NEHEMIYA

1 Masu a Nehemiya* mwaana a Hakaliya: Mu mweeri wa Kixilewu,* mu eyaakha ya makhumi meeli, miyaano kaari o Susa o empa yoolipihiwa.* 2 Mu elukuluku yeele, Hananiya, mmoha a asinnaka, aaphiya vamoha ni alopwana akina erwaaka o Yuta, nave kaahaakoha vooloca sa Ayuta oohalela yaawo yaakophonle wookapuroni, nave tho vooloca sa Yerusalemu. 3 Awo yaahaakhula: “Yaawo ahanle o eprovinsiya* nave akophonle wookapuroni ari mmukhalelo woothananiha ni wawuuliha muru. Ixiri so Yerusalemu sookumuliwa, nave milako saya soosukiwa ni mooro.”

4 Vaavaa kiiwalaaka masu yaala, kaakiraathi, kipacerya winla ni othanana mahiku mancipale, nave kaahiinanela olya ni ovekela vamiithoni va Muluku a wirimu. 5 Kaaloca kiriki: “Khwoo Yehova, Muluku a wirimu, Muluku mutokweene ni awoopiha yoowo onakhapelela nlakano nawe, nave onooniherya osivela woororomeleya wa yaale anamusivela yoowo nave anakhapelela malamulo awe, 6 muhineera, miitho anyu ekhale oohuleya nave iwaru sanyu siiwe nivekelo na mulapeli anyu, nenlo olelo kinapakaaka vamiithoni vanyu. Kinnavekela othana ni ohiyu, vooloca sa alapeli anyu Aisarayeli, kilokohaka soocheka sa nloko na Isarayeli seiho yoochekenlaayaani. Hiyaano noocheka, oothene miyaano ni echoko ya atiithi aka. 7 Chiryeene hiyaano nohoochekelaani moorweela wa ohiiwelela malamulo, malakiheryo ni mathorihelo yaawo mwaamvanhaanyu mulapeli anyu Mose.

8 “Khwoo, muupuwele masu yaawo mwaamulamulenlaanyu* mulapeli anyu Mose wi: ‘Wakhala wi moheerano ichu moohiroromeleya, kinamoomwaramwasaani variyari va maloko. 9 Nyenya wakhala wi mookookela wa miyo, muniiwelela ni okhapelela malamulo aka, naamwi nyuwaano mmwalamwalenle ophiyerya weiwo elapo ekotenlaayawo, kinamoothukumanyaani ni wookerihaani mu nipuro nenlo kaathanlilaaka wi nikhalewo nsina naka.’ 10 Awo alapeli anyu ni achu anyu yaawo mwaavulunxaanyu moorweela wa owerya wanyu otokweene ni ntata nanyu nakuru. 11 Khwoo Yehova muhineera, nwiriyane nivekelo na mulapeli anyu ni mavekelo a alapeli anyu, yaawo anasiveliwa woova nsina nanyu. Khwoo, mweerihe wi mulapeli anyu akhumelele phaama olelo ni wi mulopwana ola* ooniherye niphwanya wa miyo.”

Mu elukuluku yeeyo, kaari muhooleli a soowurya sa mwene.

2 Mu mweeri wa Nisani, mu eyaakha ya makhumi meeli, ya mwene Artaxerxe, yaakuhiwa eviinyu vakhiviru vawe, nave ntoko yookhovelela kaakuxa eviinyu kimvaha mwene. Nyenya nkaantonko othanana vamiithoni vawe. 2 Mwawiihiiha mwene aaloca wa miyo: “Ntakhara heeni oryaawe oothanana ohiiceliwaka? Owo onanwerya okhala othanana wa mmurimani.” Mwa yeeyo, kaatepa woova.

3 Voocharela, kaaloca wa mwene: “Ekumi ya Amwene elekele! Ntakhara heeni kahaahaalaaka othanana eniiso epooma ya makholo aka, nipuro nenlo ovithiwewo makholo aka eri milepe nave milako saya isukiwe ni mooro?” 4 Mwene aakaakhula: “Tixeeni onachunaawe oveka?” Mwawaakuveya kaavekela wa Muluku a wirimu. 5 Miyaano kaaloca wa mwene: “Wooreerelanvoni amwene, nave wakhala wi mulapeli anyu oophwanya mahala wa nyuwo, mukirume o Yuta, epooma yeeyo ovithiwewo makholo aka, wi kateke wanaawiili.” 6 Voocharela mwene, akiranthe vamoha ni mwaariye, aakikoha: “Onaya omalihawo ilukuluku kavi, nave onaya okooka liini?” Mwa yeeyo, mwene aahakalala okiruma, nave kaahimuleela elukuluku kaahaalaaka okhala weiwo.

7 Voocharela, kaaloca wa mwene: “Wooreerelanvoni amwene, kinnyiwe ikaarata wi kaavahererye ahooleli a makupa makina a muhice Eufrate,* wi ekeemererye ovira mookhapeleleya ophiyerya o Yuta, 8 nave tho ni ekaarata wi kamvahererye Asafi mulipa ookhapelela ntakhwa na mwene, wi owo akivahe ivika sa opakano ikaxilu sa masele a empa yoolipihiwa,* sa ixiri sa ipooma, ni sa empa yeeyo kinayaaka okhalakamo.” Mwa yeeyo mwene aakivahererya ikaarata woona wi ntata naphaama na Muluku aka naari ni miyo.

9 Veelukuluku aya kaaphiya wa ahooleli a makupa makina a muhice Eufrate* nave kaavahererya ikaarata sa mwene. Mwene aahaarumiha tho ni miyo ahooleli a anakhoco ni alipa ooweeciha akavalo. 10 Vaavaa Sanipalati Muhoronita ni Topiya muhooleli* a Amooni, yiiwalaaya sa yeela, yaatepa onyeenyeya ni ophiya wa muchu wi apake echu yaphaama ntakhara nloko na Isarayeli.

11 Vookuchula kaaphiya o Yerusalemu, nave kaakhala weiwo mahiku mararu. 12 Kaavinya ohiyu, miyaano ni alopwana a vakhaani, nave nkaamulenle muchu wi Muluku aka aahela mmurimani mwaka opaka echu ntakhara Yerusalemu, nave nkaamukunse mwaasinama mukina voohikhala yoole kaanwenlaaka. 13 Kaakhuma ohiyu kiviraka va Mulako wa Opopani,* kiya ohoolo wa Ehime ya Enowa Etokweene nave kikhuruwela Mulako wa Miyaako sa Ecuurwa. Kaavareryela ixiri so Yerusalemu seiho saakumuliwe ni milako saya seiho saasukiwe ni mooro. 14 Kaaheeceeca ophiyerya Mulako wa Ehime ni o Nchiya na mwene, nave hiyaarivo ephaka yawaakhwanela wi mwaxinama kaanwenlaaka avirevo. 15 Nto kaatitelela owela opopani ohiyu, kivareryelaka isiri; voocharela kaakookela oculi kivolowa va Mulako wa Opopani, kichika.

16 Ahooleli hiyaasuwela weiwo kaakelaakawo ni echu keeraaka, woona wi nkaalonceru echu wa Ayuta, wa alipa a mukucho, wa achu oocicimiheya, wa ahooleli, naari mano wa anamuteko akina. 17 Wookuchulani kaaloca wa yaawo: “Nyuwaano munanwerya woona wi nri mmukhalelo woothananiha, Yerusalemu oothatuwa milepe nave milako saya soosukiwa ni mooro. Rwaani, hankooni nteke wanaawiili isiri sa Yerusalemu, wi nimalihe munyemu yoola weeren’ye.” 18 Voocharela kaahaaleela mukhalelo ntata naphaama na Muluku aka naaryaaya wa miyo nave tho ni masu mwene aakilenleiye. Mwa yeeyo awo yaaloca: “Hankooni nipacerye oteka.” Mwawiihiiha awo yaahiilipiha* wi ephare muteko waphaama.

19 Vaavaa Sanipalati Muhoronita, Topiya muhooleli* a Amooni, ni Xesemi Muhaarape yiiwalaaya sa yeela, yaapacerya oniroha ni onikhaliha mwa munyemu enaloca eriki: “Tiheeni muneeraanyu? Siichu munammwaareela mwene?” 20 Nyenya, kaawaakhula: “Muluku a wirimu toni anikhaviherye okhumelela phaama, nave hiyaano alapeli awe nnahaala opacerya oteka; nto nyuwo himwaano makupa, naari ophwanelela, naari yaweereya o Yerusalemu.”

3 Eliyasipi muhooleli a alipa a mukucho, ni asinnawe alipa a mukucho, yaahipacerya oteka wanaawiili mulako wa ipucepuche. Awo yaaheeliha nave ehelamo masele; awo yaaheeliha ixiri o muconco wa Meya ophiyerya o muconco wa Hananeli. 2 Nave voocharela, yaalapawo achu o Yeriko nave ohoolo waya alapawo Sakuri mwaana a Imeri.

3 Anamwene a Hasenai yaateka Mulako wa Ihopa; awo yaahelamo ikaxilu ehelamo masele, akampatika ni iwalelo. 4 Meremoti, mwaana a Uriya, mwaana a Hakusi, aarehererya makupa oocharela; Mexulami, mwaana a Perekiya, mwaana a Mesesapeli, aarehererya makupa oocharela; Satoke, mwaana Pana, aarehererya makupa oocharela. 5 Nave achu o Tekowa yaahirehererya makupa oocharela, nyenya ahooleli aya oovuwa hiyaachunne wiiyeviha wi elapeke evareryeliwaka* ni ahooleli a muteko.

6 Yohiyata, mwaana a Paseya, ni Mexulami, mwaana a Pisoteya, yaarehererya mulako wa epooma yakhalai; awo yaahelamo ikaxilu ehelamo masele, akampatika ni iwalelo. 7 Melitiya Mukapawoni ni Yotani o Merotita, alopwana o Kapawoni ni o Mispa yaavareryeliwa ni ahooleli a makupa makina a muhice* Eufrate, yaarehererya makupa oocharela. 8 Usiyeli, mmoha a alipa oomuhana ooru, mwaana a Hariya, aahirehererya makupa oocharela; Hananiya, mmoha a alipa oopaka makhurwa awunkhela, aarehererya makupa oocharela; nave awo yaahaapachela* ovinyerya o Yerusalemu ophiyerya exiri yawunnuwa. 9 Refaya mwaana a Huri mutokweene a eriyari ya epooma yo Yerusalemu, aahirehererya makupa oocharela. 10 Yetaiya, mwaana a Harumafe, aarehererya makupa oocharela, ohoolo wa empa awe; nave Hatusi, mwaana a Hasepanaya, aahirehererya makupa oocharela.

11 Malkiya, mwaana a Harimu, ni Hasupi mwaana Pahati-mowape, yaarehererya makupa makina, vamoha ni muconco wa ifornu. 12 Nave Salumu, mwaana a Heloye muhooleli a eriyari ya epooma yo Yerusalemu, aahirehererya makupa oocharela, vamoha ni anaawe aasithiyana.

