MWAHA WA EKAAPA | VAAVAA OOSIVELIWA AHU ONAKHWEIYE

Achu Ookhwa Anamukhala Wanaawiili!

Akhweya munnamuupuwela Kail, olociwe woopaceryani wa miyaha seiya, owo aanakhwa minikwa waakhanle wi onahaala omaliha osooseya wawe mmurima nthowa na iyawe okhwile. Nyenya owo onnaweherya omoona Roperto wanawiili mu elapo evyaani elaiheryiwe ni Muluku. Owo onnaloca: “Yoorepaka enakisivela Wupulula 21:3, 4.” Eyo enaloca wi: “Owo oni akhale Muluku ni yawo. Muluku onanvuta mithori aya, nave horwa okhalavotho okhwa nari winla, nari ikutxho, nari witxela, wona wi sakhalai sòvira.”

Kail ooloca: “yoolaiherya ela ennaloca soothene.” Moonelo aka onalikana ni wa achu yaawo yaayeleenle achu yaasivelaaya nyenya ahirino ewehereryo ya okhalano wanawiili oosiveliwa aya. Kail onneera ichu mwawiiwanana ni soororomela sawe moorweela wa wiivaha olapa mmuteko ntoko mulaleeryi a elukuluku yoothene, aaleelaka amwaacamani awe yoolaiherya ya omwaahiyu vaavaa “okhwa” oneeraaya ohikhalevo tho.

Akhweya munahaala oloca, nkineemererya! Nyenya muthokororye yootakiherya ya mulopwana iichaniwa Yuupu. Yaamukhumelela ereca mootutuxa. (Yobi 2:7) Naamwi aachuna okhwa, owo aakhalano nroromelo mu ikuru sa Muluku sa omukoookiherya wanawiili okumi veelaponi yavathi. Moororomela owo aaloca: “Pwiya, kinatxhuna wi mukivithi mmahiyeni . . . vanonto nyuwano munamukitxhana nave miyano kinamwakhula, nyuwano munamweliwa murima ni miyano, ntakhara mukipatunse.” (Yobi 14:13, 15) Yuupu aakhalano nroromelo wi Muluku awe haahaala omucuwala nave aahaala omukookiherya okumi.

Moohilekela, Muluku onahaala weerano yeeyo—ntakhara Yuupu ni akina oohaalakhanyeya—vaavaa elapo ela enahaalaaya otatuxiwa okhala parataiso. (Luka 23:42, 43) Saweriwa T’arummwa onnooniherya wi “ananvinya mokhwani.” Yesu tho onroromeliha ariki: “Muhitikhine ni yela: enamurwa elukuluku atxhu othene ari mmahiyeni aneraya yiwe nsu nawe nave anamukhumamo.” (Yohani 5:28, 29) Yuupu onahaala woona okhwaanela wa yoolaiherya yeela. Yuupu onnawehererya okhalano mwiili woolipa “ntoko ole wa mmiravo.” (Yobi 33:24, 25) Emohamoha enahaala weereya ni oothene yaale anathamalela ikharari sa Muluku sa ovinya mookhwani ntakhara okumi veelaponi yavathi.

Waakhanle wi moomuyeleela oosiveliwa mookhwani, iparipari seiya nimanlaahu othokororya hinnahaala omaliha moomalela osooseya wanyu murima. Nyenya moorweela wa wuupuwelela soolaiherya sa Muluku inaphwanyeya Mpiipiliyani, munahaala ophwanya ewehereryo yeeparipari ni ikuru wi mvilele.—1 Tesalónika 4:13.

Munnachuna ohuserya sincipale vooloca sa mukhalelo wa ovilela ni osooseya wanyu murima? Naari mookhalano makoho ntoko “Ntakhara heeni Muluku onneemererya onanara ni makacamiho?” Khwoo mmoone site ahu, jw.org/ngl, wi moone maakhulo oohakararya ni oophara muteko a Piipiliya.