Ahepri
2 Ti nthowa nene oryaaya woochuneya othokororyaxa ichu niiwalaahu, wi nihirwe nihuwele. 2 Tiwi, wakhala wi masu alociwe moorweela wa ankeelo ahooniherya okhala eeparipari nave ochekela woothene ni ohiiwelela wohaakhela olaka mwawiiwanana ni ekhaikhai, 3 vano nni noopowe hai wakhala wi nookhooca ovuluxa otokotoko? Vawi Apwiya ahu ti yaapacenrye olokoha nave yaale yiiwale ni yoowo ti yaacicimihenrye wa hiyo, 4 aniiha Muluku aari ni yaawo mu weerela onamoona moorweela wa ineneeryo, sootikhiniha, miteko mincipale sakuru ni samahala sa munepa waweela saakaiwa mwawiiwanana ni yookhwela awe.
5 Vawi tahi ankeelo avahiwe olamulela elapo yavathi enoorwa, yeeyo nnalocaahu. 6 Nto nikupa nimoha, mukina onneerela onamoona wi: “Muchu pahi tiheeni wi nyuwo munamuupuwela, naari mwaana a muchu wi munamuthokororya yoowo? 7 Nyuwo moomuyeviha yoowo waapwaha ankeelo; moonwariha ovuwa ni ncicimiho, nave momvaha owerya wa olamulela miteko sa matata anyu. 8 Nyuwo moomvahererya ichu soothene vathi va inaani sawe.” Aamvaherenryeiye ichu soothene, Muluku haahin’yeru echu ahimunnyale yoowo. Vano, nlelo hannawerya woona ichu soothene ovahereryiweiye. 9 Nto nnamoona Yesu, yoowo aayevihiwe waapwaha ankeelo, vano awarihiwa ovuwa ni ncicimiho wa nthowa na ohooxeya ni okhwa, wi moorweela wa mahala matokweene a Muluku, owo alawihe okhwa ntakhara achu oothene.
10 Vawi, waari woophwanelela wi wa yoowo nave moorweela wa yoowo ichu soothene sikhanlaaya, mu waaruuha anamwane ancipale oncicimihoni, amwaakhwanihe moorweela wa soohooxa Muhooleli Mutokweene a ovuluxiwa waya. 11 Ntakhara yoole oneeliha, hiiha ntoko yaale aneelihiwa, oothene anarwa wa mmoha pahi, nave wa nthowa nenla owo hanuuliwa muru owiichana anna, 12 ariki: “Kinamulaleya nsina nanyu wa asinnaka; veeri va muloko kinarwa koocicimihaani ni macipo.” 13 Aaloca tho: “Kinarwa kikuha nroromelo naka mwa yoowo.” Nave tho aloca: “Kiri va! Miyo ni anamwane Yehova okivanheiye.”
14 Mwawiihiiha, woona wi “anamwane” ari achu a mwiili nnikhami, yoowo tho aahuukano ichu imohamoha, wi moorweela wa okhwa wawe, amvoothe yoole orino meerelo a oruuha okhwa, tiwi, Musaserya. 15 Wi aataphule* oothene yaale yaari akapuro mu okumi aya woothene wa nthowa na woova waya okhwa. 16 Tiwi, tahi chiryene ankeelo owo onaakhaviheryeiye, nto onakhaviherya muyareriwo* wa Aparahamu. 17 Wa nthowa nenla, waanakhweleya wi owo alikaneke ni “asinna” awe mmikhalelo soothene, wi akhale mulipa a mukucho mutokweene a ikharari ni ororomeleya mu ichu sa Muluku, wi avahe mukucho wooxipihano* soocheka sa nloko. 18 Woona wi yoowo mwaneene oohooxeya vaavaa eehiweiye, owo onnawerya wi aakhaviherye yaale aneehiwa.