13 Hanuni ni achu o Sanowa yaarehererya mulako woopopani; awo yaahuuluula oteka ni ohelamo masele, akampatika ni iwalelo. Nave tho yaarehererya ikoovatu* ncikhwi sa ixiri ophiyerya o Mulako wa Miyaako sa Ecuurwa. 14 Malkiya, mwaana a Rekape ni muhooleli a epooma yo Petehakere, aarehererya Milako sa o Miyaako sa Ecuurwa, owo aateka wanaawiili aahelamo akampatika ni iwalelo.

15 Salumi, mwaana a Kolohose muhooleli a epooma ya Mispa, aahirehererya Mulako wa Ehime; owo aateka mulako ahelamo ipatho, ahelamo masele aya, akampatika ni iwalelo saya. Owo tho aarehererya exiri ya nchiya na mukoti waacamela o xarti wa mwene ophiyerya o eskata yeeyo yaakhuruwela o epooma ya Tavite.

16 Nehemiya, mwaana a Exipuki muhooleli a eriyari ya epooma ya Petisuri, aarehererya makupa oocharela, apaceryaka ohoolo wa Mahiye a Mwene Tavite ophiyerya o nchiya nenlo naathimpwe akotela o Empa ya Anakhoco.

17 Alevi yaarehererya makupa oocharela ehooleliwaka ni Rehumi mwaana a Pani; Hasapiya muhooleli a eriyari ya epooma ya Keila, aarehererya makupa oocharela, mu epooma awe. 18 Nave asinnawe yaarehererya makupa oocharela ehooleliwaka ni Pavai, mwaana Henatati muhooleli a eriyari ya epooma yo Keila.

19 Eser, mwaana a Yesuwa muhooleli o Mispa, aahirehererya makupa oocharela, ohoolo wa omoko wa empa saakuhiwamo ikaruma sakhoco, waacamela yaariwo Apoco Oolipa.

20 Paruki, mwaana a Sapai, aahilapa moowetha nave arehererya makupa oocharela, ovinyerya yaariwo apoco oolipa ophiyerya va mulako wa empa ya Eliyasipi muhooleli a alipa mukucho.

21 Meremoti, mwaana a Uriya, mwaana a Hakosi, aahirehererya makupa oocharela, ovinyerya vamulako wa empa ya Eliyasipi ophiyerya yaakotenlaayavo empa ya Eliyasipi.

22 Alipa a mukucho, alopwana a epooma yo Yortano* yaahirehererya makupa oocharela. 23 Penxami ni Hasupi yaahirehererya makupa oocharela ohoolo wa empa aya. Asariya mwaana a Maseiya, mwaana a Ananiya, aahirehererya makupa oocharela, vakhiviru va empa awe. 24 Pinuwi, mwaana a Henatati, aahirehererya makupa oocharela, opacerya o empa ya Asariya ophiyerya yaariwo apoco oolipa nave akotela vakwantuni.

25 Palali, mwaana a Usai, aahirehererya makupa oocharela, waacamela yaariwo Apoco Oolipa ohoolo wa muconco yaapacenryewo empa ya mwene, osulu waya naariwo n’yate na alipeleli. Petaiya, mwaana a Parosi aarehererya makupa oocharela.

26 Anamuteko o empa ya Muluku* yaawo yaakhala o Ofeli yaarehererya ophiyerya o Mulako wa Maahi, makupa onakhumawo nsuwa, ni o muconco woorakama.

27 Achu o Tekowa yaarehererya makupa oocharela, ovinyerya waacamela muconco mutokweene woorekama ophiyerya o exiri yo Ofeli.

28 Alipa a mukucho yaarehererya osulu wa mulako wa akavalo, mmoha ti mmoha ohoolo wa empa awe.

29 Satoki, mwaana a Imeri, aahirehererya makupa oocharela, ohoolo wa empa awe.

Simeiya, mwaana a Sekaniya mulipeleli a mulako onakhumawo nsuwa, aahirehererya makupa oocharela.

30 Hananiya, mwaana a Selemiya, ni Hanu mwaana aneethanu a Salafi, yaahirehererya makupa oocharela.

Mexulami, mwaana a Perekiya, aahirehererya makupa oocharela, ohoolo wa empa awe.

31 Malikiya yoowo aapaka makupa a alipa oomuhana ooru, aahirehererya makupa oocharela, ophiyerya empa ya anamuteko a empa ya Muluku* ni alipa a maroca, ohoolo wa mulako wa alipa oolipelela, ophiyerya esaala ya vasulu ya vakwantuni.

32 Nave alipa oomuhana ooru ni alipa a maroca yaarehererya ovinyerya o esaala yoosulu ya vakwantuni ophiyerya mulako wa ipucepuche.

4 Vaavaa Sanipalati iiwaleiye wi naanateka wanaawiili exiri, owo aatepa onyeenyeya ni onanariwa nave aapacerya waaroha Ayuta. 2 Nave owo aanaloca vamiithoni va asinnawe ni wa anakhoco o Samariya ariki: “Aneeramvo Ayuta ala oovelavela ene? Apwanne anuupuwela wi anahaala weerano mukhataaya? Apwanne anahaala ovahakavo mikucho? Apwanne anahaala okwaaxa muteko ola nihiku nimoha? Apwanne awo nlelo ananwerya opharihela maluku oovya ene yaawo yuukeliwe va nchupini?”

3 Topiya o Amooni, yoowo aari ni Sanipalati aaloca ariki: “Naari nanthala arwiile awelavo, onanwerya okumula exiri yeela anatekaaya.”

4 Mwa yeeyo, kaavekela: “Khwoo Muluku ahu nwiriyane, ninnakhalihiwa mwamunyemu, mweerihe wi oroha waya waakookele,* nave awo ekuxiwe ekerihiwaka wookapuroni.” 5 Muhicuwale nthowa naya naari muhihiye wi yoocheka aya exipihiwe vamiithoni vanyu, woona wi aaruwanne alipa ooteka.

6 Mwawiihiiha, naatitelela oteka exiri. Naahiwala iphaka soothene nave nteka ixiri ophiyerya eriyari ya orakama waya. Nave achu yaanatitelela olapa ni murima woothene.

7 Vaavaa Sanipalati, Topiya, achu o Arapiya, achu o Amooni, ni o Asitoti, yiiwalaaya wi muteko wa orehererya isiri sa o Yerusalemu waanaya vahoolo nave wi iphaka sa ixiri saanawaliwa, yaatepa onanariwa. 8 Awo yaahiiwanana wi erwe ewane ni hiyaano ni omutannya namvutuka. 9 Nyenya naahivekela wa Muluku ahu nave naahaakuhamo alipeleli wi enikhapeleleke wa amwiicani yaawo othana ni ohiyu.

10 Nto, achu o Yuta yaani: “Anamuteko* aakoma nave muteko wootepa waaca; hiyo hinrwa nimaliha oteka exiri.”

11 Nave amwiicani ahu yaani: “Ehaakumve osuwela naari onoona, nnahaala oya veeri vaya wi niwiiphe ni omaaliha muteko.”

12 Vaavaa yaavolowaaya vapooma, Ayuta yaawo yaamanke waacamela eriwo amwiicani, awo yaananleela wiiliwiili* eriki: “Awo anahaala onivirela makupa oothene.”

13 Mwawiihiiha, kaahaakuha alipeleli mmapuro a vathi ni oohikhapeleleya oculi wa exiri; kaahaathatanya kaakawannye mu ichoko, erino malema aya, mavaka aya ni minra saya. 14 Vaavaa kaawonnaaka wi yaanoova, mwawaakuveya kaavinya, nave kiloca wa achu oocicimiheya, wa ahooleli ni wa achu akina kiriki: “Muhiwoove yaawo. Mmuupuwele Yehova, yoowo ori mutokotoko ni awoopiha; nave nwane ntakhara asinninyu, anamwane anyu aasilopwana ni anamwane anyu aasithiyana, wa asaarinyu ni wa ichoko sanyu.”

15 Vaavaa amwiicani ahu yiiwalaaya wi naahisuwela yeeyo yaapakaaya, nave wi Muluku eeparipari aahaakanyerya marehereryo aya, oothene hiyo naakookela mmuteko wa oteka ixiri. 16 Ovinyerya nihiku nenle oya ohoolo, eriyari ya achu aka yaanalapa mmuteko wa oteka, eniiha eriyari ekina yaalipelela erino mavaka, sawiisaakihano, minra, ni soowara. Nave ahooleli yaanaakhaviherya* achu oothene a echoko ya Yuta, 17 yaawo yaateka exiri. Alipa ooteexa yaalapa muteko ni ntata nimoha, nave ntata nikina epharenle nivaka. 18 Mmoha ti mmoha a alipa ooteka aanakhalano nlema muyuununi vaavaa aalapeiye, nave vakhiviru vaka aanakhalavo mulipa awoopa nipeca.

19 Voocharela, kaahiloca wa achu oocicimiheya, wa ahooleli ni wa achu oothene: “Muteko wohaaca nave mutokweene, nave noomwaramwaxeleya mu exiri nrakamelana mukina ni mukhwaawe. 20 Vaavaa muneeraanyu mwiiwe oruma wa nipeca, mukhale vamoha ni hiyo weiwo nneeraahu nikhalewo. Muluku ahu onahaala owaniha ntakhara hiyo.”

21 Mwawiihiiha, naatitelela olapa eniiha eriyari ya achu akina epharenle mavaka, ovinyerya wooxiixelo ophiyerya itheneeri okhuma. 22 Mu elukuluku yeele kaaloca ni achu kiriki: “Alopwana oothene vamoha ni akhaviheryi aya, ekhaleke mpuwa mwa Yerusalemu, nave anahaala onlipelelaka ohiyu nave othana anahaala olapaka muteko.” 23 Mwawiihiiha, miyaano, asinnaka, akhaviheryi aka, ni alipeleli yaawo yaakichara, hinantonko orula soowara, nave mmoha ti mmoha a hiyo aanakhalano nivaka nawe mmatani omoono woolopwana.

5 Mwawiihiiha, alopwana ni asaaraya yaapacerya wiikhupanyerya vancipale wa nthowa na asinnaya Ayuta. 2 Akina yaani: “Hiyaano ni aniihu nootepa waaca. Nnachuna yoolya wi ntitelele okhala.” 3 Akina yaanaloca eriki: “Nnaveleela imaca sahu, miri sahu ni ipa sahu ntoko mweemeseryo wi niphwanye yoolya wa nthowa na etala.” 4 Akina tho yaanaloca eriki: “Nrimpoleya ikhorowa wi nliveno muxokho wa amwene nivahaka imaca sahu miri sahu ntoko mweemexeryo. 5 Vano, hiyaano ni asinnihu na mwiili mmohamoha nnikhami* nimohamoha, nave anamwane ahu ari ntoko anamwane aya; nto naamwiihiiha ninnaaveleela anamwane ahu aasilopwana ni aasithiyana wookapuroni, nave anamwane ahu akina aasithiyana akapuro. Mwawiihiiha, hinnawerya weera echu ekina woona wi imaca sahu ni miri sahu siri mmatani mwa achu akina.”

