Kuxani Yootakiherya ya Alipa Miririmo—Nahumi
1. Tiheeni nnahuseryaahu orweela wa liivuru a Nahumi?
1 Milepe sa Ninive akhalai ntoko Nahumi aalohenryeiye sinnooniherya wi, Yehova onninla ikuhu ni amwiicani Awe nave wi amwiicani akuru hanawerya omvootha Yoowo. (Nah. 1:2, 6) Othokororya phaama yooloherya ya Nahumi, ennanivaha soohusiha mu orummwa wahu.
2. Nnahaala weeriha hai michaka sahu okhala saphaama?
2 Ovaha Olipiha ni Ewehereryo: Voopaceryani, liivuru a Nahumi onakhala ntoko onaloca pahiru sooloherya sa othoriha wa Ninive, epooma etokotoko ya Asiiriya akhalai. (Nah. 1:1; 3:7) Nyenya, yooloherya ela yaari ntoko muchaka waphaama wa achu a Yehova. Nahumi yoowo nsina nawe, nnataphulela ‘mukhapeleli,’ aahaalipiha asinthamwene awe Ayuuta wi amwiicani aya moohilekela herwa ekhala! Nahumi ahooneiha wi Yehova “ti ntxhawelo mwa elukuluku ya sokatxamiha.” (Nah. 1:7, BNM.) Naalaleeryaka, hiyaano tho nnuuka michaka saphaama ni waalipiha akina wi echawele wa Yehova.—Nah. 1:15.
3. Nnahaala omutakiherya hai Nahumi opharihela sootakiherya naari sawooniherya?
3 Mpharihele Sootakiherya ni Sawooniherya: Yehova aamveerela Nahumi wi alikanyihe makuchuwelo a Ninive ni epooma ya Yiikuputu Tapa (No-amon), yeeyo yaakhuculiwe ni Asiiriya meekheiye. (Nah. 3:8-10) Vaavaa nnaaleelaahu achu sa makuchuwelo a mukhalelo yoola wa ichu, nnanwerya ovuwiha sooloherya sa Mpiipiliyani hiiho inooniherya wi Yehova onnakhwaniherya masu awe moomalela. Ntoko yootakiherya, vaavaa achu a Paapulu ni a Meto yaawannaaya ni epooma ya Ninive mu 632 E.E.K., epula yaamurupa ekumiheryaka osareya wa Muhice Tikre, ekumulaka makupa a ixiri soolipa. Hiiha Ninive aapahuliwa, ntoko Yehova aalocenleiye.—Nah. 1:8; 2:6.
4. Nnahaala owerya hai okhala ookwakwaleya ni awiiwexexeya mu orummwa?
4 Khalani Ookwakwaleya ni Awiiwexexeya: Mukhalelo wa orepa wa Nahumi waari wookwakwaleya ni wawiiwexexeya. Miyaha sawe saari sookhweya. (Nah. 1:14; 3:1) Moolikana, nnachuna opharihela masu yaawo ari ookhweya wiiwexexa. (1 Akor. 14:9) Mu ovaanela woopacerya, mookwakwaleya mutharihe nthowa na oxekurya wanyu. Vaavaa munamuhuseryaanyu Piipiliya ni achu, mwaakhaviherye awo waaceererya nroromelo wa Yehova ni Masu awe ni othamalela mukhalelo miyaha inaphariheleyaaya muteko wa yaawo.—Arom. 10:14.
5. Yoolipiha taani nnaphwanyaahu mu yooloherya ya Nahumi?
5 Nroromelo na Nahumi mu waakhwaniheryeya wa masu a Yehova ennavaha ekamaama liivuru a Mpiipiliyani yoowo okunxe nsina nawe. Vaavaa makuchuwelo a mukhalelo wa Satana anaacamelaaya, hiyaano ninnaphwanya olipiha mu nlakano noomuluku: “Havo onawerya warukunuwela wíli.”—Nah. 1:9.