Miyanmar

Ipaaxina 104-105

Yehova Aareherya Munepa Aka

WILSON THEIN

OYARIWA 1924

OPATISIWA 1955

MUKWASU WA OKUMI Mpava ola aahiilipixerya otoroka omuchu awe nave aarumeela ntoko piyoneero avameekhaaya iyaakha 54.

VAAVAA kaaryaaka mmiravo, kaahuserya owana. Ntoko yookhumelela, kaari muchu oohooxa ni oonyeenyeya. Kaaryaakano iyaakha 19, kaapaka makupa a nikhuuru na wiiya ni akapuchi. Ohoolo waya, kaawaleliwa nave kimaliha iyaakha thanu nararu, kiwaleliwe kaahuupuwelela mukhalelo aka woonanara wa okumi nave kaavekela vancipale. Vathi va murima aka, kaanachuna osuwela sincipale vooloca sa Muluku.

Kaahuleliwaaka, kaaya o Yangon, weiwo kaakelaaka o mithukumano sa Anamoona a Yehova. Ohoolo waya, kaaphwanelela opatisiwa, kinnathamalela nikhaviheryo ni epewe ya anna.

Kimanle opatisiwa, nivano kinneererya wooniherya omuchu Weekiristu. (Aef. 4:24) Kaari muchu awaakaaha ni oonanariwa ni akina. Kaanachuna okhala muchu aphaama nave waari woovila othokororya meecelo aka. Kaanoona wi nkaarino mphurelo, ikwaha ikina kaanaya oluusi wi kinle iwora sincipale.

Mu 1957, kaaheemereryiwa okhala piyoneero avameekhaaya. Orummwa waka woopacerya waari o Mandalay. Weiwo kaalapa vamoha ni misiyonaariyo Robert Richard. Robert aari ntoko tiithi aka. Owo aakihusiha woona makhalelo aphaama a akina woona ohiphaameya waka mwawiiyeviha. (Akal. 5:22, 23) Vaavaa kakhalaaka oonyeenyeya kaanamveka Yehova wi ‘areherye munepa mpuwa mwaka.’ (Sal. 51:10) Yehova aahaakhula nivekelo naka, moovira wa elukuluku omuchu aka waareheryeya.

Ohoolo waya, kaahuserya ni mulopwana awuuluvala a iyaakha 80 sa oyariwa yoowo aari Patista. Achu a ekerexa awe yaakootherya wi “kaahiiya” ipuchepuche saya. Mmoha a yaawo aakuha mwaalo owanoni waka nave akoopopiha, “omwiipha muchu ti yoocheka?” yaakirweela esara mpuwa mwaka. Mwawaakuveya kaapaka nivekelo noohiiweya wa Yehova nave kahaakhula moomaala “Waakhule meekhaa nikoho naa.” Mulopwana aapwahavo. Kaamuthamalela Yehova nthowa na okikhaviherya waakhula moomaaleleya. Namahuserya aka yoole a Piipiliya awuuluvala aapatisiwa ohoolo waya, nave aatitelela okhala oororomeleya ophiyerya okhwa wawe.

Mu iyaakha soothene, koorumeela mapuro 17 oohiyana ntoko piyoneero avameekhaaya nave kohaakhaviherya achu 64 ohuserya eparipari. Vaavaa kinuupuwelaaka epewe Yehova okeerenleiye, miitho aka annasareya miithori oothamalela. Owo oomukhaviherya mmiravo oohooxa, oonanariwa, ni oohihakalala wunnuwiha munepa muvyaani wa murecele.

[Tlhamuselo wa mifota ka phajina 4]

Kaanoona wi nkaarino mphurelo, ikwaha ikina kaanaya oluusi wi kinle iwora sincipale.

[Epaaxina Ohirivo Echu 5, 6]