MWAHA 101
Wiiphiwa Wa Yesu
NKAWEHANI echu yawoopiha eyo! Yesu onamukhwa. Okhomeliwe va mwirini. Mithipo yomuthorola matata ni manani. Mano muchu ii amwerelele eheeni Yesu hiiha?
Saahereya ntakhara wii akina yaanamwiicha Yesu. Mano munnasuwela wii taani? Mmoha a yaawo aari mungelo oonanara, Satana, Musaserya. Ti yoowo aawenrye omweriha Aatamu ni Haava ohimwiiwelela Yehova. Nave ti Satana yoowo aawerinhe amwiicani a Yesu weerano epahu yawoopiha ela.
Nari ehakumve omukhomela Yesu vamwirini, amwiicani awe yaahimwerela yoowo sootakhala. Mano munnupuwela sa mummo yaarwenlaaya o emaca ya Getsemane ni omphara yoowo? Mano amwiichanene yaawo yaari taani? Ayi, yaari ahooleli a mathamalelo. Hinkoni noonento vano yeeyo yeerenyee.
Vavaa Yesu aaphariwiiye ni ahooleli a mathamalelo, arummwaawo yaahichawa. Yahimuhiya Yesu mekheiye ni amwiicani awe ntakhara wii yamoova. Nyenya, arummwa awo Petro ni Yohane hiyakele ochaiwene. Yanamuchara Yesu muchuli, wii yoone yeeyo yii yereye.
Alipa a ephepa awo yaahimukeriha Yesu wa mutokweene Anasi, yoowo aari mutokweene a alipa a ephepa khalai. Muloko wa achu owo hiwaalekenlewo. Yaahimukeriha Yesu ompa wa Kayafa, yowonto vano aari mutokweene a alipa a ephepa. Ahooleli ancipale a mathamalelo yaahithukumana mpa mwawe.
Yaahimuthoriha mpa mwa Kayafa. Yahaaruha achu wii ethoriheke sawotha vooloca sa Yesu. Ahooleli oothene a mathamalelo yaahi: ‘Yesu onaphwanela wiiphiwa.’ Yaahimutapherya mara withoni ni ommana ni makofi.
Iha sereya Petro ari vaate vachachoni. Wari ohiyu woorirya, nave achwaawo yahiisela mooro. Yoraka mooro owo, murummwa mmoha mwamuthiyana aahinweha Petro nave aahi: ‘Muchu olatho aari vamoha ni Yesu.’
‘Hooye, tahi yomi!’ aahaakhula Petro.
Ikwaha raru muchu alocaka wa Petro wii owo aahecha ni Yesu. Nyenya, ekwaha eri yoothene, Petro ariye hiyaari eeparipari. Mu ekwaha yaneeraru, Yesu aahirukunuwa nave aahimuweha yoowo. Petro aahithanana okhala alonceene sawootha nave aahivinyavo anlaka.
Vavaa nsuwa nakhummaya, nihiku naneethanu wooxixelo, alipa a ephepa yaahimukuxa Yesu emukeriha o nipuro naya ntokotoko na nikhuche vanchachoni ya Sineedrio. Yaahivanela wiiwo vooloca sa yeeyo yaphwanelaaya weera wa yoowo. Yaahimukeriha yoowo wa Pontio Pilato, oolamulela a o mpopa ya Yudeya.
Alipa a ephepa awo yaahimulela Pilato yii: ‘Muchu ola tootakhala, onaphwanela wiiphiwa.’ Vachuli va omukoha-koha Yesu, Pilato aahi: ‘Nkinonaru yoonanara enriiye.’ Vanonto Pilato aahimurumiha Yesu wa Herode Antipa. Herode aari oolamulela a o Galileya, nyenya aari o Yerusalemu. Herode hoonneru nari vakhaniru yoonanara eri yoothene wa Yesu, nave aahimurumiha okookela wa Pilato.
Pilato aachuna omutaphula Yesu. Nyenya amwiicani a Yesu yaachunne wii amutaphule amukariposo mukina mu nipuroni mwawe, mulipa oohuhula Baraba. Waarinto vano othana, nave Pilato aahimukumiherya Yesu vaate. Ahi wa achwaawo: ‘Nkonani! Mwenaanyu!’ Nyenya alipa a ephepa atokotoko yaahikhuwela: ‘Mwiipheni!’ Hiihaa, Pilato aahimutaphula Baraba, nave awo yaahimukuxa Yesu wii emwiiphe.
Moohilekela, oxekuwa wa nihiku naneethanu, Yesu aahithomeiwa va mwirini. Himuwerya owoona veerukuni va, nyenya o makupa ari oothene a Yesu wahikhalawo muchu aweera soonanara, aritho vamwirini wii akhwe. Elukuluku vakhaani Yesu ahikhwiile, mmoha a alipa aweera soonanaraawo ahi wa yoowo: ‘Kupuweleni munavolowanyu omwene anyu.’ Nave Yesu aahaakhula: ‘Chiri kinaloca ni weyo, onarwa okhala ni miyo m’Paradaiso.’
Mano nlakano nlo hinri nootikiniha? Mano munnasuwela sa paradaiso yoowo Yesu aamulonchiiye? Mano paradaiso yoowo Muluku ampankiiye voopacerya aari woowi? Ayi, veelaponi yavathi. Nave vavaa Yesu oniiryiye akhale mwene wirimu, onahaala omukookiherya muchuula wukumini, wii akhale m’Paradaiso ahihano veelaponi yavathi. Mano hinnahakalala ni ela?
Mateyu 26:57-75; 27:1-50; Luka 22:54-71; 23:1-49; Yohane 18:12-40; 19:1-30.