Ahepri
8 Mwaha woochuneya nnalocaahu tuula: Nookhalano mulipa a mukucho mutokweene ntoko yoola, nave owo ookiraathi omoono woolopwana wa munyukhu wa Mutokweene wirimu; 2 owo murummwa* mu nipuro naweela ni mmuxakalani weeparipari, yoowo otekiwe ni Yehova nave ohiya ni muchu. 3 Tiwi, alipa a mukucho atokweene anathanliwa wi eveleeleke soovaha ni mikucho; mwawiihiiha, waari woochuneya tho wi mulipa a mukucho mutokweene yoola akhaleno echu yoovaha. 4 Waakhanle wi aari veelaponi yavathi, owo hi akhale mulipa a mukucho, woona wi aakhalavo alopwana anaveleela soovaha mwawiiwanana ni Nlamulo. 5 Alopwana ala anaphara muteko waweela ntoko yawooniherya ni muuruxi wa ichu sa wirimu; ntoko Mose, achunaka opaka muxakala, aahaakhela nlamulo na Muluku: Tiwi Owo aaloca: “Okhaleno ephoole wi opake ichu soothene mwawiiwanana ni mooneiho yoowo woonihiwaawe omwaako.” 6 Nto vano, Yesu ohaakhela muteko* waphaamaxa, woona wi owo tho mulipa awinnyererya waataana waphaamaxa opwaha ole wakhalai, yoowo otikitheryiwe mwawiiwanana ni soororomeliha saphaamaxa.
7 Waakhanle wi waataana ole woopacerya waari wawaakhwanela, hoki ochuneye waataana wanaawiili. 8 Tiwi owo aahaaphwanyera mathowa achu vaavaa aalonceiye ariki: “Yehova onnaloca: ‘Nkoonani! Anamphiya mahiku kineeraka kipake waataana wahiihaano ni empa ya Isarayeli ni empa ya Yuta. 9 Honi okhale ntoko waataana yoole kaapankaaka ni makholo aya, nihiku nenle kaakunxaaka ni ntata nave kaakumiha o elapo yo Yikuputu, woona wi awo hiyaakhapelenle waataana waka, mwawiihiiha kaamaala waathokororya,’ Yehova tonaloca.
10 “Yehova oni: ‘Ola waataana kineeraka kipake ni empa ya Isarayeli emanle ovira mahiku yaale. Kinamukuha malamulo aka mmuupuweloni mwaya nave kinamurepa mmurimani mwaya. Kinamukhala Muluku aya nave awo enarwa ekhala achu aka.
11 “‘Haavo oni amuhusiheke tho mukhweiye naari munneeni ariki: “Omusuwele Yehova!” Woona wi oothene enarwa ekisuwela, ovinyerya akhaani ophiyerya atokweene. 12 Tiwi kinamukhala aikharari vooloca sa meecelo aya ohookololowa nave nkirwa tho kuupuwela soocheka saya.’”
13 Alocaka “waataana wahiihaano,” owo oheeriha ole woopacerya okhala wakhalai. Nave yeeyo eri yakhalai ni yawuuluvala ehanle vakhaani ocakanela.