MASU AWAACEERERYA

“Babilònia Mutokotoko” Tiheeni?

LIIVURU a Wupulula ookhalano masu ahinaphwanela wiiwexexiwa ntoko akhalenlaaya. (Wupulula 1:1) Ntoko yawooniherya, liivuru ola onnamuloca muthiyana orino nsina nawi “Babilònia Mutokotoko” nrempwe vayuuci vawe. Onalociwa wi muthiyana ola okilanthe variyari va “ilapo ni ilotxelo.” (Wupulula 17:1, 5, 15) Vawoona wi haavovo muthiyana chiryene aahaala owerya weera ela, Paapulu Mutokotoko ti echu yoosiphela. Vanonto, muthiyana ola a mararuwo oosiphela onataphulela eheeni?

Mu Wupulula 17:18, muthiyana mmohamoha ola oosiphela onalociwa ntoko “mutxetxhe mutokotoko onàlamula mamwene a elapo ya vathi.” Nsu nawi “mutxetxhe” nnathoonyerya marehereryo aachu. Vawoona wi “mutxetxhe mutokotoko” onnalamulela “mamwene a elapo ya vathi,” muthiyana owo oniichaniwa Paapulu Mutokotoko ti marehereryo a veelaponi yoothene yaawo anaavolowela achu ancipale. Vanonto, moophwanelela onanwerya wiichaniwa wi ti olamulelo wa elapo yoothene. Olamulelo wa mukhalelo taani? Ti olamulelo wa malapelo. Nkoonani mukhalelo iciciri ikina sa liivuru a Wupulula inaneerihaaya oloca hiiha.

Olamulelo onankhala wa elapo, wa maroca, naari wa malapelo. Muthiyana owo oniichaniwa Paapulu Mutokotoko, tahi olamulelo wa elapo, nthowa nawi Masu a Muluku annaloca wi “mamwene a elapo ya vathi,” naari achu a elapo ela, “yàraruwa” ni yoowo. Owo onnapharihela mararuwo wi aataane ni mamwene a elapo ela yavathi nave onneera soothene onaweryeiye wi akhaleno ikuru wi aavoliiherye awo. Ti nthowa nene oniichaniweiye “muthiyana òtxapaheya otokotoko.”—Wupulula 17:1, 2; Tiyako 4:4.

Paapulu Mutokotoko tahi olamulelo wa maroca, nthowa nawi “alipa a marotxa,” ti wi, achu a maroca, anahaala wunla va elukuluku ya otoloxiwa wawe. Mwevelevelo, mamwene ni alipa a maroca analociwa wi ananweha Paapulu Mutokotoko yeemenle “otxiwene.” (Wupulula 18:3, 9, 10, 15-17) Mwawiihiiha, ti woophwanelela oloca wi Paapulu Mutokotoko, tahi olamulelo wa elapo naari wa maroca, nyenya ti olamulelo wa malapelo.

Echu ekina enasuwanyeiha wi Paapulu Mutokotoko ti olamulelo wa malapelo, moorweela wa olociwa wi muthiyana owo onnahuweliha maloko oothene ni “otxapara” wawe. (Wupulula 18:23) Vawoona wi makhalelo oothene a olosiwa anarweela wa ikerexa ni wa masololo, tahi yootikiniha vaavaa Piipiliya onaloceiye wi Paapulu Mutokotoko ti empa ya “minepa sothesene sonanara.” (Wupulula 18:2; Malamulo 18:10-12) Olamulelo ola onalociwa tho wi onnavaanya vancipale malapelo eeparipari nave onnaahooxa “alipa a miririmo” ni achu “awela.” (Wupulula 18:24) Mweeparipari, Paapulu Mutokotoko onniica vancipale malapelo eeparipari, onnaahooxa moowali ophiyerya owiipha “anamona a Yesu.” (Wupulula 17:6) Mwawiihiiha, muthiyana ola orino nsina na Paapulu Mutokotoko ti olamulelo wa elapo yoothene wa malapelo atheru, yoowo onaphitaanyerya ikerexa soothene soowoka sinavanyihana ni Yehova Muluku.