Ahepri
7 Tiwi Melikiseteki yoola, mwene o Salemu, mulipa a mukucho mutokweene a Muluku, aaya okumana ni Aparahamu, akookaka aakeleiye owiipha mamwene. Melikiseteki aamureeliha Aparahamu, 2 nave Aparahamu aamvaha* yaneekhumi ya soothene. Voopacerya, nsina nawe nnataphulela “Mwene a Ekhaikhai,” nave ohiya yeeyoru owo mwene o Salemu, ela tiwi, “Mwene a Murecele.” 3 Owo haano apapa awe, naari amama awe, naari makholo awe nave haano mapacereryo a mahiku awe naari makuchuwelo a okumi awe, nto onaphwanaphwana ni Mwaana a Muluku, vookhala mulipa a mukucho okhala wookhala.*
4 Moone otokweene wa mulopwana ola, naamwi Aparahamu ori nikholo nahu, aamvaha yaneekhumi ya muhakhu waphaama wookhoconi. 5 Mweeparipari, mwawiiwanana ni Nlamulo, yaale mwa anamwane a Levi anaakhela onamukucho aakhalano nlamulo na waakhela yaneekhumi ya achu, ela tiwi, yoorweela wa asinnaya, naamwi awo eri muyareriwo wa* Aparahamu. 6 Nto mulopwana yoola ahaari a nihimo na Alevi, aahaakhela yaneekhumi ya Aparahamu nave aamureeliha yoowo aapakiweno soororomeliha. 7 Vano hiwaavo ovaanya wi mukhaani onnareelihiwa ti mutokweene. 8 Alevi anaakhela yaneekhumi ti achu anakhwa; nto mulopwana mukina yoowo onaakhela yaneekhumi, soorepa sinnamweerela onamoona wi owo mukumi. 9 Nave enanwerya olociwa wi moorweela wa Aparahamu, ophiyerya tho Levi, yoowo onaakhela yaneekhumi, aaliva yaneekhumi, 10 woona wi owo nlelo aari muyareriwo wa muhoolo wa* nikholo nawe vaavaa Melikiseteki aamuthikirenryeiye yoowo.
11 Vano waakhanle wi ti wooweryeya ophwanya ophaameya moorweela wa onamukucho wa Alevi, (tiwi ola waari mukhalelo wa Nlamulo waavahiwa achu), apwanne waahaala okhala woochuneya okhalavo namukucho mukina, yoowo onalociwa wi toolikana ni Melikiseteki nave ohiya oolikana ni Aroni? 12 Woona wi onamukucho wootorokiwa, waari woochuneya tho otorokiwa Nlamulo. 13 Ntakhara mulopwana onalociwa wa ichu seiha orwiile mu nihimo nikina, wa nenlo haavo muchu ontonko olapa va altare. 14 Ti yawooneya wi Apwiya ahu arwiile mu nihimo na Yuta, nto Mose haalonceru echu sa alipa a mukucho orwa mu nihimo nenla.
15 Nave soothene iha sinnakhala sawooneyaxa vaavaa aakhumelenleiye mulipa a mukucho mukina oolikana ni Melikiseteki. 16 Yoowo okhanle mulipa a mukucho ohiya wa nthowa na nihimo owo orwiileiyewo mwawiiwanana ni nlamulo, nto wa nthowa na ikuru sa okumi woohuuca ovahiweiye. 17 Tiwi, wa yoowo onneereliwa onamoona wi: “Weyo wa mulipa a mukucho oohimala oolikana ni Melikiseteki.”
18 Hiihaa, nlamulo nakhalai noomala muteko, ntakhara ti nooceecheya ni noohiphuriha echu. 19 Tiwi, Nlamulo hineerinhe echu okhala yoophaameya, nyenya ovolowa wa ewehereryo yaphaamaxa yoheeriha yeeyo, nave moorweela wa yeeyo ninnamwaacamela Muluku. 20 Nave tho, woona wi ela hiyeeren’ye ohirivo olipela weeparipari 21 (eparipari wi aakhalavo alopwana yeeriwe alipa a mukucho ohirivo olipela weeparipari, nyenya ola okhanle mulipa a mukucho moorweela wa olipela weeparipari, weeriweno ni yoole aalonce ariki: “Yehova oolipela, nave harwa akookela muculi:* ‘Weyo wa mulipa a mukucho oohimala’”), 22 mwa yeela, Yesu tokhanleiye nlipiheryo* na waataana waphaamaxa. 23 Ohiya yeeyo, waari woochuneya wi ekhalevo alipa a mukucho ancipale wi eraceelaneke, ntakhara okhwa waanaahiiha wi etitelele mmuteko aya; 24 vano, woona wi owo onnatitelela okhala mukumi okhala wookhala, onamukucho awe honaraceeliwa. 25 Mwawiihiiha, owo onnawerya tho waavuluxa mwawaakhwanela yaale anamwaacamela Muluku moorweela wa yoowo, ntakhara owo onnakhala mahiku oothene wi aavekelele yaawo.
26 Vawi ti woophwanelela wa hiyaano okhalano mulipa a mukucho mutokweene yoowo ori oororomeleya, oohikhalano nthowa, aphaama, oohiyana ni alipa oocheka, ni oovuwihiwa opwaha irimu. 27 Moohiyana ni alipa a mukucho atokweene yaale, owo hanaphwanela ovaha mikucho nihiku ti nihiku, opacerya wa soocheka sawe nave voocharela wa soocheka sa achu, ntakhara oheerano yeela ekwaha emoha wa ilukuluku soothene vaavaa iiveleenleiye yoowo mwaneene. 28 Tiwi, Nlamulo ninnaathanla alipa a mukucho atokotoko alopwana yaawo arino sooceecheya, nto masu a olipela eeparipari eeriweno nivinre Nlamulo annamuthanla Mwaana, yoowo eeriwe awaakhwanela okhala wookhala.