6 Vaavaa kiiwalaaka wiikhupanyerya waya ni masu yaala, kaatepa onyeenyeya. 7 Mwawiihiiha kaahuupuwelela mwawiichaalela vooloca sa mwaha yoola nave kipacerya ovaanela ni achu oocicimiheya vamoha ni ahooleli kiriki: “Oothene nyuwo munnaaveka asinninyu opwaha mummo mwaapoleihalaanyu.”

Ohiya yeeyoru, wa nthowa na yeeyo awo yeenraaya kaahithukumanya muloko woothene. 8 Nave kaaloca kiriki: “Naapaka owetha wahu wi niwoopole asinnihu Ayuta yaawo yaatumiheriwe maloko makina. Vano nyuwaano munaatumiha asinninyu? Apwanne nnanwerya tho owoopola wanaawiili?” Mwa yeeyo awo yaamaala, nave hiyaarino yooloca. 9 Voocharela kaahiloca kiriki: “Echu muneeraanyu hereere. Apwanne himwaaphwanela wooniherya omoova Muluku ahu wi maloko, amwiicani ahu, ehinnyemule? 10 Nave tho, miyaano, asinnaka, ni akhaviheryi aka ninnaapoleiha ikhorowa ni soolya. Khwoo, hankooni nihiye oveka opwaha mummo nipoleihalaahu. 11 Khwoo, mwaakookiherye olelo vaava imaca saya miri saya, asitona aya ni ipa saya, hiiha ntoko ikhorowa,* soolya, eviinyu evyaani ni makhurwa yaawo mwaavekaanyu opwaha mwaapoleihalaanyu.”

12 Mwawiihiiha awo yaahaakhula eriki: “Hiyaano nnahaala waakookiherya ichu seiya nave hiniveka onikookiherya echu. Nnahaala weerano hiihaa yene ntoko muloncaanyu.” Mwawiihiiha kaahiwiichana alipa a mukucho nave kaahiweeriha alopwana awo wi elipele wi yaahaala waakhwaniherya nlakano nenla. 13 Voocharela, kaatatha maleya* aka, kiloca kiriki: “Mmukhalelo mmohamoha, Muluku eeparipari atathele okhwipi ipa ni sookhalano saya sa oothene yaale eni ehikhwaaniherye nlakano nenla, nave tho mmukhalelo mmohamoha etathiwe wi ehikhalenoru echu.” Mwa yeeyo muloko woothene waahaakhula oriki “Aamen!”* Nave yaahimucicimiha Yehova. Mwawiihiiha, achu yaahaakhwaniherya nlakano naya.

14 Ohiya yeeyoru, ovinyerya nihiku nenlo aakithanlileiye okhala muhooleli a elapo yo Yuta, opacerya eyaakha ya makhumi meeli ophiyerya eyaakha ya makhumi mararu napiili ya mwene Artaxerxe, ela tiwi, iyaakha khumi napiili, naari miyaano naari asinnaka hinaalyileru epaau yeeyo yaamphwanela muhooleli. 15 Nyenya ahooleli yaawo yaarivo kihaakumve othanliwa yaanaalyela achu, mahiku oothene yaanaaveka isiikulu* makhumi masese sa eparata wi ethumekeno ipaau ni eviinyu. Ophiyerya wi akhaviheryi aya yaanaahooxa achu. Nyenya miyaano nkeenreno hiiha wa nthowa na omoova Muluku.

16 Opwaha soothene, kaahipaka makupa mu oteka exiri yeela, nave hiyaano hinaakunxeru emaca; akhaviheryi aka oothene yaari wiiwo ethukumanne wi elapeke. 17 Yaakhalavo Ayuta ni ahooleli nsana nimoha ni makhumi mathanu yaawo yaalya vameesa vaka, ehiphitaanyeriwevo yaale yaarwa mmaloko awaacamela. 18 Mahiku oothene yaanarehereryiwa ntakhara miyo, emope, ipucepuche saphaama thanu nammoha, ipalame; nave moovira wa mahiku oothene khumi naanakhalano eviinyu yawaaca ya mukhalelo ori woothene. Moohipwacha ichu soothene seiya, nkaavenke yoolya yeeyo yaamphwanela muhooleli woona wi achu yaatepa waaceliwa ni muteko. 19 Khwoo Muluku aka, mukuupuwele miyo,* wa soothene keenraaka ntakhara achu yaala.

6 Mwawiihiiha, vaavaa Sanipalati, Topiya, Kesemi o Arapiya, ni amwiicani akina, yaaleeliwaaya wi kinnuuluula oteka ixiri nave wi hisaarivo iphaka sa ixiri, (naamwi mu elukuluku yeele kahaahenlemo masele mmilakoni), 2 mwawaakuveya, Sanipalati ni Kesemi, yaakirumihela michaka iha eriki: “Orwe, nakumane o muceche woopopani* wa Ono.” Nyenya awo yaachuna okeerela yoonanara. 3 Mwawiihiiha, kaahaarumihela anamichaka wa yaawo kiriki: “Kootepa oweiwa ni muteko mutokweene, nave nkiwerya oyawo. Ntakhara heeni muteko waahaalaaya omaala nthowa na opwahavo wi kikumane ni nyuwo?” 4 Awo yaakirumihela michaka mimohamoha ikwaha xexe, nave ikwaha soothene, kaahaavaha naakhulo nimohamoha.

5 Voocharela, Sanipalati aakirumihela mukhaviheryi awe ni muchaka mmohamoha mu ekwaha yaneethanu, arinono ekaarata yoohuleya mmatani mwawe. 6 Ekaarata yii: “Variyari va maloko enniiweya wi weyaano ni Ayuta munachuna omwaryeya nave Kesemi onnaloca tho sa yeela. Ti mathowa ene mutenkaanyu isiri; nave mwawiiwanana ni soolokoha seiha weyaano oni okhale mwene aya. 7 Weyaano tho wohaathanla alipa a miririmu wi elaleyeke vooloca sa weyo o Yerusalemu woothewene, eriki: ‘Ookhalawo mwene o Yuta!’ Nave ichu seiya nnahaala omuleela mwene. Vano orwe nave nthokororye mwaha yoola vamoha.”

8 Nto, kaamurumihela naakhulo nla: “Hiyaavo wa ichu seiho oloncaawe yeeren’ye; ichu soothene onapakaawe ti sa mmuruni mwaa.”* 9 Tiwi, oothene yeererya oniceecheiha eriki: “Awo anahaala oceecheya nave muteko honi okwaasiwe.” Vano Muluku aka, mukivahe olipa murima.

10 Voocharela, kaaya vaate va Simeiya mwaana a Telaiya, mwaana a Mehetapeli yoowo ahaakhuma vaate vawe. Owo aaloca: “Hankooni nakumane o empa ya Muluku eeparipari, mpuwa mwa empa ya Muluku, nave niwale masele a empa ya Muluku, woona wi awo anahaala orwa wi ewiipheeni. Awo anahaala orwa wi ewiipheeni ohiyu.” 11 Nto kaamwaakhula: “Apwanne muchu ntoko miyo, kinnaphwanela ochawa? Apwanne muchu ntoko miyaano, kinanwerya ovolowa mu empa ya Muluku ni otitelela okhala mukumi? Nkini kiyewo!” 12 Voocharela, kaahisuwela wi Muluku haamurumme yoowo, nyenya wi Topiya ni Sanipalati ti yaamulimve wi akeerele yoonanara ni masu awe. 13 Owo aahiliviwa wi akoopopihe ni okichekiha, ni yoolakelela ya onanariha meecelo aka ni okuuliha muru.

14 Khwoo Muluku aka, muupuwele yeeyo yeenraaya Topiya ni Sanipalati ni mulipa a miririmu amwaamuthiyana Nowatiya, vamoha ni alipa a miririmu akina yaawo wiiliwiili yeererya okoopopiha.

15 Mwawiihiiha, isiri saahikwaasiwa mmahiku makhumi mathanu ni mahiku meeli mu nihiku na makhumi meeli nathanu na mweeri wa Eluli.*

16 Vaavaa amwiicani ahu oothene yiiwalaaya sa yeela nave maloko oothene oorukurerya yoonnaaya yeela awo yaatepa wuuliheya muru,* nave yaasuwela wi muteko ola waakwaaxiwe nnikhaviheryo na Muluku ahu. 17 Mmahiku yaale achu oocicimiheya o Yuta yaanamurumihela ikaarata sincipale Topiya, nave Topiya aanawaakhula. 18 Ayuta ancipale yaaroromeliha omukhaviherya, woona wi owo aari mukamwene a Sekaniya, mwaana a Ara, ni Yehowana, mwaana a Topiya, yoowo aamuthenle mwaana a mwaamuthiyana a Mexulami, mwaana a Perekiya. 19 Nave tho, awo yaanakileela wiiliwiili ichu saphaama vooloca sa yoowo nave voocharela yaanamuleela yeeyo kaalocaaka. Mwa yeeyo, Topiya aanarumiha ikaarata wi akoopopihe.

7 Vaavaa ixiri saakwaasiwaaya otekiwa kaahelamo masele; vahoolo vaya alipeleli a milako, alipa a wiipa, ni Alevi yaahithanliwa. 2 Voocharela, kaamuthanla munnaka Hanani wi akhale muhooleli o Yerusalemu, vamoha ni Hananiya muhooleli a empa yoolipihiwa, woona wi aari muchu oororomeleya ni aamoova Muluku eeparipari waapwaha achu akina ancipale. 3 Mwawiihiiha, kaahaaleela kiriki: “Milako sa Yerusalemu hasinaphwanela ohuliwa ophiyerya oxilevo, nave alipeleli anaphwanela owalaka vaavaa awo analipelelaaya. Akina ekhaleke mmapuro oolipelela nave akina ekhaleke mu ipa saya.” 4 Epooma yaari yawunnuwa ni etokweene, nave yaari achu a vakhaani yaakhala mummo, nto ipa hisaatekiwe wanaawiili.

5 Nyenya Muluku aka aakivaha muupuwelo wa waathukumanya achu oocicimiheya, alamuleli ni achu wi erepeliwe icharihiwaka imusi saya. Voocharela, kaahimphwanya liivuru yaarimo masina a achu yaale yaakoonke woopaceryani nave kaahiphwanya orempwevo ha:

6 Ala yaari achu a eprovinsiya* yaawo yaakoonke wookapuroni, yaawo mwene Napukotonosori o Papulu aaphanreiye ekhala akapuro o Papulu. Awo yaakookela o Yerusalemu ni o Yuta, muchu ti muchu mu epooma awe. 7 Awo yaakoonke ni Soropapeli, Yesuwa, Nehemiya, Asariya, Ramiya, Nahamani, Mortekayi, Pilsa, Mispereti, Pikivai, Mehume, ni Pana.

