Wunnuwiha Mavyakelo ahu mu Orummwa—Owaakhula Achu Anakwacelela Masu
Ntakhara Heeni ti Yoochuneya: Nkaanyiheryani wi moosuwela wi epahu enahaala weereya moohilekela. Achu anahaala okhwa wakhala wi hachanwe wi evuluwe. Nyuwaano munnaya wa mwaacamani wi mwamulopole, nyenya owo haneemererya, alocaka wi ooweiwa. Mweeparipari, nyuwaano himwaahaala ohiya mwawaakuveya wiilipixerya wanyu wa omukhaviherya! Ancipale mu ekulucu ahu haneemererya, hanasuwela esisapo ya ovuluxa michaka sahu iryaayawo. Mu elukuluku ya oxekurya wahu akhweya nnaaphwanya eri awuukhuwa. (Mat. 24:37-39) Akhweya awo aahooxeya ni ichu sawootha. (Mat. 11:18, 19) Awo poti wuupuwela wi hanri oohiyana ni ikerexa seiyo sinimiha sawiima satheru. (2 Pet. 2:1, 2) Wakhala wi namakhala woopaceryani hanachuna, hinnaphwanela waakuvela omuhiya.
Moota wa Weerano Yeela:
• Muhaakumve olaleerya empa ni empa, mwiivahe elukuluku wi nwuupuwelele achu ookwacelela masu yaawo munahaalaanyu waaphwanya nave muthokororye moota wa waakhula.
• Wakhala wi namakhala oovaanya, mwaphaama mweererye otitelela ovaanela. Akhweya nyuwaano munanwerya weerano yeeyo moorweela wa omweeriha oloca. Ntoko yootakiherya, wakhala wi olonce wi ookhalano ekerexa awe, nyuwaano poti omwaakhula, “kaanawehererya omphwanya muchu orino nchuno mu ichu soomunepani ntoko nyuwaano.” Osuwela makhalelo a namakhala enahaala wookhaviheryaani otitelela ovaha onamoona. Wakhala wi olonce wi ori ooweiwa, nyuwaano poti oloca: “Kinniiwexexa. Nyenya kihaakumve opwaha, kaachuna woovahaani echu.” Mukhalelo mukina ori omukoha wakhala wi namakhala olonce wi hanachuna. Nyuwaano poti oloca, “Enataphulela wi himwaano nchuno mu Piipiliya, nari mu ekerexa?”
• Mpharihele mukhalelo waphaama. Muupuwele wi Yehova hanakhinyererya achu onwiriyana. (Malam. 30:19) Khata muchu onahaala oteexa murici awe woomunepani. (Akal. 6:5) Wakhala wi namakhala ori ooweiwa, ti yaphaama opwahavo. Moorweela wa ocicimiha moonelo awe, nnanwerya ohula mulako wi mulaleeryi mukina awerye omvaha onamoona omwaahiyu.—1 Pet. 3:15.
Mweererye ela Variyari va Mweeri:
• Vaavaa munamphwanyaanyu muchu ookwacelela, mwamala omuhiya namakhala, muloce ni nthamwene anyu moota mwaahaalaanyu waakhula phaama.