Wunnuwiha Mavyakelo ahu mu Orummwa—Omwaakhula Namakhala Oonyeenyeya
Ntakhara Heeni ti Yoochuneya: Ancipale nnaaphwanyaahu mu orummwa achu aphaama. Naamwi hiiha, Yesu aaloherya wi achu akina yaahaala oniica. (Yohane 17:14) Mwawiihiiha, hinnatikhina wakhala wi nomphwanya namakhala oonyeenyeya. Vaavaa ela eneereyaaya, nnachuna waakhula mmukhalelo onahaala omucicimiha yoowo nnamweemelelaahu, Yehova. (Arom. 12:17-21; 1 Pet. 3:15) Neerano hiiha nnahaala okukuca mwaha. Ela tho enahaala ovaha onamoona wa namakhala ni yaale ananivarerya, yeerihaka wi awo ekhale oowiriyana mu oxekurya okina wa Anamoona a Yehova.—2 Akor. 6:3.
Mukhalelo wa Weerano Yeela:
• Mukhale oomaaleleya ni mooniherye onthamwene. Ela enahaala okhaviherya okukuca mwaha. Muhipwache waakhulela wa namakhala. (Ekle. 7:9) Owo onamunyeenyeya nthowa na makacamiho awe naari wi mphin’ye mu elukuluku yoohiphwanelela. Naamwi anyeenyen’ye ntakhara muchaka ahu, ikwaha ikina nthowa nawi owo oowokiwa.—2 Akor. 4:4.
• Mwaakhule ni masu aphaama ni eepewe. (Masi. 15:1) Apwanne nyuwaano murimmuviiha naari omuukhula? Naamwi nihiikhupanyeryaka ntakhara muteko ahu, nyuwaano mwawiiyeviha munanwerya omveka nikhurumuwelo ntakhara ophiya elukuluku yoohiphwanelela. Apwanne ori oonyeenyeya nthowa na ichu soonanara oniiweiye vooloca sa hiyaano? Wakhala wi ti hiiha, akhweya muloce: “Miyaano kinniiwexexa moonelo anyu. Nyenya, enakhala ntoko wi yeeyo mwiiwalaanyu vooloca sa hiyaano tahi eparipari. Munnakeemererya othariha?” Apwanne owo haneemererya mahusiheryo ahu, ntoko mwaha wa wiikariwa mmulokoni naari nikhami? Akhweya muloce: “Kinniiwexexa. Akina ahooniherya wuukhuwa woolikana. Munnakeemererya owoonihaani Mpiipiliyani mathipelo a mahusiheryo yaala?”
• Wakhala wi muchu owo ootepa onyeenyeya, akhweya yaahaala okhala yaphaama opwahavo muheerenrye omwaakhula. Wakhala wi owo ovenke wi Anamoona a Yehova ehimuxekurye wanaawiili, mmuleele wi yooveka awe enahaala ocicimihiwa.
Mweererye Ela Variyari va Mweeri:
• Mukhaleno nikupa na wiivyakiha variyari va malapelo a echoko.
• Mmanle omphwanya namakhala oonyeenyeya, muthokororye ni nthamwene anyu mukhalelo waphaama mwaaphwanelaanyu omwaakhula.