Miyanmar

Epaaxina 136-137

Epewe Yoomaliha Okhoma Waka

ZAW BAWM

OYARIWA 1954

OPATISO 1998

MUKWASU WA OKUMI AWE Namatumiha a mirece ni mwicani a eparipari yoowo aatannyen’ye murima ni epewe Yeekiristu.

VAAVAA Lu Mai, mwaaraka, aapacenreiye omuhuserya Piipiliya ni Anamoona a Yehova miyaano kaaniica vancipale. Kaariha soolaleeryiwa sawe sa Piipiliya nave kaawiikara Anamoona a Yehova vaate vaka.

Ohoolo waya, kaapacerya otumiha mirece yeeyo yaakeerinhe owaleliwa mu kariposo. Kimalinhe ohiyu omoha kiwaleliwe, Lu Mai aakirumihela Piipiliya ni ekaarata ya nlipiho yoosareya ni soorempwa sa Piipiliya. Kahaakhela tho ikaarata ikina soorweela wa yoowo. Ohoolo waya kaaphiyerya woona wi waakhanle wi kaachariha ekano ya Piipiliya, hanki kiwaleliwe.

Kiri mukariposo, kahaakhela oxekurya kaahiwehereryaaka. Alopwana apiili, Anamoona a Yehova, yaakileela wi mwaaraka taavenke awo wi ekixekurye ni ekilipihe. Yaawo yaaheeca mukwaha wa mahiku meeli wi ekixekurye. Kaatepa otannyeya murima ni oxekurya waya. Haavo mmoha a asuweli aka aaruule wi akixekurye​—pahiru alopwana yaawo kaawiikanraaka yaaheerano yeeyo.

Ohoolo waya, kaahikerihiwa o nipuro na ekumi nthowa na korowesa mutokweene nave nkaawerya olivela. Mu elukuluku yeeyo, kahaakhela oxekurya kahiwehereryaaka​—namoona yoowo aarumihiwe ni mwaaraka. Munna owo aamoriwa ikharari, nave aakilivela. Kaahuuliheya muru nthowa na oweerela waka yoonanara Anamoona a Yehova nave kaaroromeliha wi kaahaala okhala mmoha a yaawo. Iyaakha thanu ohoolo, vaavaa kaakhummaaka mu kariposo kaahaakhwaniherya yoororomeliha aka.

[Yawooniherya va epaaxina 4]

Olelo kinniikhalelaru moororomeleya mu “yoororomeliha” aka moorweela wa omurumeela Yehova ophiyerya kinawerelaakavo