MWAHA WA EKAAPA

Vaavaa Oosiveliwa Ahu Onakhweiye

“Muluku oosuwela phaama, Pepe. . . . Weyaano . . . ohinle.”

Masu ala aaloceliwe muthiyana awiichaniwa Pepe. Owo aari omakhwelo wa atiithi awe, yaawo yaakhwile nthowa na othoowa ni ekaaro.

Pepe aakhalano onthamwene ni atiithi awe. Masu ala yaalociwe ni nthamwene a veemusini ni yoolakelela yaphaama, nyenya Pepe oonne ntoko toohihakararya. Okhwa waya waari woothananiha. Moovira wa iyaakha, vaavaa Pepe aarempeiye yaweereya ela mu liivuru, yaari yawooneya wi nlelo aanasooseya mmurima.

Hiiha ntoko Pepe oonneiye, ennaviravo elukuluku yincipale wi muchu avilele ni osooseya, xaxaxa wakhala wi muchu owo okhwile aari nthamwene. Mpiipiliyani, okhwa onalociwa ntoko “mwitxana òmaliherya.” (1 Korinto 15:26) Okhwa onnanivolowela vancipale, wiiliwiili mu ilukuluku soohiwehereryeya nave onnanaakha yaale nnaasivelaahu. Haavo muchu onawerya osepa. Mwawiihiiha tahi yootikhiniha wakhala wi ninnathanana vaavaa nnamuyeleelaahu oosiveliwa ahu.

Akhweya munniikoha: Enaviravo elukuluku hai wi muchu amalihe osooseya? Muchu onii avilele hai ni osooseya? Kinii kaahakararye hai ale akhweliwe? Apwanne yookhalavo ewehereryo wa oosiveliwa ahu akhwile?