Kuxani Yootakiherya ya Alipa Miririmo—Amosi
1. Ntakhara heeni yootakiherya ya Amosi poti onilipiha?
1 Nyuwano montoko wiisoona okhala oohiphwanelela olaleerya nthowa na mukhalelo anyu wawiiyeviha? Wakhala wi ti hiihaa nyuwano poti olipihiwa ni yootakiherya ya Amosi. Owo aari namalima nave aanaphuwa ipucepuche, nyenya Yehova aamvaha ikuru wi alaleerye muchaka woolimela. (Amosi 1:1; 7:14, 15) Moolikana, olelo Yehova onnaapharihela yaale ari awiiyeviha. (1 Akor. 1:27-29) Ichu taani ikina nnaweryaahu ohuserya moorweela wa mulipa miririmo Amosi?
2. Nnii niwerye hai ovilela nakumana ni ovaanyiwa?
2 Mukhale Oolipa Mwakumana ni Ovaanyiwa: Vaavaa Amasiya, namukucho a malapelo a mwaasana amope a omwene wa mahimo khumi a Isarayeli, iiwaleiye oloherya wa Amosi, owo aavaanya, ntoko ariki: ‘Onarowa! Onihiye! Hiyaano nookhalano malapelo ahu!’ (Amosi 7:12, 13) Mu oveka wawe wi Mwene Yerobowamu awateelihe muteko wa Amosi, Amasiya aavaanya masu a mulipa miririmo owo. (Amosi 7:7-11) Nyenya Amosi haari awoova. Olelo, ahooleli akina a malapelo annaavya nikhaviheryo mu wiilipixerya waya owiikara achu a Yehova. Nyenya, Yehova onnanroromeliha wi haavovo kapwichi onapakiwa ntakhara hiyo onahaala okhalano mphurelo woolekela.—Yes. 54:17.
3. Muchaka taani wa mikhalelo miili hiyaano nnalaleeryaahu olelo?
3 Mulaleye Othoriha wa Muluku ni Mareeliho a Muhoolo: Naamwi Amosi aaloherya othorihiwa wa omwene wa mahimo khumi a Isarayeli, omakuchuwelo wa liivuru onakuxa nsina nawe aaloca sa yoolaiherya ya Yehova ya orehereryiwa ni mareeliho mancipale. (Amosi 9:13-15) Hiyaano tho ninnaloca sa “nihiku nothoriha” nnoorwa, nyenya nla ti nikupa pahiru na ‘mitchaka yaphaama ya Omwene’ yeeyo nnaphwanelaahu olaleya. (2 Pet. 3:7; Mat. 24:14) Yehova waatoloxa wawe oonanara va Armagedo enahaala ohuula ephiro ya paradaiso veelaponi yavathi.—Sal. 37:34.
4. Yoororomeliha taani nryaahuno wi nnanwerya weera yookhwela ya Yehova?
4 Olaleerya muchaka wa Omwene mu elapo yoosareya amwiicani chiryene enneeha olakelela wahu okhala mwawiiwanana ni wiiveleela wahu wa Yehova ni weera yookhwela awe. (Yoh. 15:19) Nyenya, hiyaano ninnaroromela wi Yehova onahaala otitelela onilipiha wi neereno yookhwela awe, hiihaa ntoko eereiye ni Amosi.—2 Akor. 3:5.