Yesu Onnaathanla Arummwa Khumi Napiili

Vaavaa aamalinheiye eyaakha emoha ni emeya alaleeryaka, owo aapaka yoolakelela wi aathanle achu wi alaleeryekeno vamoha. Taani aahaaleiye waathanla ni waavyakiha wi ehooleleke muloko? Wi apake yoolakelela yeela, Yesu aanachuna nikhaviheryo na Yehova. Mwa yeeyo, owo aaya o mwaako mukhateiye nave aavekela ohiyu woothene. Mmeeloni mwaya, wooxixelo, Yesu aahaathukumanya oomuchara awe nave aahaathanla arummwa 12. Woosuwela masina aaya? Masina aya taala: Petro, Antreya, Yakopo, Yohani, Filipi, Partolomeyo, Tomasi, Mateu, Yakopo mwaana a Alfewu, Tateyo, Simoni ni Yutasi Iskariyoti.

Arummwa ala, yaanapaka mukwaha vamoha ni Yesu. Aamanleiye waavyakiha, owo aahaarumiha wi elaleeryeke mukhataaya. Yehova aahaavaha ikuru sa wiikara masololo ni waapenuxa areca.

Arummwa khumi napiili yaari asinthamwene a Yesu nave owo aanaaroromela. Afarisi yoona wi arummwa awo hiyaasuwenle echu. Nyenya Yesu aahaavyakiha wi elaleerye. Yaanakhala ni Yesu mu ilukuluku soochuneyaxa ntoko ahaakumve okhwa ni amanle ovinya mookhwani. Moolikana ni Yesu, arummwa ancipale yaayariwe o Kalileya nave akina a yaawo yaakhalano ichoko saya.

Arummwa ala yaari oohiphaameya nave yaanahesa. Ikwaha ikina yaanaloca ehipacenrye wuupuwela nave yaanapaka soolakelela soonanara. Vakina vaya yaanavaanyihana vooloca sa taani aari mutokweene. Naamwi hiiha awo yaari achu aphaama yaarino osivela wa Yehova. Vaavaa Yesu aakookenleiye wirimu, awo yaakhala achu oopacerya a muloko Weekristu.