Munahaala Ophwanya Ekari? Orwa o Mukonelo Ennanikhaviherya Wooniherya Othamalela
1. Ekari taani yavameekhaaya Mukonelo onahaalaaya onivaha?
1 Mukonelo wa 14 a Apirili onahaala onivaha ekari emoha ya wunnuwiha ni wooniherya othamalela wahu ikharari sa Yehova. Masu anaphwanyeya mu Luka 17:11-18 annooniherya moota Yehova ni Yesu anoonaaya othamalela. Moothananiha, pahiru mmoha a anamareca yaale khumi toonihenrye othamalela. Muhoolo, yoovaha ya woopola enahaala omaliha khuluwi makacamiho, yeerihaka wi okumi woohimala okhale weeparipari! Moohikhwa minikwa, nnahaala omuthamalela Yehova nthowa na mareeliho yaawo. Nnahaala wooniherya hai othamalela variyari va isumana inoorwa?
2. Nnahaala wunnuwiha hai othamalela woopola?
2 Wunnuwiha Othamalela: Moonelo a othamalela anarweela mmuupuweloni. Wi enikhaviherye wunnuwiha othamalela wa woopola, marehereryo a waalakhanyiwa wa Piipiliya a Mukonelo anahaala ophwanyeya mmapuro oohiyana, ntoko mu, apentise B12 a Tradução do Novo Mundo muvyaani, calentaario ni Examine as Escrituras Diariamente. Nthowa heeni ohithokororya miseelo seiya ntoko emusi? Weerano yeeyo enahaala waaceereryeya othamalela wahu woopola. Ela enahaala okumiherya mphurelo waphaama mmeecelo ahu.—2 Akor. 5:14, 15; 1 Yohane 4:11.
3. Mmakhalelo taani nnaweryaahu wooniherya othamalela?
3 Wooniherya Othamalela: Othamalela onooneya moorweela wa saweera. (Akol. 3:15) Namareca yoole oothamalela aahiilipixerya omphwanya Yesu wi amuthamalele. Moohikhwa minikwa, owo tho aahaaleela akina openuxiwa wawe moohakalala. (Luka 6:45) Othamalela wahu woopola onahaala oneeriha wuuka mwakuru mukipici wa olaleya Mukonelo? Opiyoneero wookhaviherya naari waaceererya wuuka mu orummwa mukhalelo mmoha waphaama wa wooniherya othamalela. Mu ohiyu wa Mukonelo, murima woothamalela onahaala oneeriha owaakhela phaama aleco ni wiivaha waakhula makoho aya.
4. Nnahaala weeriha hai wi Mukonelo okhale woohakalaliha?
4 Onahaala okhala Mukonelo wookuchula? (1 Akor. 11:26) Hiyaano hansuwenle. Nyenya noosuwela wi owo oneereya ekwaha emoha, nave orwa enahaala okhala ekari emoha ya wooniherya othamalela. Munahaala ophwanya ekari? Neerihe wi masu oothamalela a nlumi nahu ni wuupuwelela wa murima ahu omuhakalalihe Yehova, Namavaha a woopola.—Sal. 19:14.