Waaca wa alopwana a Isarayeli yaaphitaanyerya: 8 Wa anamwane a Parosi, macikhwi meeli ni achu nsana nimoha ni makhumi mathanu nameeli ni achu eeli;* 9 wa anamwane a Sefatiya, masana mararu ni makhumi mathanu nameeli ni achu eeli;* 10 wa anamwane a Ara, masana mathanu nammoha ni makhumi mathanu ni achu apiili;* 11 wa anamwane a Pahati-mowape, anamwane a Yesuwa, ni a Yowapi, macikhwi meeli masana makhumi mathanu namararu ni achu khumi nathanu nararu;* 12 wa anamwane a Elami, ncikhwi nimoha ni masana meeli ni achu makhumi mathanu naxexe;* 13 wa anamwane a Satu, masana mathanu namararu ni makhumi maxexe nathanu;* 14 wa anamwane a Sekai, masana mathanu nameeli ni achu makhumi mathanu nammoha;* 15 wa anamwane a Penuwi, masana mathanu nammoha makhumi maxexe ni achu athanu nararu;* 16 wa anamwane a Pepai, masana mathanu nammoha ni achu makhumi meeli ni athanu nararu;* 17 wa anamwane a Asikati, macikhwi meeli masana mararu ni achu makhumi meeli napiili;* 18 wa anamwane a Atonekami, masana mathanu nammoha ni makhumi mathanu nammoha ni achu thanu napiili;* 19 wa anamwane a Pikivai, macikhwi meeli makhumi mathanu nammoha ni achu athanu napiili;* 20 wa anamwane a Atini, masana mathanu nammoha makhumi mathanu ni achu athanu;* 21 wa anamwane a Eteri, a echoko ya Esekiya makhumi mathanu namaxexe ni achu athanu nararu;* 22 wa anamwane a Hasumi, masana mararu ni achu makhumi meeli nathanu nararu;* 23 wa anamwane a Pesai, masana mararu makhumi meeli ni achu axexe;* 24 wa anamwane a Harifa, nsana nimoha ni achu khumi napiili;* 25 wa anamwane o Kapawoni makhumi mathanu naxexe ni achu athanu;* 26 wa achu o Petelehemu ni o Netofa, nsana nimoha makhumi mathanu namararu ni alopwana athanu nararu;* 27 wa achu o Anatoti, nsana nimoha ni achu makhumi meeli nathanu nararu;* 28 wa alopwana o Peti-asimaveti, makhumi masese ni achu apiili;* 29 wa achu o Kiriyati-xeyarimi, Efira ni Peroti, masana mathanu nameeli ni achu makhumi maxexe ni araru;* 30 wa achu o Rama ni Kepa, masana mathanu nammoha ni achu makhumi meeli nammoha;* 31 wa achu o Mikimasi, nsana nimoha ni makhumi meeli ni achu apiili;* 32 wa achu o Peteli ni o Ayi, nsana nimoha ni achu makhumi meeli nararu;* 33 wa achu akina o Nepo, makhumi mathanu ni achu apiili;* 34 wa anamwane Elami mukina, ncikhwi nimoha ni masana meeli ni achu makhumi mathanu naxexe;* 35 wa anamwane a Harimu, masana mararu ni achu makhumi meeli;* 36 wa anamwane o Yeriko, masana mararu ni achu makhumi maxexe nathanu;* 37 wa anamwane a Lote Hatiti ni Ono, masana mathanu nameeli ni achu makhumi meeli nammoha;* 38 wa anamwane a Senaya, macikhwi mararu ni masana mathanu namaxexe ni achu makhumi mararu.*

39 Alipa a mukucho: Wa anamwane a Yetaya, a echoko ya Yesuwa, masana mathanu naxexe ni makhumi mathanu napiili ni achu araru;* 40 wa anamwane a Imeri, ncikhwi nimoha ni makhumi mathanu ni achu apiili;* 41 wa anamwane a Pasuri, ncikhwi nimoha ni masana meeli ni achu makhumi maxexe nathanu napiili;* 42 wa anamwane a Harimu, ncikhwi nimoha ni achu khumi nathanu napiili.*

43 Alevi: Wa anamwane a Yesuwa ni Katemiyeli, ni anamwane a Hotaviya, makhumi mathanu nameeli ni achu axexe.* 44 Alipa awiipa: Wa anamwane a Asafi, nsana nimoha ni achu makhumi maxexe nathanu nararu.* 45 Anamwane a alipeleli a milako: Wa anamwane a Salumu, wa anamwane a Eteri, wa anamwane a Tilimoni, wa anamwane a Akupi, wa anamwane a Hatita, wa anamwane a Sopai, oothene yaari nsana nimoha makhumi mararu ni achu athanu nararu.*

46 Anamuteko a empa ya Muluku:* Wa anamwane a Siya, wa anamwane a Hasufa, wa anamwane a Tapaoti; 47 wa anamwane a Kerosi, wa anamwane a Siyaha, wa anamwane a Patoni; 48 wa anamwane a Lepana, wa anamwane a Hekapa, wa anamwane a Salmai; 49 wa anamwane a Hanani, wa anamwane a Kiteli, wa anamwane a Kahari; 50 wa anamwane a Reyaya, wa anamwane a Resini, wa anamwane a Nekota; 51 wa anamwane a Kasami, wa anamwane a Usa, wa anamwane a Paseya; 52 wa anamwane a Pesai, wa anamwane a Meunimi, wa anamwane a Nefusini; 53 wa anamwane a Pakipuki, wa anamwane a Hakufa, wa anamwane a Haruri; 54 wa anamwane a Pasiluti, wa anamwane a Mehita, wa anamwane a Harsa; 55 wa anamwane a Parikosi, wa anamwane a Sisera, wa anamwane a Temai; 56 wa anamwane a Nesiya, ni wa anamwane a Hatifa.

57 Anamwane a anamuteko a Solomoni: Wa anamwane a Sotai, wa anamwane a Sofereti, wa anamwane a Perita; 58 wa anamwane a Xaala, wa anamwane a Tarkoni, wa anamwane a Kiteli; 59 wa anamwane a Sefatiya, wa anamwane a Hatili, wa anamwane a Pokereti-hasipaimi, ni wa anamwane a Amooni. 60 Anamuteko oothene a empa ya Muluku* ni anamwane a anamuteko a Solomoni yaari masana mararu ni makhumi mathanu namaxexe ni achu eeli.*

61 Nave ala, yaari yaawo yaakoonke o Telimela, o Teleharisa, o Kerupi, o Atoni, ni o Imeri, nyenya awo hiyaawenrye osuwela imusi saya ni muyareriwo aya waakhanle wi yaari Aisarayeli naari hooye: 62 Wa anamwane a Telaiya, wa anamwane a Topiya, wa anamwane a Nekota, masana mathanu nammoha ni makhumi masese ni achu eeli.* 63 Nave wa anamwane a alipa a mukucho: Wa anamwane a Hapiya, wa anamwane a Hakusi, wa anamwane a Parsilai, yoowo aamuthenle mmoha a anamwane a Parsilai o Kiliyati nave akusa nsina na emusi aya. 64 Yaala, yaawaavya aliivuru yaarepeliwaayamo wi yoone masina a makholo aya nyenya awo hiyaaphwannyemo. Mwawiihiiha, awo hiyaaphwanelenle okhala alipa a mukucho.* 65 Mulamuleli* ahaaleela yaawo wi hiyaaphwanela olya ichu saweelihiwa ophiyerya akhanlevo namukucho yoowo aahaala okoherya moorweela wa Urim ni Tumim.

66 Waaca wa muloko woothene waari macikhwi makhumi masese nameeli ni masana mararu ni achu makhumi mathanu nammoha,* 67 ehaalakhanyeryiwe anamuteko aya aasilopwana ni aasithiyana, yaawo yaari macikhwi mathanu nameeli ni masana mararu ni achu makhumi mararu ni athanu napiili;* yaakhalavo tho alipa a wiipa masana meeli ni makhumi masese nathanu aasilopwana ni aasithiyana.* 68 Akavalo aya yaari masana mathanu napiili ni makhumi mararu nathanu nammoha,* apuuru aya yaari masana meeli ni makhumi masese nathanu;* 69 akamelu aya yaari masana masese ni makhumi mararu nathanu,* apuuru aya akina yaari macikhwi mathanu nammoha ni masana makhumi mathanu napiili ni makhumi meeli.*

70 Ahooleli akina a imusi yaahipaka sooveleela ntakhara muteko. Mulamuleli* aaveleela itrakima* sa ooru ncikhwi,* itixela makhumi mathanu, ni soowara sa alipa a mukucho masana mathanu ni makhumi mararu.* 71 Nave ahooleli akina a imusi yaaveleela itrakima macikhwi makhumi meeli* ni imiina sa eparata macikhwi meeli ni masana meeli.* 72 Nave achu akina yaavaha itrakima sa ooru macikhwi makhumi meeli,* imiina sa eparata macikhwi meeli,* nave soowara soorekama sa alipa a mukucho makhumi mathanu nammoha ni thanu napiili.*

73 Nave alipa a mukucho, Alevi, alipeleli a mulako, alipa awiipa, achu akina a nloko, anamuteko a empa ya Muluku,* ni achu akina oothene a Isarayeli,* yaakookela omaka mu ipooma saya. Vaavaa waaphin’yaaya mweeri waneethanu napiili, Aisarayeli yaamaka mu ipooma saya.

8 Mwawiihiiha, achu oothene yaahithukumana ni yoolakelela emoha vanipuro na achu oothene ohoolo wa Mulako wa Maahi, nave awo yaamuleela Estra mulipa oorepa wi amuruuhe liivuru a Nlamulo na Mose, yoowo Yehova aamwinnyaleiye Isarayeli. 2 Mwawiihiiha, mu nihiku noopacerya na mweeri waneethanu napiili, Estra mulipa a mukucho aahimukeriha liivuru a Nlamulo wa achu yaathukumanne, alopwana, athiyana, ni oothene yaawo yaawerya owiriyana ni wiiwexexa yeeyo yaalociwa. 3 Nave owo aahaalakhanya moovuwa vanipuro na achu oothene ohoolo wa Mulako wa Maahi, ovinyerya wooxiixelo ophiyerya othana, wa alopwana, wa aathiyana ni wa oothene yaale yaawerya wiiwexexa; nave achu yaahiwiriyana moomaaleleya waalakhanyiwa wa liivuru a Nlamulo. 4 Estra mulipa oorepa, aaheemela va etarato* ya miri, yeeyo yaapakiwe ntakhara yoolakelela ya muthukumano yoowo; eemenle, mmakupa awe oolopwana, aakhalawo Matatiya, Sema, Anaiya, Uriya, Hilikiya ni Maseya; nave mmakupa awe oothiyana aakhalawo Petaiya, Mesayeli, Malkiya, Hasumi, Hasipatana, Sakariya ni Mexulami.

