Kuxani Yootakiherya ya Alipa Miririmo—Yoweli
1. Nnii ntakiherye hai wiiyeviha wa Yoweli vaavaa nnalaleeryaahu?
1 Mulipa miririmo Yoweli aari aani? Owo onaloca pahiru wi aari “mwana a Petuweli.” (Yow. 1:1) Mulipa miririmo ola awiiyeviha aavuwiha muchaka wa Yehova, ohiya muteko awe ntoko namuchaka. Moolikana, mu orummwa wahu, ohiya waavya ncicimiho nahu nari osuweliwa, hiyaano nnamvuwiha Yehova ni Piipiliya. (1 Akor. 9:16; 2 Akor. 3:5) Mwawaacererya, ninnaphwanya ikuru mu muchaka nnalaleeryaahu. Makhalelo taani a yooloherya ya Yoweli enahaala oneeriha okhalano mvai ni ewehereryo olelo?
2. Waacamela wa nihiku na Yehova waahaala oneeriha weera eheeni?
2 “Nihiku na [Yehova] nihatxamela!” (Yow. 1:15, BNM): Naamwi masu ala yaarempwe macikhweene muculi, hiyaano nnakhala omakuchuwelo wa okhwaanela waya. Onanara wa makhalelo a elapo ni ohichuna ni waakaaha nnakumanaahuno mu ekulucu ti sawooniherya soolipa wi mahiku ookuchula a mukhalelo yoola wa ichu soonanara aaphiya. (2 Tim. 3:1-5) Vaavaa nnoonaahu waacamela wa makuchuwelo, nookhalano mathowa aphaama a ohela orummwa wahu va nipuro noopacerya mu okumi ahu.—2 Pet. 3:11, 12.
3. Ntakhara heeni orummwa ti wookhweleya xaxaxa vaavaa nnaacamelaahu yoohooxa etokotoko?
3 “Yehova Onahaala Okhala Voochawelavo wa Achu Awe.” (Yow. 3:16, TNM): Ocikinyeya onalociwa va eversikulu yeela ti othoriha wa Yehova variyari va yoohooxa etokotoko. Hiyaano ninnahakararyeya va osuwela wi Yehova onahaala owoopola akapuro awe oororomeleya elukuluku yeeyo. (Yaw. 7:9, 14) Vaavaa nnapharaahu muteko wa olaleerya nave nnoona moota Yehova onanikhaviheryeiye ni onilipiha, ninnateka nroromelo ni ovilela inahaala onikhaviherya variyari va yoohooxa etokotoko.
4. Ntakhara heeni ninnawerya ohakalala ni oweherya omwaahiyu ni nroromelo?
4 Naamwi akina elocaka wi muchaka wa Yoweli ti woothananiha, owo onnaavaha achu a Muluku yooweherya yoohakalaliha ya woopoliwa. (Yow. 2:32) Vano, hankooni niwehererye omwaahiyu ni nroromelo nave nlaleerye mwa mvai michaka yaphaama ya Omwene vaavaa nniiwelelaahu masu a Yoweli 2:23, BNM: “Muhakalale ni mweliwe murima [ni Yehova] Muluku anyu.”