Salmu
Wa muhooleli a macipo; ni ncipo nniichaniwa “Ekhomace ya Woosiiselo.”* Salmu a Tavite.
22 Muluku aka, Muluku aka, ntakhara heeni mukinyanyanlaanyu?
Ntakhara heeni muryaanyu ocai wa okivuluxa,
Ocai wa okhuwela waka wa othanana?
2 Muluku aka, kinnakhuwela variyari va nihiku, nave nyuwo hamunaakhula;
Nave variyari va ohiyu, nkinamaala owiichanaani.
3 Nto nyuwo mwa aweela,
Moorukureryiwa ni* macipo oocicimiha a Isarayeli.
4 Makholo ahu yaanakuha nroromelo naya mwa nyuwo;
Awo yaanoororomelaani nave nyuwo mwaanawoopola.
5 Awo yaanakhuwela wa nyuwo, nave yaanavuluxiwa;
Yaanoororomelaani nyuwo, nave hiyuuliheya muru.*
6 Nyenya miyo ka mwaanyuuku,
Ohiya muchu, achu annakiroha* nave muloko onnakinyemula.
7 Oothene yaawo anakoona annakiroha;
Awo hanakoonelamo nave annacikinya miru saya mwa munyemu eriki:
8 “Owo aamuroromenle Yehova. Vanonto Owo amoopole!
Owo amvuluxe, woona wi onnamusivela vancipale!”
9 Ti Nyuwo mukikuminhe mmirimani mwa amaayi,
Mukikhapelela vaavaa amama aka yaakaamwihaaya.
10 Kaahiveleeliwa wa nyuwo wi mukikhapelele ovinyerya vaava kaayariwaaka;
Ovinyerya mmirimani mwa amama aka, munnakhala Muluku aka.
11 Muhikhale ocai wa miyo, woona wi wuukhuwa ori vakhiviru,
Nave haavo muchu mukina wi akikhaviherye.
12 Imope sincipale ikhaani sookirica;
Imope sakuru seelopwana so Pasa sookirukurerya.
13 Iho sinnakaathamela miyo,
Ntoko mwaco onoopa murika nave onamwasanya* yeeyo ophanreiye.
14 Kinnayeehiwa ntoko maahi;
Makhuva aka oothene aakhuleya.
Murima aka ori ntoko epothi,
Onnatothowa mpuwa mwaka.
15 Ikuru saka sohuuma ntoko nivali na oloko;
Nlumi naka noopatela waalakutha.
Mookikeriha onchupini wa okhwa.
16 Tiwi, anapwa annakirukurerya;
Awo annakirica ntoko nikhuuru na achu ootakhala.
Ntoko mwaco, annahiphela matata aka ni inaani saka.
17 Kinanwerya waalakhanya makhuva aka oothene.
Amwiicani awo annakivarerya nave annatikitherya miitho aya wa miyo.
18 Awo annakawana soowara saka,
Nave anneeherya ehako malaya aka.
19 Nto nyuwo, khwoo Yehova, muhirakamele.
Nyuwo ti muri ikuru saka; murwe mwawaakuveya wi mukikhaviherye.
20 Mukivuluxe* wa nlema,
Moopole okumi aka wasisapo* mmatani mwa anapwa;
21 Mukivuluxe mwaano mwa mwaco ni mmanyakani mwa inari;
Mukaakhule nave mukivuluxe.
22 Kinamulaleya nsina nanyu wa annaka;
Veeri va muloko kinarwa koocicimihaani.
23 Nyuwo munamoova Yehova, mmucicimihe!
Muyareriwo* woothene wa Yakopo, omvuwihe!
Omoove, muyareriwo* woothene wa Isarayeli.
24 Tiwi owo hanyemunle naari ocuwala makacamiho a muchu oohooxiwa;
Hiipithinhe wa yoowo ethoi awe.
Vaava owo aakhuwenleiye ntakhara nikhaviheryo, owo aamwiiwa.
25 Kinarwa koocicimihaani mmuloko mutokweene;
Kinamwaakhwaniherya malakano aka vamiithoni va yaale anamoova yoowo.
26 Awiichacala enarwa elya ni evona;
Yaale anamwaavya Yehova enarwa emucicimiha yoowo.
Mpuhe okumi* okhala wookhala.
27 Achu oothene a veelaponi yavathi anahaala omuupuwela Yehova ni okookela wa yoowo.
Imusi soothene sa maloko inamukokhora vamiithoni vanyu.
28 Tiwi Yehova ti mwene;
Owo onnalamulela maloko.
29 Oothene yaawo ari ooreela* a veelaponi yavathi anahaala olya nave yuurame,
Oothene yaawo anakhuruwela onchupini anahaala okokhora vamiithoni vawe;
Haavo mmoha a yaawo onawerya okhapelela okumi awe.
30 Anamwane aya anammurumeela yoowo;*
Muyareriwo woocharela onamwiiwa vooloca sa Yehova.
31 Awo anamphiya nave anamulaleya wookololowa wawe.
Awo anahaala oloca yeeyo owo onapakeiye wa nloko nlelo nnahaala oyariwa.