5 Estra, aahimuhula liivuru vamiithoni va achu oothene, woona wi owo aari vanipuro noocukhuwa waapwaha achu oothene. Vaavaa aamuhunleiye liivuru, achu oothene yaaheemela. 6 Voocharela, Estra aahimucicimiha Yehova Muluku eeparipari, mutokweene, nave achu oothene yaahaakhula, “Aamen!* Aamen!” eviihale mata aya. Awo yaakokhora vamiithoni va Yehova ethipenle iyuuci saya vathi. 7 Nave Yesuwa, Pani, Serapiya, Yami, Akupi, Sepetai, Hotiya, Masiya, Kelita, Asariya, Yosapati, Hanani ni Pelaiya, yaawo yaari Alevi, yaanaatharihela achu Nlamulo nlelo muloko wa achu weemenle. 8 Nave awo yaatitelela omwaalakhanya moovuwa liivuru a Nlamulo na Muluku eeparipari etharihaka mookwakwaleya ni waaleeliha achu yootaphulelaaya; mwawiihiiha, awo yaanaakhaviherya achu wiiwexexa yeeyo yaalakhanyiwa.

9 Nave Nehemiya yoowo voocharela aari mulamuleli,* Estra mulipa a mukucho ni mulipa oorepa vamoha ni Alevi yaawo yaahusiha achu, yaahiloca wa achu oothene eriki: “Nihiku na olelo ti naweela wa Yehova Muluku anyu. Muhiikhupanyerye naari winla.” Woona wi achu oothene yaaninla vaavaa yiiwalaaya masu a Nlamulo. 10 Nehemiya aaloca ariki: “Haweni, mwalye soolya* soophwanelela ni owurya soowurya soosiva, nave mwaavahe yaale ahirino echu; woona wi nihiku nla ti naweela wa Apwiya ahu. Nave muhithanane woona wi ohakalala onarweela wa Yehova ti nchawelo* nanyu.” 11 Nave Alevi yaanaamaaliha achu oothene, eriki: “Mmaale! Woona wi nihiku nla ti naweela, nave muhikhale oothanana.” 12 Mwawiihiiha, achu oothene yaahipwaha eya olya ni owurya nave tho yaahaakawela akina yoolya nave achu yaatepa ohakalala. Woona wi yaahiiwexexa masu yaawo yaaleeliwaaya.

13 Nave mu nihiku nanaawiili, ahooleli a imusi a nloko noothene, alipa a mukucho ni Alevi, yaahithukumana emurince Estra mulipa oorepa, wi yiiwesese phaama masu a Nlamulo. 14 Voocharela, awo yaaphwanya Nlamulo noorempwa nenlo Yehova aavaherenryeiye moorweela wa Mose wi Aisarayeli yaaphwanela okhalaka mmixakalani variyari va efesta ya mweeri waneethanu napiili, 15 nave wi awo yaaphwanela olaleyaka ni olokoha mu ipooma saya soothene ni o Yerusalemu woothewene eriki: “Haweni makupa o Mwaako nave mwaavye mirai sa oliveira, sa pinyeiru, sa murta ni sa n’yale,* nave tho mwaavye mirai sa miri mikina, wi mpake mixakala mwawiiwanana ni yeeyo erempwe.”

16 Mwawiihiiha, achu yaayawo nave eruuhawo mirai wi epakeleno misakala, muchu ti muchu vasulu va empa awe hiihaa ntoko mmayateni mwaya, mmayateni mwa empa ya Muluku eeparipari, mu nipuro na achu oothene na Mulako wa Maahi, ni nipuro na achu oothene na Mulako wa Efraimu. 17 Mwawiihiiha, muloko woothene waachinke wookapuroni waahipaka mixakala nave onakhala mmixakalani. Aisarayeli hiyantonko olya efesta mmukhalelo yoole ovinyerya mmahiku a Yosuwa, mwaana a Nuni, ophiyerya nihiku nenle. Mwa yeeyo, waakhalawo ohakalala otokweene. 18 Nave Nlamulo na Muluku eparipari naanaalakhanyiwa mahiku oothene, ovinyerya nihiku noopacerya ophiyerya nihiku nookuchula. Awo yaahilya efesta mu mahiku mathanu nameeli, nave mu nihiku naneethanu nararu waakhalavo muthukumano wavameekhaaya ntoko yaalamuleliwaaya.

9 Mu nihiku na makhumi meeli naxexe na mweeri yoole, Aisarayeli yaathukumana vamoha; awo yaaniinanela olya ewanre isakhwi nave yiihenle echaya. 2 Mwawiihiiha, muyareriwo wa Aisarayeli waahiivalaanya ni achu oothene a ilapo sookhopela, nave yaaheemela wi elokohe soocheka saya ni soohesa sa makholo aya. 3 Voocharela, yeemenle vaavaa yaaryaayavo, aahaalakhanyiwa liivuru a Nlamulo na Yehova, Muluku aya, mu iwora raru;* nave awo yaamaliha iwora ikina raru elokohaka soocheka ni ekokhoraka vamiithoni va Yehova, Muluku aya.

4 Yesuwa, Pani, Katemiyeli, Sepanai, Puni, Serapiya, Pani ni Kenani yaaheemela vanipuro noocukhuwa na Alevi nave yaahivekela moovuwa wa Yehova, Muluku aya. 5 Alevi Yesuwa, Katemiyeli, Pani, Hasapeneiya, Serapiya, Hotiya, Sepaniya ni Petaiya yaahiloca eriki: “Mvinye nave mmucicimihe Yehova, Muluku anyu, okhala wookhala.* Nave nweemererye awo wi ecicimihe nsina nanyu noovuwa nenlo nnapwaha mareeliho oothene ni ncicimiho.

6 “Nyuwo pahiru mwa Yehova. Moopatuxa irimu, aa, erimu ya irimu ni anakhoco aya oothene, elapo ni soothene siri mwemmo, iphareya ni soothene siri mwemmo. Munnakhapelela soothene seiho wi ikhale ikumi, nave anakhoco a wirimu annookokhorelaani. 7 Nyuwo mwa Yehova, yoowo aamuthanlile Aparamu amviihaka elapo yo Uri ya Akalteu nave amvaha nsina na Aparahamu. 8 Mwaahoona wi murima awe waari woororomeleya wa nyuwo, mwa yeeyo mwaahipaka nlakano na waataana ni yoowo wi mumvahe elapo ya Akanani, ya Aheti, ya Amoreu, ya Aperisi, ya Ayepusi ni ya Akirikasi wi mvahe muyareriwo awe, nave mwaahaakhwaniherya soororomeliha sanyu woona wi muri awookololowa.

9 “Mwaahoona ohooxeya wa makholo ahu o Yikuputu nave mwaahiiwa okhuwela waya o eniya yoophilivila. 10 Voocharela, nyuwo mwaahipaka ineneeryo ni sootikhiniha wa Farawo ni wa anamuteko awe oothene vamoha ni wa achu oothene a elapo awe, woona wi nyuwo mwaahisuwela wi awo yeerano ichu mwawiirumiha ntakhara achu anyu. Mohiipakela nsina nenlo nniikhalelaru ophiyerya olelo. 11 Mwaakawanya ephareya vamiithoni vaya, nave awo elapuwa mu ephareya va echaya yawuuma; mwaahaavonyerya mmaahini awiixa amwiicani aya ntoko nluku nnavonyeryiwa mmaahini awuupa. 12 Othana, nyuwaano mwaahoolela nneeku naweemela, nave ohiyu ni mooro, wi omwaleeleke ephiro yaaphwanelaaya oviramo. 13 Mwaakhuruwela o mwaako Sinai munaloca ni yaawo orweela wirimu nave mwaahaavaha mathoriheryo awookololowa, malamulo eeparipari,* mahusiheryo aphaama ni ikano. 14 Mwaahaasuweliha yaawo Sapata anyu aweela, nave mwaahaavaha ikano, mahusiheryo ni nlamulo moorweela wa mulapeli anyu Mose. 15 Mwaahaavaha epaau yoorweela wirimu vaavaa awo yaavoliwaaya, mwaaheeriha wi maahi ekhume vanlukuni vaavaa awo yaaryaayano nthanana, nave mwaahaaleela wi yaahaala ovolowa ni okuxa elapo yeeyo mwaalipenlaanyu* waavaha.

16 “Nyenya, makholo ahu yaaheera ichu mwawiirumiha. Awo yaahikhala awiikhoma nave hiyawiriyanne ikano sanyu. 17 Awo yaakhooca owiriyana, nave hiyaawuupuwenle miteko sootikhiniha seiho mwenraanyu wa yaawo, nyenya awo yaakhala awiikhoma nave emuthanla muhooleli wi ekookele wookapuroni o Yikuputu. Nto nyuwo mwa Muluku ori ooreheryeya okhurumuwela,* a niphwanya* ni aikharari, oopixa murima* ni oosareya osivela woororomeleya,* nave himwawaanyanyanle. 18 Naamwi yiipakenle yoophwaniherya* ya emetaale ya mwaasaana a emope, enaloca eriki: ‘Ola Muluku anyu, ookuminheeni o Yikuputu,’ nave awo yeerano ichu itokweene ehoocicimihakaani, 19 wa nthowa na ikharari sanyu itokweene, himwaanyanyanle otakhwani. Himwaawaankhe neeku naweemela nenlo naahoola othana mumphironi, naari mooro, yoowo waamwaleela mumphironi yaaphwanelaaya oviramo. 20 Nave nyuwo mwaahaavaha munepa anyu waphaama wi yeereke ichu mwa miruku, himwaawatihenrye mana anyu nave mwaahaavaha maahi vaavaa yaaryaayano nthanana. 21 Mu iyaakha makhumi maxexe mwaanaavaha yoolya mutakhwani. Hiyaavo yaathowa. Soowara saya hisaahuwa, nave meco saya hisiipa.

22 “Mwaahaavaha omwene ni achu, mwaakawelaka ilapo; mwawiihiiha awo yaahikusa elapo yo Sihoni, ela tiwi, elapo ya mwene o Hisponi, nave tho elapo ya o Oki, mwene o Pasa. 23 Nave mwaaheeriha wi anamwane aya yaace ntoko itheneeri sa wirimu. Mwaahaakeriha mu elapo yeeyo mwaaroromelinhaanyu makholo aya wi awo yaahaala ovolowamo ni okuxa. 24 Mwawiihiiha, anamwane aya yaavolowa ekuxa elapo, nave nyuwo mwaawana ni Akanani vamiithoni vaya, yaawo yaari akaneene a elapo yeele, nave mwaahaaveleela mmatani mwaya, mamwene aya ni achu yaakhala mu elapo yeeyo, wi Aisarayeli eweereleke yeeyo yaakhwelaaya. 25 Awo yaakuxa ipooma soolipihiwa ni ilapo* sawuucelana, nave ekuxa ipa saasaren’ye ni ichu saphaama sa mukhalelo ori woothene, ihime soothimpwa sene, miri sa uuva, sa oliveira ni miri sinavaha sawiima sawaaca. Mwa yeeyo awo yaalya, evona, eneneva ni opuha oreera wanyu murima otokweene.

