ALIPA A WAALAKHANYA ANNAKOHA . . .

Tiheeni eri yoonanara mu nataale?

Ovinyerya khalai, nataale onooniwa ntoko ochapela oyariwa wa Yesu. Sookhovelela sincipale ineeriwa mu ochapela yoowo sinnaneeriha ochuna osuwela wiiwanana taani orivovo ni oyariwa wa Yesu.

Wookhalavo muhapo wa Papai Noel. Mu 1931 empresa emoha ya soowurya yaapaka eruku erino ipweto saweela, marama matokweene ni soowara soophilivila yeeyo enaphariheliwa ntoko eneneeryo ya Nataale. Variyari va eyaakha 1950, achu a Prasili yaamuraceeliha Papai Noel ni eruku eniichaniwa vovô indiano. Teevi yaari yookhumelela? Muhusiha Carlos E. Fantinati ooloca: “Papai Noel aaraceeliwa ti vovô indiano, nyenya tho yaakhala eneneeryo ya ochapela oyariwa wa Yesu mu 25 a Tesempuru.” Apwanne echu yoonanara ya Nataale ori pahiru muhapo wa Papai Noel? Wi niphwanye naakhulo, hankooni nthokororye opacerya wa Okiristu.

Encyclopedia Britannica ooloca: “Mu iyaakha masana meeli omapacereryo wa Okiristu, achu hiyaavyaavya osuwela nihiku na oyariwa na muchu iiphiwe, hiiha ntoko Yesu.” Ntakhara heeni? Oohuserya a Yesu yoona ochapela nihiku na oyariwa ntoko yookhovelela ya akhamuluku nave yaanasepa moomalela. Mweeparipari, Mpiipiliyani hinnaphwanyeya nihiku na oyariwa wa Yesu.

Naamwi oohuserya a Yesu oopacerya hiyuupuwelela nihiku na oyariwa, mu nsana naneexexe Ekerexa ya Katolika yampaceryiha Nataale. Ekerexa yaachuna wi yataane ni akhamuluku a Roma moorweela wa oviihavo echu yeeyo yaahiyaniha. Liivuru Christmas in America yoowo orempwe ti Penne L. Restad onnaloca wi iyaakha soothene, opacerya 17 a Tesempuru “Aroma ancipale yaanachapela, epakaka mapokha, okhuwela, weeca ni othukumana vamoha ecicimihaka miluku saya. Nave mu 25 a Tesempuru, Aroma yaanachapela okhuma wa nsuwa. Moorweela wa omutikitherya Nataale mu nihiku nenla, Ekerexa yaaweeriha Aroma ancipale ochapela oyariwa wa Yesu ohiya oyariwa wa nsuwa. Liivuru Santa Claus, a Biography orempwe ti Gerry Bowler onnaloca: “Aroma nlelo yaanawerya ochapela ifesta saya.” Awo “yaatitelela weerano sookhovelela saya sa khalai.”

Chiryene, echu yoonanara ori maphacuwelo a Nataale. Mu liivuru awe The Battle for Christmas, Stephen Nissenbaum onnamuloca Nataale ntoko “efesta ya akhamuluku yeeyo enakhala ntoko ti Yeekiristu.” Mwawiihiiha, Nataale hanamucicimiha Muluku ni Mwanawe, Yesu Kiristu. Apwanne ola mwaha mukhaani? Piipiliya onnakoha: ‘Okumanela tani onawerya okhalavo mwa wokolola ni ohokolola? Okumanela tani onawerya okhalavo mwa ekamama ni epiphi?’ (2 Korinto 6:14) Moolikana ni mwiri onannuwa wookhoromana ene, Nataale tookhoromana nave ‘havo onawerya omokola.’​—Eklesiyaste 1:15.