Yupu
14 “Muchu ooyariwa ni muthiyana,
Okumi awe ti wookhuveya ni woosareya makacamiho.
2 Owo onnaphuwa ntoko ethutu, nave voocharela onnanyaala;
Owo onnachawa ntoko muuruxi nave onnacakanela.
3 Nyuwo munnakiweha mooluluwanya,
Nave munnakisomela.
4 Taani onawerya omukumiha muchu aweela* mwa muchu ooriipiheya?
Haavo onawerya!
5 Tiwi, mahiku awe aalakeleliwa,
Waaca wa miyeeri sawe iri mmatatani mwanyu.
Moompakela munlaano wi ahicuphe.
6 Muhiye omvarerya yoowo wi iichuuwe,
Ophiyerya akwaanxe nihiku nawe, hiiha ntoko namuteko onaamulapa.
7 Tiwi, ophiyerya tho mwiri wookhalano ewehereryo.
Wakwasiwa, owo onnaphuwela wanaawiili,
Nave mirai saya sinnatitelela wunnuwa.
8 Wakhala wi mitathaari saya sohuuluvala vachayani
Nave nikoco naya nikhwa vaavale,
9 Ni maahi vakhaani, owo onahaala ophuwela;
Nave onahaala okhalano mirai ntoko mwiri wahiihaano.
10 Nto muchu onnakhwa nave ikuru sawe sinnammalela;
Vaavaa muchu onahiyeiye omumula, owo onaya woowi?
11 Maahi annacakanela mphareya,
Nave muhice onnuuma cocoro.
12 Hiihaa tho muchu onnarupa nave ahivinya.
Ophiyerya erimu ehivinnyevo, owo harwa avinya,
Naari haviihiiwa mu ikhoveni mwawe.
13 Khwoo, kaamusiveliwa mwaakicukuchenre o Mahiye,*
Mwaakiipitinhe ophiyerya esara anyu evinre,
Mwaakivanhe elukuluku, nave voocharela mukuupuwelela!
14 Apwanne muchu akhwa, onanwerya okookela okhala mukumi?
Kinamuwehereryaka mahiku oothene a muteko aka woophareliwa,
Ophiyerya orwiile otaphuliwa waka.
15 Nyuwo munamwiichana, nave miyo kinarwa kiwaaakhulaani.
Munamukhalano munkhela wa* muteko wa matata anyu.
16 Nto vano, munnahocahoca manaani aka;
Munaavya pahi yoocheka aka.
17 Ochekela waka woomakiwa musaakhuni,
Nave nyuwo munnamara yoohesa aka ni ekoola.
18 Hiiha ntoko mwaako onapasuwaaya nave ophweeya,
Nave mwala ovinyavo vanipuroni vaya,
19 Hiiha ntoko maahi analalihaaya maluku
Nave maahi oorweela anawooraaya echaya,
Moolikana tho, nyuwaano munnananariha ewehereryo ya muchu.
20 Munnamvootha yoowo ophiyerya okhwa;
Munnatoroka omuchu awe ni omwiikara.
21 Anamwane awe annacicimihiwa, nto owo hanasuwela;
Awo anneeriwa ohikhala echu enevo, nto owo hanasuwelaru sa yeeyo.
22 Owo pahiru onoona wiicela vaavaa mwiili awe onakhalaaya mwa yoowo;
Owo pahiru oninla vaavaa onakhaleiye mukumi.”