26 “Nyenya, awo yaakhala oohiiwelela ni woomwareelaani, nave yaakakhela oculi Malamulo anyu.* Yaawiipha alipa miririmu anyu, yaawo yaalopola wi yookookeleeni, nave yaapaka ichu itokweene ehoocicimihakaani. 27 Wa nthowa na yeeyo, mwaahaavonyerya mmatani mwa amwiicani aya, yaawo yaaruuhela makacamiho. Nyenya awo yaanakhuwela wa nyuwo mu elukuluku ya sookacamiha, nave nyuwo mwaanawiiwa orweela wirimu. Wa nthowa na ikharari sanyu itokweene, mwaanaavaha alipa a woopola wi yaavuluxe mmatani mwa amwiicani aya.

28 “Nto vaavaa awo yaakhalaaya mmureceleni, yaanakookela weera echu yoonanara vamiithoni vanyu. Nave nyuwo mwaanaanyanyala mmatani mwa amwiicani aya, yaawo yaahooxa. Voocharela, awo yaanakooka enakhuwela wa nyuwo evekaka nikhaviheryo, nave nyuwo mwaanawiiwa orweela wirimu ni waavuluxa wiiliwiili wa nthowa na ikharari sanyu itokweene. 29 Naamwi nyuwo mwaalopola wi ekookele Malamulo anyu, awo yaanakhala a wiirumiha nave hiyaachuna owiriyana ikano sanyu. Yaachekela mathoriheryo anyu, yaawo enahaala omvaha muchu okumi wakhala wi ohiiwelela. Awo yaari oohiiwelela yoorukunuwelakaani, yaari awiikhoma nave hiyaachuna woowiriyanaani. 30 Mwaari oopixa murima ni yaawo mu iyaakha sincipale nave mwaatitelela waalopola moorweela wa munepa anyu mwaapharihelaka alipa a miririmu; nyenya awo yaakhooca owiriyana. Vookuchula vaya, mwaahaaveleela mmatani mwa achu a ilapo soorukurerya. 31 Wanthowa na ikharari sanyu itokweene, nyuwaano himwaatolonxe yaawo, naari waanyanyala, woona wi nyuwaano mwa Muluku a niphwanya* ni a ikharari.

32 “Vano khwoo, Muluku ahu, Muluku mutokweene, oowerya, ni awoopiha yoowo onakhapelela nlakano nawe ni wooniherya osivela woororomeleya, muhinikhalihe moohiyana wa nthowa na makacamiho oothene yaala eniphacuwenle, wa mamwene ahu, wa ahooleli ahu, wa alipa mukucho ahu, wa alipa a miririmu ahu, wa makholo ahu, ni wa achu anyu oothene ovinyerya mmahiku a mamwene o Asiriya ophiyerya olelo. 33 Nyuwaano mwaari awookololowa wa soothene seiho saaniphacuwela woona wi mwaaneerano ichu moororomeleya; nyenya hiyaano neenreno ichu soonanara. 34 Vooloca sa mamwene ahu, ahooleli ahu, alipa a mukucho ahu ni makholo ahu, awo hiyiiwelenle nlamulo nanyu naari othokororya ikano sanyu naari sawuupuxerya sanyu seiyo mwaalopolaanyuno. 35 Naamwi vaavaa awo yaaryaaya mu omwene anyu, epuhaka oreera murima yoowo moonihenryaanyu wa yaawo, mu elapo etokweene ni yawuucelana mwaavanhaanyu, awo hiyoorumeenleeni nave hiyaahin’ye meecelo aya oonanara. 36 Vano hiyo na akapuro olelo, aa, na akapuro mu elapo yeeyo mwaavanhaanyu makholo ahu wi elye sawiima ni ichu saphaama sa mummo. 37 Soolya sawaaca elapo yeela enavahaaya inakerihiwa wa mamwene yaawo munruuhenlaanyu wa nthowa na soocheka sahu. Awo annanlamulela hiyaano* ni mihuwo sahu ntoko enachunelaaya, nave hiyaano ninnahooxeya vancipale.

38 “Mwa soothene seiha, ninnapaka yoororomeliha yeeparipari moorweela wa wiimurepa, nave eyo enneereliwa onamoona ni eseelu ya ahooleli ahu, Alevi ahu, ni alipa mukucho ahu.”

10 Yaale yeerenle onamoona moorweela wa okuhavo eseelu aya yaari:

9 Nave tho Alevi: Yesuwa, mwaana a Asaniya, Penuwi, a anamwane a Henatati, Katemiyeli. 10 Nave asinnaya: Sepaniya, Hotiya, Kelita, Pelaiya, Hanani, 11 Mika, Rehopi, Hasapiya, 12 Sakuri, Serapiya, Sepaniya, 13 Hotiya, Pani, ni Peninu.

14 Ahooleli a achu: Parosi, Pahati-mowape, Elami, Satu, Pani, 15 Puni, Asikati, Pepai, 16 Atoniya, Pikivai, Atini, 17 Ater, Esekiya, Asur, 18 Hotiya, Hasumi, Pesai, 19 Harifa, Anatoti, Nepai, 20 Makipiya, Mexulami, Eser, 21 Mesesapeli, Satoki, Yatuwa, 22 Pelatiya, Hanani, Anaiya, 23 Hoseiya, Hananiya, Hasupi, 24 Halohesi, Piliha, Sopeki, 25 Rehumi, Hasapina, Maseya, 26 Aixa, Hanani, Anani, 27 Maluki, Harimu ni Pani.

28 Achu akina yaaphitaanyerya alipa a mukucho, Alevi, alipeleli a milako, alipa a wiipa, anamuteko a empa ya Muluku,* ni oothene yaale yiimwalannye mwa achu a ilapo wi echare Nlamulo na Muluku eeparipari, vamoha ni asaaraya, anaaya aasilopwana ni aasithiyana, ni oothene yaale yaarino masuwelelo ni wiiwexexa.* 29 Awo yaakhala vamoha ni asinnaya, ahooleli aya nave yaalipela yiisuulumelaka wi yaahaala ocharaka Nlamulo na Muluku eeparipari nenlo naavahiwe moorweela wa Mose, mulapeli a Muluku eeparipari, nave wi awo yaahaala wiiwelelaka ikano soothene sa Yehova, Apwiya ahu, mathoriheryo awe ni mahusiheryo awe. 30 Hinaavaha anamwane ahu aasithiyana achu a ilapo soorukurerya, naari anamwane ahu aasilopwana hiyaathela anamwane aya aasithiyana.

31 Wakhala wi achu a ilapo soorukurerya aaruuha maroca aya ni soolya sa mukhalelo woothene wi etumihe* nihiku na Sapata hinnahaala othuma* echu wa yaawo mu nihiku na Sapata naari mu nihiku naweela. Nave tho nnahaala ovahaka soohepha sa eyaakha yaneethanu napiili ni olevelela ivaale soothene ihalenle.

32 Ohiya yeeyoru, mmoha ti mmoha a hiyo oolipela wi onahaala ovahaka vayaakhani makupa aneeraru a esiikulu,* ntakhara muteko wa empa ya Muluku ahu, 33 ipaau sootheteiwa, sooveleela sa soolya soohihiyererya, sooveleela soopahiwa soohihiyererya sa Sapata ni sa mweeri muvyaani; ni ifesta saalakeleliwe, ntakhara ichu saweela, soovaha sa soocheka wi ixipihiweno soocheka sa Isarayeli nave ntakhara muteko woothene wa empa ya Muluku ahu.

34 Nave tho noheeyerya ehako wi nlakelele elukuluku taani ya vayaakhani ahooleli a ichoko sa alipa a mukucho, Alevi, ni achu anaphwanelaaya oruuha ikhuuni o empa ya Muluku ahu eyaakha ti eyaakha. Ikhuuni seiho inahaala opahiwaka va altare a Yehova Muluku ahu, mwawiiwanana ni yeeyo erempwe mu Nlamulo. 35 Eyaakha ti eyaakha, nnahaala oruuhaka mu empa ya Yehova, sawiima soopacerya sa mmacani mwahu ni sawiima soopacerya sa mwiri wa mukhalelo woothene, 36 vamoha ni oopacerya oyariwa a anamwane ahu aasilopwana ni sa muhuwo ahu mwawiiwanana ni yeeyo erempwe mu nlamulo, ni asaana oopacerya oyariwa a imope sahu ni ipucepuche sahu. Nnahaala waakeriha mu empa ya Muluku ahu, wa alipa a mukucho yaawo anarumeela mu empa ya Muluku ahu. 37 Ohiya yeeyoru, nnaphwanela okerihaka wa alipa a mukucho, mapuro ookhapelelamo* a empa ya Muluku ahu, mulepulo wa ephepa ahu, sooveleela sahu, sawiima sa mwiri wa mukhalelo ori woothene, eviinyu evyaani ni makhurwa, vamoha ni saneekhumi sa soohepha sa mmacani mwahu wi naakerihele Alevi, woona wi Alevi annaakhela makupa aneekhumi sa yeeyo naanlaahu mmacani mu ipooma sahu soothene.

38 Nave mulipa a mukucho, mwaana a Aroni, onaphwanela okhala ni Alevi vaavaa Alevi anathukumanyaaya yaneekhumi; nave wa makupa aneekhumi yaala, Alevi anaphwanela ovaha yaneekhumi mu empa ya Muluku ahu, mu isaala* sa mapuro ookhapelelamo. 39 Woona wi ti mapuro ookhapelelamo* yaala Aisarayeli ni anamwane a Alevi anaphwanelaaya okerihakamo sooveleela saya sa soolya, eviinyu evyaani ni makhurwa, nave ti muumu irimomo ikaruma sa nipuro naweela, alipa a mukucho analapaayamo, alipeleli a milako ni alipa a wiipa. Hineemererya wi empa ya Muluku ahu enyemuliwe.

11 Ahooleli a achu yaakhala o Yerusalemu; nto achu akina oohalela yaahaavya ehako, wa alopwana khumi wi mmoha akhaleke o Yerusalemu epooma yaweela eniiha akina athanu naxexe ekhalaka mu ipooma ikina. 2 Ohiya yeeyoru, achu yaahaareeliha alopwana oothene yaawo yiivamhe wi ekhaleke o Yerusalemu.

3 Ala ahooleli a eprovinsiya* yaawo yaakhala o Yerusalemu. (Aisarayeli akina, alipa a mukucho, Alevi, anamuteko a empa ya Muluku,* ni anamwane a anamuteko a Solomoni, yaakhala makupa makina a ipooma so Yuta, mmoha ti mmoha mu nipuro nawe na epooma awe.

4 Nave tho yaakhalavo achu akina yaakhala o Yerusalemu o Yuta ni a Penxami.) Achu o Yuta yaari Ataiya mwaana a Usiya, mwaana a Sakariya, mwaana a Amariya, mwaana a Sefatiya, mwaana a Mahaleli, a anamwane a Peresi; 5 nave Maseya, mwaana a Paruki, mwaana a Kolihosi, mwaana a Haseiya, mwaana Ataiya, mwaana a Yehorapi, mwaana a Sakariya, mwaana a Selanita. 6 Anamwane oothene a Peresi yaawo yaakhala o Yerusalemu yaari masana maxexe makhumi mathanu nammoha ni achu athanu naxexe,* yaawo yaari alopwana oowerya.

