Titu
3 Otitelele owuupuserya yaawo wi yaacicimiheke ni owiiwelela alamuleli ni mamwene, wi ekhale ooreheryeya wa miteko soothene saphaama, 2 ehaaloceke akina moonanara, ehikhale amaraapwa, nto ekhale ooleva, yooniheryaka okhala awiichacala ni achu oothene. 3 Tiwi hiyaano tho naari akhamiruku, oohiiwelela, naahuwelihiwa, akapuro a minkhela ni soochunachuna soohiyanahiyana, neera ichu soonanara nave naari anrima, oothanyeya, ni awiicana mukina ni mukhwaawe.
4 Nyenya, vaavaa yooniheryiwaaya mahala amvuluxa ahu, Muluku, ni waasivela wawe achu 5 owo aahinivuluxa, ohiya wa nthowa na miteko sawookololowa neenraahu, nyenya nthowa na ikharari sawe. Owo onivulunxe moorweela wa orapa oniruuhenle okumi ni weeriwa avyaani mwa munepa waweela. 6 Aahiichela mwawaaca* munepa yoola mwa hiyo, moorweela wa Yesu Kristu mvuluxa ahu, 7 wi nimanle weeriwa eekhaikhai moorweela wa mahala awe matokweene, nikhale mikelampa mwawiiwanana ni ewehereryo ya ekumi yoohimala.
8 Masu yaala toororomeleya, nave kinachuna wi otitelele ocicimiherya ichu seiha, wi yaale anamweemererya Muluku etitelele otikitherya muupuwelo aya mu weerano miteko saphaama. Ichu seiha ti saphaama ni samphurelo wa achu.
9 Nto osepe ovaanyihana woololo, waalakhanyerya masina a makholo akhalai, owanawana ni waakhulana vooloca sa Nlamulo, woona wi iho ti satheru nave hasinaphuriha echu. 10 Yoowo onatannya ohiiwanana,* omanle omulopola* ekwaha yoopacerya ni yanaawiili, osepe waataana ni yoowo, 11 osuwelaka wi muchu si yoowo oohuwela mu ephiro, onnacheka nave oniithoriha mukhateiye.
12 Vaavaa kineeraaka koorumihele Artema naari Tikiku, wiilipixerye orwa okixekurya o Nikopoli, woona wi koolakelela okhala weiwo elukuluku ya nakhutu. 13 Orehererye soothene sinachuneya wa Sena, yoowo ori oosuwela Nlamulo ni wa Apolu wi ehaathowe echu mmukwahani mwaya. 14 Nave tho achu ahu ehuserye okhala ooweiwa mmiteko saphaama, wi ekhaviherye wakhalavo othowa wawaakuveya. Nave hiiha ehikhale oohiphuriha echu.*
15 Oothene ari ni miyo annoovonyerya mooni aya. Waavahererye mooni aka yaale ananisivela mu nroromelo.
Mahala matokweene ekhale ni nyuwo oothene.