Mapacereryo

“Kuununwe mu mwamucheche Eporoviinsia ya onaya echeku yamurupi,” onnaloca Dauda, o Serra Leoa. “Vaavaa miyo kireene mmiravo, mu ekhwaha emoha waahikhalavo waakhulana wa echokwaahu ni echoko ekina nthowa na emaca. Ichoko soopiili saaloca ntakhara emaca emoharu eyo wi tiyawaya. Wi omalihiwe mulachu owo ahaavyiwa mukhwiri. Mukhwiri ola aahihela esipelyo mmatani mwa mulopwana mmoha, vachuli vaya ahimukhuneela ni ekuwo yaweela. Mulopwanoowo mpuwa mwa ekuwo eyo, mwa waakuveya ahipacerya othukumela ni otothowa. Vaavaa aavarenreiye mpuwa mwa esipelyo eyo, owo ahikhuwela: ‘Kiinnamoona mwamuhumu onaachamela! Owo owanre saweela. Toorakama ni awuuluvala, a ipwi, nave oneecha okulameene.’

“Owo aathoriha ataata! Vaavanto ahinanariwa vancipale nave akhuwela: ‘Wakhala wi hamuneemererya kinalocaaka, rwaani moone ni miitho anyu!’ Mwa ooyariwa, haavovo ni mmoharu a hiyo aalimpe murima weerano eyo! Mukhwiri owo aahimmaliha ammiseryaka soopweseherya sawiisachiherya sa makukhu ni maahi yaari mu ekahi aapharenleiye mmatani.

“Elocaka moorweela mwa mulopwana aapharenle esipelyo eyo, ‘ataata’ yaahiloca wi emaca eyo yaari ya echokwaahu. Owo ahiloca wa amunna wi awo yaanaphwanela olima emaca moohuukhuwa. Echoko ekina eyo yahemererya yeeyo yuulummwe. Hiihaa mulachu owo wahithorihiwa.”

Ichu sawihiihaa iri sawinlaana o Afrika Onaneela nsuwa. Weiwo ntoko makupa makina a elapo, achu oohalakhanyeya masana masaneene waakhulela masana masaneene annaroromela wi achu ookhwa anaya o elapo onakhalawo minepa, eri weiwo annawerya woona ni ovolowela okumi wa achu veelaponi yavathi. Mano yoororomela yeela ti yeeparipari? Achu ookhwa ari akumi chiryene? Wakhala wi tahi akumi, taani awo aniisera okhala minepa sa achu ookhwa? Osuwela waakhula weeparipari makoho ala eri echu yoochuneyaxa. Ola mwaha wa okumi nari okhwa.