‘Mweerele Onamoona’
1. Yootakiherya taani yaphaama murummwa Paulo ovanheiye mu orummwa?
1 “Phara muteko wa mulipa-olaleyerya.” (2 Tim. 4:5) Murummwa Paulo aari ootaphuwa mu omuleela Timoteo nlamulo nla. Chiryene, variyari va iyaakha 47 ni 56 E.K., Paulo aahimaliha mikwaha miraru sa omisiyonaario. Liivuru a Saweriwa Tarummwa onnaloca mootitelela sa Paulo “werela namona.” (Saw. 23:11; 28:23) Nnii niwerye hai weerano hiihaa olelo?
2. Nnii niwerye hai weerela onamoona naalaleeryaka empa ni empa?
2 Empa ni Empa: Mu wiilipiherya wi naaphwanye anamakhala yaawo ahintonko wiiwa michaka yaphaama, akhweya onachuneya owaavya mu elukuluku yoohiyana ya nihiku. Mulopwana a veechokoni poti okhala vaate iwora sa ohiyu nari omala wa esumana. Nnaphwanela wiilipixerya oloca ni muchu empa eri yoothene, ntitelelaka owaavya yaala ahinaphwanyeya vaate. Hanka wakhala wi wiilipixerya wanyu omwaavya muchu hiwaanono mphurelo? Akhweya omurepela ekaarata nari omwiichana ni telefone enahaala okhalano mphurelo waphaama.
3. Ekari taani muryaanyuno ya weerela onamoona wa vanlakani?
3 Vanlakani: Akapuro a Yehova olelo annasuweliha “miruku” seeparipari wa oothene yaawo enii ewiriyane. Ikwaha ikina ela eneereya “mphironi” nari “mmapuwani.” (Masiposipo 1:20, 21, Bibiliya Nsu na Muluku, BNM) Vaavaa nnayaahu miteko ahu sa nihiku nnihiku, ninnaweiwa ni weerela onamoona? Poti olociwa wi nri ‘oophitiwa ni masu’? (Saw. 18:5) Wakhala wi ti hiihaa, ninnakhwaaniherya murici ahu wa ʹ“werela namona.”—Saw. 10:42; 17:17; 20:20, 21, 24.
4. Ovekela ni wuupuwelela onakhaviherya hai weerela wahu onamoona?
4 Ikwaha ikina, nthowa na oceecheya wa muchu nari woovelela, hiyaano poti ohiya weerela onamoona. Chiryene, Yehova onniiwexexa sooceecheya sahu. (Sal. 103:14) Vaavaa inakhumelelaaya, hiyaano nnaphwanela omveka owo wi anivahe olipa murima wi niwerye oloca. (Saw. 4:29, 31) Navetho, vaavaa nnapakaahu yoohuserya ya muchu mukhateiye ni wuupuwelela Masu a Muluku, hiyaano nnanwerya wunnuwiha othamalela wahu esisapo yoowalamela ya michaka yaphaama. (Afil. 3:8) Eyo enahaala onipurula wi nlaleerye ni mvai!
5. Nnii niwerye hai okhaviherya okhwaaniheryeya wa yooloherya ya Yowele?
5 Yooloherya ya Yowele yaahiloca wi nihaakumve ophiya nihiku ntokotoko nawoopiha na Yehova, achu a Muluku yaahaala “otxànana epheremanne” nave hiyaavo echu yaahaala waahiiha awo olaleerya. (Yow. 2:2, 7-9, BNM) Hankooni nikhaviherye phaama muteko wa olaleerya ohini wuuluuliwe!