7 Nave achu o Penxami yaari ala: Salu mwaana a Mexulami, mwaana a Yoweti, mwaana a Petaiya, mwaana a Kolaiya, mwaana a Maseya, mwaana a Itiyeli, mwaana a Xesaiya; 8 Kapayi ni Salayi, yaari masana mathanu namaxexe makhumi meeli ni achu athanu nararu.* 9 Yoweli mwaana a Sikiri, aari muhooleli aya, nave Yuta mwaana a Hasenuwa, aari muhooleli anaawiili a epooma.

10 Anamukucho: Yetaiya, mwaana a Yohirapi, Yakini; 11 Seraiya mwaana a Hilikiya, mwaana a Mexulami, mwaana a Satoki, mwaana a Merayoti, mwaana a Itupi, muhooleli a empa ya Muluku eeparipari, 12 ni asinnaya yaawo yaaphara muteko wa empa, yaari masana mathanu namararu makhumi meeli ni achu apiili;* Ataiya mwaana a Yerowawu, mwaana a Pelaliya, mwaana a Ansi, mwaana a Sakariya, mwaana a Pasuri, mwaana a Malkiya, 13 ni asinnawe, ahooleli a ichoko, yaari masana meeli makhumi maxexe ni achu apiili;* nave Amasayi mwaana a Asareli, mwaana a Asai, mwaana a Misilimoti, mwaana a Imeri, 14 ni asinnaya yaari nsana nimoha makhumi meeli ni achu athanu nararu* yaawo yaari alopwana awuupa ni oolipa murima; nave muhooleli aya aari Sapatiyeli, mmoha a emusi yoovuwa.

15 Nave Alevi: Simeiya mwaana a Hasupi, mwaana a Asirikami, mwaana a Hasapiya, mwaana a Puni; 16 Sapatai ni Yosapati yaari ahooleli a Alevi, yaawo yaavareryela miyaha sa vaate va empa ya Muluku eeparipari; 17 Mataniya, mwaana a Mika, mwaana a Sopati, mwaana a Asafi, aari muhooleli a macipo a othamalela yaaphariheliwa elukuluku ya mavekelo a othamalela vamoha ni Pakipukiya anaawiili a asinnawe, ni Apita, mwaana a Samuwa, mwaana a Kalali, mwaana a Yetutumi. 18 Alevi oothene mu epooma yaweela yaari masana meeli makhumi mathanu namararu ni Alevi axexe.*

19 Alipeleli a milako: Akupi, Talimoni, vamoha asinnaya yaari nsana nimoha makhumi mathanu nameeli ni alopwana eeli.*

20 Aisarayeli akina, alipa a mukucho ni Alevi yaari mmakupa oothene o Yuta, mmoha ti mmoha mu elapo awe yoohiyeryiwa. 21 Anamuteko a empa ya Muluku* yaakhala o Ofeli, nave Siha ni Kispa yaari ahooleli a anamuteko a empa ya Muluku*

22 Muhooleli a Alevi o Yerusalemu aari Usi mwaana a Pani mwaana a Hasapiya mwaana a Mataniya mwaana Mika, a anamwane a Asafi, alipa a wiipa; owo aavareryela muteko wa empa ya Muluku eeparipari. 23 Mwene aatikitherya nlamulo wi nihiku ti nihiku ithokororyiweke soothowa sa alipa a wiipa. 24 Nave Petaiya mwaana a Mesesapeli mwaana a Sera mwaana Yuta aari namiruku a mwene* mmiyaha soothene saavolowela achu.

25 Vooloca sa miceche saamakiwe ni imaca saya, achu akina o Yuta yaakele omaka o Kiriyati-harpe ni mmiceche saya soorukurerya, o Tiponi ni miceche saya soorukurerya, o Yekapeseli ni mmiceche saya soomakiwa; 26 o Yesuwa, o Molata, o Petepeleti, 27 o Hasari-suwali, o Persepa ni mmiceche saya soorukurerya; 28 o Sikalaki, o Mekona, ni miceche saya soorukurerya; 29 o Eni-rimoni, o Sora, o Yarimoti, 30 o Sanowa, o Atulau, ni mmiceche saya soomakiwa; o Lakixi ni imaca saya, o Aseka, ni mmiceche saya soorukurerya. Awo yaamanke o Persepa ophiyerya o Mpopa Hinomi.

31 Nave achu a Penxami yaari o Kepa, o Mikimasi, o Aixa, o Peteli, ni mmiceche saya soorukurerya; 32 o Anatoti, o Nepi, o Ananiya, 33 o Hasori, o Rama, o Kitayami, 34 o Hatite, o Sepowimi, o Nepalati, 35 o Lote ni o Ono, o mpopa wa alipa oohana. 36 Nave makhuuru makina a Alevi o Yuta yaathanleliwe o Penxami.

12 Alipa mukucho ni Alevi yaawo yaakoonke ni Soropapeli mwaana a Saltiyeli, ni Yosuwa yaari ala: Seraiya, Yeremiya, Estra, 2 Amariya, Maluki, Hatusi, 3 Sekaniya, Rehumi, Meremoti, 4 Itu, Kenitoi, Apiya, 5 Miyamini, Matiya, Pilka, 6 Semaya, Yoyaripe, Yetaiya, 7 Salu, Amoki, Hilikiya ni Yetaiya. Ala yaari ahooleli a alipa a mukucho ni asinnaya mmahiku a Yesuwa.

8 Alevi yaari Yesuwa, Pinuwi, Katemiyeli, Serapiya, Yuta, ni Mataniya, yoowo aahoolela macipo a othamalela vamoha ni asinnawe. 9 Pakipukiya ni Uni, yaawo yaari asinnaya, yaakhala ohoolo waya, erumeelaka ntoko alipeleli.* 10 Yesuwa aamuyara Yowakimi, Yowakimi aamuyara Eliyasipi nave Eliyasipi aamuyara Yoyata. 11 Yoyata aamuyara Yonata, nave Yonata aamuyara Yatuwa.

12 Mmahiku a Yowakimi, alipa a mukucho ni ahooleli a imusi yaari ala: Meraiya a echoko ya Seraiya; Hananiya a echoko ya Yeremiya; 13 Mexulami, a echoko ya Estra; Yehohanani, a echoko ya Amariya; 14 Yonata a echoko ya Maluki, Yosefe, a echoko ya Sepaniya; 15 Atina, a echoko ya Harimu; Helkai, a echoko ya Meraiyote; 16 Sakariya, a echoko ya Itu; Mexulami, a echoko ya Kinetoni; 17 Sikiri, a echoko ya Apiya; . . . ,* a echoko ya Miniyamini; Pilitai, a echoko ya Mowatiya; 18 Samuwa, a echoko ya Pilka; Yehoyanata, a echoko ya Simeiya; 19 Matenai, a echoko ya Yoyaripe; Usi, a echoko ya Etaiya; 20 Kalayi, a echoko ya Salai; Eperi, a echoko ya Amoki; 21 Hasapiya, a echoko ya Hilikiya nave Netaneli, a echoko ya Etaiya.

22 Ahooleli a ichoko sa Alevi, ni sa alipa a mukucho, yaarepeliwa mmahiku a Eliyasipi, Yoyata, Yohanani ni Yatuwa, ela tiwi, ophiyerya mmahiku a olamulelo wa Tariyu, o Persiya.

23 Alevi yaawo yaari ahooleli a ichoko yaarepeliwa mu liivuru a orepela saweereya ophiyerya mmahiku a Yohanani mwaana a Eliyasipi. 24 Ahooleli a Alevi yaari Hasapiya, Serapiya ni Yesuwa, mwaana a Katemiyeli; nave asinnaya yaakhala oohoolo wa yaawo, nikhuuru nimoha na alipeleli mmakupa a nikhuuru nikina na alipeleli, wi emucicimihe ni omuthamalela Muluku moorweela wa macipo mwawiiwanana ni mahusiheryo a Tavite muchu a Muluku eeparipari. 25 Mataniya, Pakipukiya, Opatiya, Mexulami, Talimoni ni Akupi ti yaarino murici wa okhapelela mapuro a sooveleela yaakhala waacamela mmilakoni. 26 Awo yaahirumeela mmahiku a Yowakimi, mwaana a Yesuwa, mwaana a Yosataki, ni mmahiku a Nehemiya Mulamuleli, ni Estra mulipa a mukucho ni mulipa oorepa.

27 Yaaphiyenryaaya elukuluku ya ohuleliwa* ixiri so Yerusalemu, yaahaavyiwa Alevi nave ekerihiwa o Yerusalemu mmapuro oothene yaakhalaayamo wi moohakalala echapele ohuleliwa wa ixiri, yiipaka macipo a othamalela, echarihaka ni apankwe, ikaruma sooruma, ni achakare. 28 Nave anamwane a alipa awiipa* yaathukumana, ekhumaka mu epooma,* makupa oothene a Yerusalemu miceche seiho saamakiwe ni achu o Netofa-hatita, 29 o Pete-xilkali, o imaca sa Xepa ni Asimaveti, woona wi alipa a wiipa yaamanke orukurerya makupa oothene a Yerusalemu. 30 Nave alipa a mukucho ni Alevi yaahiiseeliha, ni yeeliha tho nloko, masele ni ixiri.

31 Voocharela, kaahaaweliha ahooleli o Yuta vasulu va ixiri. Ohiya yeeyoru, kaarehererya makhuuru meeli matokweene a alipa wiipa macipo oothamalela ni makhuuru meeli wi yaachareke. Nikhuuru nimoha naaya o moono woolopwana, vasulu va exiri, mmakupa a milako sa Miyaako sa Ecuurwa. 32 Hosaiya ni eriyari ya ahooleli o Yuta yaanaachara mmaculi, 33 vamoha ni Asariya, Estra, Mexulami, 34 Yuta, Penxami, Semaya ni Yeremiya. 35 Vamoha ni yaawo yaakhalavo anamwane akina a alipa mukucho erino mapenka: Sakariya, mwaana a Yonata, mwaana a Semaya, mwaana a Mataniya, mwaana a Mikaiya, mwaana a Sakuri, mwaana a Asafe, 36 ni asinnawe Semaya, Asareli, Malalai, Kililai, Mayi, Netaneli, Yuta ni Hanani. Awo yaapharihela ikaruma sa macipo sa Tavite, muchu a Muluku eeparipari; nave Estra mulipa oorepa, aanaya ohoolo waya. 37 Yaaphin’yaaya va Mulako wa Maahi, yaaheeca eyaaka ohoolo ewelaka exiri, eviraka vasulu va Eskata ya Epooma ya Tavite ni vasulu va Empa ya Tavite nave yaaheeca ophiyerya o Mulako wa Maahi, makupa onakhumawo nsuwa.

