Yupu
30 “Vano, amiravo akhaani okipwaha miyo annakitheya,
Yaawo asitiithi aya kaakhwatiihalaaka
Waavaha muteko wa owehererya muhuwo aka
Eri vamoha ni anapwa aka.
2 Ikuru sa matata aya hisaakiphurenle echu.
Ikuru saya saacakanela.
3 Awo aavelavela nthowa na ohaawa otokweene ni etala;
Annawena* yeeyo anaphwanyaaya mu elapo yawuuma,
Yeeyo yaari milepe ni yoohimakiwa.
4 Annavurula mmirai makukhu a maakha;
Yoolya aya mitathaari sa mvelo wa nakehi.
5 Awo anniikariwa mmukuma aya;
Achu annaweewulela yaawo ntoko ampava.
6 Awo anakhala museresere mwa muhice,*
Mmisuphani ni mmakhukuni.
7 Veeri va mapucho awo annakhuwela,
Nave annathukumana vamoha vathi va miri sa miiwa sa mutakhwani.
8 Awo anamwane a alolo ni yaale ahirino nsina,
Awo ahiikariwa* mweelaponi.
9 Nto vano, awo annakiphuca ophiyerya tho mmacipo aya;
Kookhala echu yoonyemuwa* wa yaawo.
10 Awo annakithanya nave annakirakamela;
Hanoovelela okitaphera mara wiithoni.
11 Woona wi Muluku ookaakha ikaruma saka soowanano* nave akiyeviha,
Awo hanoova vamiithoni vaka.
12 Awo annarwa omoono aka woolopwana ntoko muloko onachuna okihiphela;
Awo annakeeriha ochawa
Nave annaciya mphiro aka wi ekitoloxe.
14 Awo annaphiya ntoko wi avolonwe va nlaka ntokweene na exiri;
Awo annaphirikeya mu nipuro ntoloxiwe.
15 Woopopiha onnakirweela;
Ocicimiheya waka onnakuxiwa ntoko wi okuxiwe ni echeku,
Nave ovuluxiwa waka onnacakanela ntoko neeku.
16 Vano okumi aka onnayeeheya;
Mahiku a soohooxa annakiphwanya.
17 Wiicela onnapwexa makhuva aka* ohiyu;
Wiicela yoowo onakikhuura honamaala.
18 Yoowara aka ennacuchiwa ni ikuru itokweene;
Nave ennakihirikinya ntoko esiko ya yoowara aka.
19 Muluku ookirihela vancokwani;
Kikhala ntoko nchupi ni ecuurwa.
20 Kinnakhuwela wa nyuwo kivekaka nikhaviheryo, nto himunakaakhula;
Kinneemela, nto nyuwo munamoona okiweha.
21 Nyuwo mookirukunuwela moowali;
Nave munnakihiphela ni ikuru soothene sa mmatani mwanyu.
22 Munnakiviiha nave mukiteexa ni echeku;
Voocharela munnakirihela wu ni wu mu echeku etokweene.*
23 Koosuwela wi munamukikeriha wookhwani,
Empa yeeyo akumi oothene eneeraaya ekumanewo.
24 Nto haavo aahaala omuhiphela muchu yoowo omanlevo,*
Vaavaa owo onakhuweleiye avekaka nikhaviheryo variyari va epahu awe.
25 Apwanne nkaawunlenle yaale yaahoolela ilukuluku soovila?*
Apwanne nkaamoriwano ikharari oohaawa?
26 Naamwi kaawehererya yaphaama, yoonanara tephin’ye;
Miyaano kaawehererya omwaleela, nto epiiphi tephin’ye.
27 Otekhuma mpuwa mwaka honamaala;
Mahiku a sawuukhula aakirweela.
28 Kineeca kiri oohica ene; hiwaavo omwaleela wa nsuwa.
Kinneemela veeri va muloko wa achu nave kinnakhuwela kivekaka nikhaviheryo.
29 Miyo kookhala munna a anapwa a mutakhwani
Ni nthamwene a anamwane a avestruxi.*
30 Nrapala naka nooripa nave ninnamora;
Makhuva aka annavarela nthowa na oviha.*
31 Chakare aka onaphariheliwa pahiru ntakhara wiikhupanyerya;
Nave namviiro aka, ntakhara oruma wa winla.