Yohuserya 1

Muluku Onnoowopani Wii Mukhale Nthamwene Awe

Muluku onnatchuna wii nyuwo mukhale nthamwene awe. Mano mohuupuwela elukuluku ekina wii mwaanaphwanela okhala nthamwene a Mutchu mutokwene mmaphachuwelo? Abrahamu yowo aakhanlewo khalai, aaheriwa nthamwene a Muluku. (Yakobo 2:23) Akina oromoliwa m’Bibliani yahaatanatho ni Muluku nave yahirelihiwa vanchipale. Olelo vano, makupa othene a elapo yavathi atchu aakhala asiinthamwene a Muluku. Nyuwo munanweryatho okhala nthamwene a Muluku.

Okhala nthamwene a Muluku ti waphama ohiya ni okhala nthamwene a mutchu. Muluku hanawuuliha muru asiinthamwene awe ororomeleya. (Salmo 18:25) Okhala nthamwene a Muluku ti waphama ohiya ni okhala ni muhakhu. Vavaa mulipa amuhakhu onakhwiiye, ikhorowa sawe inahala ni atchu akina. Nyenya yawo arino onthamwene ni Muluku annakhapelela muhakhu yowo mutchu mukina ohinaweryiiye owaakha.—Mateyu 6:19.

Vakina vaya atchu akina annatchuna woohihani nyuwo ohuserya volocha sa Muluku. Nari akina a asiinthamwene anyu naritho a etchoko anyu annerano yeyo. (Mateyu 10:36, 37) Vavaa akina anoonyemulaayani nari owopopihani, mwiikoheke, ‘Mano taani kinatchunaaka omuhakalaliha, atchu, akhweya Muluku?’ Muupuwele ela: Wakhala wii mutchu mukina ohoohihani olya, mano mwahaala omwiiwelela owo? Tiweparipari wii hoye! Enatchuneya yolya wii mukhale ni okumi. Nyenya Muluku onnawerya wokhalihani ni okumi wawiikhalelaru! Mwawihihaa, muhemereryeru wii mutchu mukina ohiiheni ohuserya mwa mummo munahaalanyu okhala nthamwene a Muluku.—Yohane 17:3.