakhanyeya. Vinya ni opacerye muteko nave Yehova akhale ni weyo.”
17 Voocharela, Tavite aahaalamulela asitokweene oothene a Isarayeli wi emukhaviherye mwanawe Solomoni. Owo aaloca: 18 “Apwanne Yehova Muluku anyu hari ni nyuwo, nave hoovanheeni wiichuuwa wa amwiicani anyu oothene oorukurerya? Owo ookinnyererya achu a mweelapo yeela mmatani mwaka, nave elapo yeela enavareryeliwa ni Yehova vamoha ni achu awe. 19 Vano, mukhale oolakelela ni murima anyu woothene ni okumi* anyu woothene, omwaavya Yehova Muluku anyu nave mpacerye oteka nipuro naweela na Yehova Muluku eeparipari, wi nwerye omuruuha arka awaataana a Yehova ni ikaruma saweela sa Muluku eeparipari mukerihaka mu empa yeeyo eni etekiwe ntakhara nsina na Yehova.”