Kuxani Yootakiherya ya Alipa Miririmo—Oseiya
1. Nikoho taani munaphwanelaanyu wiikoha mukhatinyu?
1 ‘Ephepa taani kinachunaaka omvaha Yehova?’ Akhweya nyuwo munniikoha nikoho nenla vaavaa munuupuwelelaanyu waaca wa epewe ni ikharari sawe. (Sal. 103:2-4; 116:12) Oseiya aahiilipixerya weerano yeeyo Yehova aamurummeiye wi eereno, naamwi yaari yoochuneya wiivaha ntoko ephepa. Nnii nimutakiherye hai Oseiya?
2. Nahaala ochariha hai yootakiherya yaphaama ya Oseiya ya ovilela mu muteko wa olaleerya?
2 Mulaleerye mu Elukuluku Yookacamiha: Muchaka wa Oseiya waaperekhiwe xaxaxa wa omwene wa mahimo-khumi a Isarayeli, weiwo malapelo eeparipari yaahaalaaya omalihiwa. Mwene Yerobowamu II aapaka yeeyo yaari yoonanara vamiithoni va Yehova nave aayano vahoolo malapelo a mwaasana amope yaawo yaapaceryihiwe ti Yerobowamu I. (2 Mam. 14:23, 24) Mamwene oocharela yaatitelela onanariha malapelo eeparipari a omwene wa mahimo-khumi ophiyerya otoloxiwa waya mu 740 E. E. K. Naamwi malapelo atheru yinlanne, Oseiya ni nroromelo aarumeela ntoko mulipa miririmo variyari va iyaakha 59. Moophwanaphwana, hiyaano nri oolakelela olaleerya eyaakha ni eyaakha naamwi nikumanaka ni oruwaniwa nari wiikariwa?—2 Tim. 4:2.
3. Okumi wa Oseiya onooniherya hai ikharari sa Yehova?
3 Muupuwelele Ikharari sa Yehova: Yehova aamuleela Oseiya wi amuthele “muthiyana a wetxa pure.” (Ose. 1:2, Bibiliya Nsu Na Muluku) Naamwi mwaariye, Gomeri, aamuyanre mwaana mmoha ni Oseiya, ohoolo waya owo mwawooneya aahaayara anamwane eeli ni alopwana akina. Oseiya wiilipixerya wawe waalevelela amwaariye waahooniherya winnuwa wa okhurumuwela wa Yehova ni Isarayeli oomwaryeya vaavaa awo yaacharunwaaya. (Ose. 3:1; Arom. 9:22-26) Ninniilipixerya ohela okhwipi yoochuna ya hiyo mukhatihu wi nsuwelihe okhurumuwela wa Yehova wa achu a mukhalelo woothene?—1 Akor. 9:19-23.
4. Iphepa taani ikina nnaphwanelaahu ompakela Yehova?
4 Akapuro akina a Yehova aahiya muteko aya waavaha ikhorowa sincipale wi emalihe elukuluku yincipale mu orummwa. Akina annatitelela okhala aciye nari ohikhalano anamwane wi etitele weerano soochuna sa omwene. Vaavaa nnuupuwelelaahu okumi wa Oseiya, hiyaano poti wuupuwela, ‘Miyaano nkiwerya weera yeeyo Oseiya enreiye.’ Nyenyanto, vaavaa nnunnuwaahu ni othamalela ikharari soohiphwanela sa Yehova ni ororomela ikuru sa munepa awe waweela, hiyo nnahaala ophariheliwa ti yoowo mmakhalelo nihintonkaahu waanyiherya, hiiha ntoko Oseiya.—Mat. 19:26; Afil. 2:13.