MWAHA 4
Nthowa Nene Yarimeeliwaaya Vaate Vaya
NKOONANI yeeyo eneereya vano. Aatamu ni Haava anamwiikariwa mu emaca yooreera ya Eeteni. Mano munnasuwela nthowa nene?
Nthowa nawii aheera echu yoonanara vancipale. Nave Yehova ohaalaka nthowa na yeeyo. Mano munnasuwela wii ti yoonanara taani yeeyo Aatamu ni Haava yeenraaya?
Yeenre echu yeeyo Muluku aaleenliiye wii hiyaaphwanela weera. Muluku aaleenle wii elyeeke sawiima sa miri sa mmacanimmo. Nyenya aaleelatho wii sa mmoha wa miri hiyaaphwanela olya wii ehikhwe. Aahikhapelela mwiri ola ntakhara a yoowo mwaneene. Nave ninnasuwela wii ti woochekeya okuxa echu ya mwaneene, tahi hiihaa? Mano vanonto yeerenyee tiheeni?
Nihiku nikina, Haava ari meekheiye m’macanimmo, enowa yaahilochano. Nkuupuwelani! Eyo yaahimuleela Haava wii alye sa mwiri yoowo Muluku aakhoochiinhiye. Ahe, vaavaa Yehova aapankiiye inowa, haapanke wii iloceke. Va nthowa nenla, wanaphwanela okhala muchu mukina pahi eerinhe wii enowa eloce. Nyenya mano, taani?
Haari Aatamu. Va nthowa nenla, aanaphwanela okhala muchu yoowo Yehova aampankiiye muchuli vancipale ahaakumve opaka elapo yavathi. Muchweene yoowo aari mmoha a angelo, nihinaweryahu omoona. Mungelweene yoola aahiirumiha vancipale. Uupuwenle wii aanaphwanela okhala olamulela ntoko Muluku. Nave owo aachunne wii achu emwiiweleleke, mpuroni mwa omwiiwelela Yehova. Ti mungelweene yoola eerinhe wii enowa eloce.
Mungeloowo aahiwerya onwoka Haava. Vaavaa aamuleenliiye wii owo onahaala okhala ntoko Muluku, wakhala wii olya yawiima eyo, owo aaheemererya. Va nthowa nenla aahilya, navetho Aatamu aahilya. Aatamu ni Haava hiyaamwiiwelenle Muluku, nave va nthowa nenla yaarimeliwa vaate vaya vooreera vokhalavo ithutu.
Nyenya, Muluku onahaala opwacha wii elapo yoothene yavathi ekhaletho yooreera vancipale ntoko emaca ya Eeteni. Vachuli vaya nnahaala osuwela mummo nyuwo muniryaanyu mukhalele ni makupa mu eyo. Nyenya, vano, noone yeeyo yeerenyee wa Aatamu ni Haava.
Mapacereryo 2:16, 17; 3:1-13, 24; Yawupulula 12:9.