38 Nikhuuru nikina na alipa awiipa macipo oothamalela naakele makupa makina,* nave miyaano ni eriyari ya achu naanaachara, niviraka va exiri yoorakama ya Muconco wa Efornu, ophiyerya o Exiri Yawunnuwa 39 ni o Mulako wa Efraimu, o Mulako wa Epooma Yakhalai, o Mulako wa Ihopa, o Muconco wa Hananeli, o Muconco wa Meya, ni o Mulako wa Ipucepuche, neemelaka o Mulako wa Mulipeleli.

40 Vookuchula makhuuru meeli yiipa macipo oothamalela yaaheemela ohoolo wa empa ya Muluku eeparipari ni miyaano vamoha ni eriyari ya ahooleli, 41 ni alipa mukucho Eliyakimi, Maseiya, Miniyamini, Mikaiya, Eliyohenai, Sakariya ni Hananiya, epharenle mapenka, 42 nave tho ni Maseya, Semaya, Eliyasare, Usi, Yehonani, Malkiya, Eleyawu ni Eser. Nave alipa a wiipa yaaniipa moovuwa ehooleliwaka ni Isaraiya.

43 Mu nihiku nenlo, awo yaavaha mikucho mitokweene moohakalala, woona wi Muluku eeparipari aahiweeriha okhala oohakalalaxa. Nave tho athiyana ni anamwane yaanahakalala, nave ohakalala wo Yerusalemu waaniiweya ocai wene.

44 Mu nihiku nenle, yaathanliwa alopwana wi evareryeleke nipuro nookhapelelamo sooveleela, sawiima soopacerya ni saneekhumi. Awo yaanathukumanya seiho saaruuhiwa mu imaca sa ipooma mwawiiwanana ni yeeyo Nlamulo naalocaaya ntakhara alipa a mukucho ni Alevi, woona wi waakhalawo ohakalala o Yuta wa nthowa na alipa a mukucho ni Alevi yaaphara muteko. 45 Awo yaapacerya othokororya miteko sa Muluku aya ni meerelo a wiiseeliha; nave tho alipa a wiipa yaaheerano emohamoha vamoha ni alipeleli a milako, mwawiiwanana ni mahusiheryo a Tavite ni a mwanawe Solomoni. 46 Khalai, mmahiku a Tavite ni Asafe, yaakhalawo ahooleli* a alipa a wiipa nave tho yaakhalawo macipo oomucicimihano ni oomuthamalelano Muluku. 47 Mmahiku a Soropapeli ni mahiku a Nehemiya, Aisarayeli oothene yaanaavaha sooveleela alipa a wiipa, alipeleli a milako mwawiiwanana ni soothowa saya sa nihiku ti nihiku. Nave tho, awo yaanavalaanya sooveleela ntakhara Alevi; nave Alevi yaanavalaanya sooveleela ntakhara muyareriwo wa Aroni.

13 Mu nihiku nenle, aahaalakhanyiwa liivuru a Mose, achu oothene ewiriyanaka, nave yaaphwanyiwa makupa waarepiwevo wi Amoni naari Amowape hiyaaphwanela ovolowa mmulokoni wa Muluku eeparipari. 2 Tiwi, awo hiyaawaakhavihenrye Aisarayeli ni yoolya ni maahi, nyenya moohiyana yaamulimve Palamu wi awuulumele. Nto, Muluku ahu aaheeriha wuulumela okhala mareeliho. 3 Vaavaa yiiwalaaya nlamulo, Aisarayeli yaapacerya wiimwalanya ni achu a muyareriwo wa ilapo ikina.

4 Ehaakumve yeela, mulipa a mukucho aavareryela mapuro a okhapelelamo muhakhu* wa empa ya Muluku ahu aari Eliyasipi, mmusi a Topiya. 5 Owo aamvahererya Topiya nipuro ntokweene nookhapelelamo muhakhu,* nenlo khalai naaphariheliwa wi iheliwekemo sooveleela sa soolya, oliipanu, ikaruma, ni makupa aneekhumi a soolya, eviinyu esyaani ni makhurwa yaawo yaavahiwa Alevi, alipa awiipa ni alipeleli a milako vamoha ni sooveleela ntakhara alipa a mukucho.

6 Nave variyari va elukuluku yeele miyaano nkaari o Yerusalemu, woona wi kaakookenle wa mwene mu eyaakha ya makhumi mararu napiili ya mwene Artaxerxe o Papulu. Ohoolo waya kaahimveka mwene wi akeemererye opwaha. 7 Voocharela kaahikookela o Yerusalemu nave koona ichu soonanaraxa seiho Eliyasipi eenreiye. Owo ahimvaha Topiya nipuro nookhapelelamo muhakhu va n’yate na empa ya Muluku eeparipari. 8 Echu ene yeela, yaatepa okinanara, mwawiihiiha kaakumihamo mpa mmwe ichu soothene saari sa Topiya, kirihela vaate. 9 Voocharela, kaahaalamulela wi yeelihe mapuro ookhapelelamo muhakhu,* nave kaahikookiheryamo ikaruma sa mu empa ya Muluku eeparipari, vamoha ni sooveleela sa soolya ni oliipanu.

10 Nave tho, kaahoona wi Alevi hiyaakhela makupa aya, mwawiihiiha Alevi ni alipa awiipa yaawo yaaphara muteko yaarowa, mmoha ti mmoha aya analima mmacani mwawe. 11 Mwa yeeyo, kaapacerya waasamela ahooleli kiriki: “Ntakhara heeni muhin’yaanyu empa ya Muluku eeparipari enyemuwaka?” Voocharela kaahaathukumanya Alevi nave kaahaaruma okookela mmapuro aya a muteko. 12 Nave Ayuta oothene yaanaruuha makupa aneekhumi a soolya, eviinyu evyaani, ni makhurwa mmapuro ookhapelelamo muhakhu. 13 Voocharela, kaamuthanla Selemiya mulipa mukucho, Satoki mulipa oorepa ni Petaiya mmoha a Alevi wi evareryeleke mapuro ookhapelelamo muhakhu, nave Hanani mwaana a Sakuri mwaana a Matatiya aari mukhaviheryi aya, woona wi alopwana yaala yooniwa okhala oororomeleya. Murici aya waari waakawela asinnaya soolya saya.

14 Mukuupuwele miyo khwoo Muluku aka, vooloca sa yeela keenraaka, nave muhisipihe meerelo aka a osivela woororomeleya yoowo kipankaaka ntakhara empa ya Muluku aka ni miteko kipankaaka mwemmo.*

15 Mmahiku yaale, kaahiwoona achu o Yuta emvocaka uuva nihiku na Sapata nave emuteexaka va apuuru aya. Awo yanamuruuha viinyu, uuva, sawiima sa mukuukhu, ni maroca a mukhalelo woothene ekerihaka o Yerusalemu mu nihiku na Sapata. Mwawiihiiha kaahaalopola wi ehikuliheke soolya mu nihiku nenle.* 16 Nave achu o Tiru yaawo yaakhala o epooma yaanaruuha ihopa ni maroca a mukhalelo woothene, enaatumiherya achu o Yuta o Yerusalemu mu nihiku na Sapata. 17 Mwawiihiiha ,kaahaasamela achu oocicimiheya o Yuta nave kiloca ni yaawo kiriki: “Ntakhara heeni muneeraanyu echu yeela yootakhala, ophiyerya onyemula nihiku na Sapata?” 18 Apwanne tahi yeeyo makholo anyu yeeraaya, ophiyerya wi Muluku ahu anruuhela ipahu soothene vamoha ni epooma yeela tho? Nave munnaaceererya esara yoovarela ntakhara Isarayeli moorweela wa onyemula nihiku na Sapata.”

19 Mwawiihiiha, kaalamulela wi milako so Yerusalemu iwaliweke ohaakumve wiilavo, ela tiwi, nihaakumve opacerya nihiku na Sapata. Nave tho kaaloca wi ihihuliweke milako ophiyerya nihiku na Sapata, nave kaahaahelamo akhaviheryi aka mmilakoni wi alipa ootumiha ehivolowe mu nihiku na Sapata. 20 Mwa yeeyo, alipa a maroca ni alipa ootumiha maroca a mukhalelo woothene yaahikona vaate va Yerusalemu ekwaha emoha naari ikwaha piili. 21 Voocharela, kaahaalopola nave kiloca ni yaawo kiriki: “Ntakhara heeni munakonaanyu vaate wa ixiri? Wakhala wi mohuuluula kinahaala owiikaraani.” Ovinyerya elukuluku yeele oya ohoolo, awo hiyaarwiile mu nihiku na Sapata.

22 Nave kaahaaleela Alevi wi awo yaaphwanela wiiseelihaka moohihiyererya ni orwaaka wi elipeleleke milako, wi nikhapeleliweke nihiku na Sapata ntoko naweela. Mukuupuwele miyo wa nthowa na yeela, khwoo Muluku aka, nave mukooniherye ikharari sanyu ni osivela wanyu otokweene woororomeleya.

23 Mmahiku yaale tho kaawoona Ayuta yaawo yaathenle athiyana o Asitoti o Amooni, ni o Mowape. 24 Eriyari ya anamwane aya yaaloca Esitoti nave eriyari ekina yaaloca ilocelo sookhopela, nyenya haavo mmoha a yaawo aasuwela oloca elocelo ya Ayuta. 25 Mwawiihiiha kaahaasamela ni owuulumela, nave kaamana akina a yaawo, kiphola miihi aya nave kiweeriha olipela mu nsina na Muluku kiriki: “Nyuwaano himunaphwanela weemererya wi anamwane anyu aasithiyana etheliweke ni anamwane aya aasilopwana, nave tho hamunaphwanela weemererya wi anamwane aya aasithiyana etheliweke ni anamwane anyu aasilopwana naari nyeenyu ene. 26 Apwanne hiyaari yaawo yaamuchekinhe Solomoni, Mwene a Isarayeli? Variyari va maloko mancipale haarivo mwene aalikana ni yoowo; Muluku aanamusivela yoowo ophiyerya wi owo amweeriha okhala mwene a Isarayeli oothene. Nto asaariye a ilapo ikina yaamweeriha ocheka. 27 Onaweryeya hai wi nyuwaano munapaka yoocheka yeela etokweene, mweerakano ichu moohiroromeleya wa Muluku ahu moorweela wa waathela athiyana a ilapo ikina?”

28 Mmoha a anamwane a Xoiyata mwaana a Eliyasipi, muhooleli a alipa a mukucho aahikhala mukamwene a Sanipalati Muhoronita. Mwa yeeyo, kaamwiikarela ociiwene.

29 Khwoo Muluku aka nwuupuwele yaawo, wa nthowa na onyemula waya onamukucho ni waataana wa onamukucho ni wa Alevi.

30 Mwawiihiiha kaahiweeliha achu wa ichu soothene soothanyeya sa ilapo sookhopela nave kaahaavaha miteko alipa a mukucho ni Alevi, mmoha ti mmoha ni muteko awe; 31 Nave tho kaapaka marehereryo vooloca sa elukuluku yaalakeleliwe ya oruuha ikhuuni ni sawiima soopacerya. Khwoo Muluku aka mukuupuwele mwaphaama.*