Yohuserya 6
Omwene Wa Muluku Eheni?
Onakhala wowi Omwene wa Muluku? (1) Mwenene tani? (2)
Akhalavo akina anahala olamulela ni Mwene? Mwawihiha, ari ahayi? (3)
Eheni enthonyerya wii nnakhala mmahiku okutchula? (4)
Omwene wa Muluku onahala opaka eheni muholo nthowa na atchu? (5-7)
1. Vava Yesu ariye velaponi yavathi, owo ahahusiha ohuseryawe oveka Omwene wa Muluku. Olamulelo epoma enlamuleliwa ni mwene. Omwene wa Muluku epoma ya vamekhaya. Etikitheriwe wirimu nave enahala olamulela elapo ela yavathi. Enahala weliha nsina na Muluku. Enahala weriha wii yotchuna ya Muluku yereye velaponi ntoko hiha ekhalenlaya wirimu.—Mateyu 6:9, 10.
2. Muluku olaiherya wii Yesu onahala okhala Mwene mu Omweneawe. (Luka 1:30-33) Vava Yesu ariye velaponi yavathi, aherela onamona wii ahala okhala Oolamulela, ekhaikhai ni aphama. Vava akokenliiye wirimu, hakilathihiwe mwawakuva okhala ntoko Mwene mu Omwene wa Muluku. (Ahebri 10:12, 13) M’1914, Yehova ahinvaha Yesu olamulelo yowo alakanniyeno. Ovinyeryanto vava, Yesu onnalamulela wirimu ntoko Mwene othanliwa ni Yehova.—Danieli 7:13, 14.
3. Yehova ohathanlatho alopwana akina ni athiyana ororomeleya a elapo ya vathi wii eye wirimu. Vamoha ni Yesu, awo anahala walamulela atchu ntoko manwene, ni othoriha ni alipa-ephepa. (Luka 22:28-30; Yawupulula 5:9, 10) Yesu ahiwitchana olamulelaweno vamoha yala mu Omwenawe okhala “mwamuloko mukhani”. Ari 144.000 wachawaya.—Luka 12:32, NM; Yawupulula 14:1-3.
4. Yesu akhalakaru Mwene, owo ahimwikara Satana ni ankeloawe wirimu, omurihela velaponi yavathi. Tinthowa naya itchu velaponi ela yavathi ikhanlaya sonanara ovinyerya 1914. (Yawupulula 12:9, 12) Ikhocho, etala, irecha sohipenuweya, wacheryeryeya wa ohiwelela nlamulo—sothene iiha simpaka makupa a “eneneryo” yeyo enanoniha wii Yesu onnalamulela ni wii makhalelo a itchu ari m’mahikuaya okutchula.—Mateyu 24:3, 7, 8, 12; Luka 21:10, 11; 2 Timoteo 3:1-5.
5. Mohilekela, Yesu onahala wathoriha atchu, amwalanyaka ntoko mukukhula anamwalanyawe ipuchepuche ni ipuri. “Ipuchepuche” ari atchu yale anoniherya okhala anethiawe ororomeleya. Anahala wakhela okumi velaponi yavathi. “Ipuri” ari yale akhonche Omwene wa Muluku. (Mateyu 25:31-34, 46) Muholo mwawachamela, Yesu onahala wapahula othene yawo ari ntoko ipuri. (2 Atesalonika 1:6-9, NM) Warimwi nyuwano mutchunaka okhala mmoha a “ipuchepuche” sa Yesu onatchuneya othokoryorya mitchaka ya Omwene ni werano movarihana ni yeyo munahuseryanyu.—Mateyu 24:14.
6. Elapo yavathi hihanovava eri yokawanyeya mu ilapo sinchipale. Mu elapo eri yothene eri ni makhalelo aya a olamulela. Malokoene yala annawana wiliwili yaworu. Nyenya Omwene wa Muluku onahala wavolowa m’mapuroni mamwene othene yala omutchu. Onahala olamulela elapo yothene ntoko epoma emoha. (Danieli 2:44) Vanonto hevarwa vakhala ikhocho, werelana yonanara ni ohoshana. Atchu othene anahala okhala vamoha m’murecheleni ni awiwanana.—Mikeya 4:3, 4.
7. Mpuwa mwa miyakha Masanaru Khumi sa Olamulelo wa Yesu, atchu ororomeleya anahala okhala aphama nave elapo yothene enahala okhala paradaiso. Womalihani wa miyakha masanaru khumi, Yesu onahala opaka yeyo Muluku amurummeiye wera. Vanonto owo onahala watchikiherya Omwene Atithinya. (1 Akorinto 15:24) Nthowa heni ohalela asinthamwenanyu ni osiveliwanyu yeyo Omwene wa Muluku onahalaya opaka?
[Eruku va epaaxina 13]
Mu olamulelo wa Yesu, hevarwatho vakhala wichana nari nthalu