MWAHA 62
Sokachamiha Mpa Mwawe Mwa Tavite
VACHULI va Tavite apacenryeene olamulela mu Yerusalemu, Yehova ahimvaha opwaha vancipale va amwiicani. Yehova aari alakanneene waavaha aIsarayeli elapo ya Kaanani. Navento, ni okhaviherya Wawe, elapo yoothene yaalakaneriwaaya yaahiphiyerya okhala yawaya.
Tavite aari olamulela aphaama. Anamusivela Yehova. Va nthowa nenla, emoha ya ichu soopacerya, vachuli va waakha Yerusalemu, yaari oruuha ekaxa ya nlakano na Yehova. Nave owo aachuna oteka empa yooreera ntakhara a eyo.
Vavaa Tavite ainuwaliiye vancipale, aaheerano yoocheka etokotoko. Aanasuwela wii waari woochekeya okuxa echu yeeyo eri ya mwaneene. Nyenya, va ohiyu okina, aryeene vasulu va nchachoni vawe, aahimoona vathi vaya muthiyana ooreera. Nsina nawe aari Patesepa, nave aiyawe aari musurutatu awiichaniwa Uriya.
Tavite anamuchuna vancipale Patesepa, arumiha wii aruuhiwe onchachoni. Aiyawe yaari ochaiwene okhoconi. Tavite aahikonano, nave vachuli vaya aahisuwela wii onahaala omuyara mwaana. Tavite aahikachamiheya nave aahilamula wii muhooleli a muloko wakhochwaawe Yowapu, amukuhe Uriya vahoolo vakhoco wii aiphiwe. Vavaa Uriya aakhwiliiye, Tavite aahithelana ni Patesepa.
Yehova aahinanariwa vancipale ni Tavite. Va nthowa nla, aahimurumiha murummwaawe Natani wii aloceno sa soocheka sawe. Munnawerya omoona vale Natani alocaka ni Tavite. Tavite aahithanana vancipale sa yeeyo eenriiye, nave, va nthowa nla, Yehova haamwiiphale. Nyenya, Yehova aahi: ‘Okhala wii woheerano sootakhala iha, onahaala okhala ni sokachamiha sincipale mpa mwaa.’ Nave ti sookachamiha sawiihainto Tavite aariiyeno!
Voopacerya, aakhwiye mwaana a Patesepa. Vachuli vaya, mwaana oopacerya oyariwa a Tavite, Amnoni aahimukuxa murokorawe Tamare amuumeleliha okonano. Apusalamu, mwaana a Tavite, aahinanariwa vancipale, amwiipha Amnoni. Vachuli vaya, Apusalamu aahiphwanya weemeryeryiwa ti ancipale, nave akhuweleliwa wii akhale mwene. Vookuchula vaya, Tavite aahipwaha ekhochweeyo moovaanyihana ni Apusalamu, yoowo aiphiwe. Ayi, Tavite aahikhala ni sokachamiha sincipale.
Moovira wa elukuluku, Patesepa aahimuyara mwaana mukina, awiichaniwa Soolomoni. Vavaa Tavite uuluvanliiye navetho wiicheliwa, mwanawe Adonia aaheererya okhala mwene. Va ela, Tavite aahilamula wii mulipa ephepa Sadoki amiinele makhurwa vamuruni va Soolomoni, wii athoonyerye wii ola aahala okhala mwene. Elukuluku vakhaani vachuli vaya, Tavite aahikhwa arino iyaakha 70. Aalamulenle mu iyaakha 40, nyenya, mwawihiihaa Soolomoni aahikhala mwene a Isarayeli.
2 Samuwele 11:1-27; 12:1-18; 1 Mamwene 1:1-48.