Munnawerya Woona Makhalelo Oohooneya a Muluku?

Mwaawehaka ethutu yooreera, erimu ya itheneeri, naari waarya wa oneela wa nsuwa muniya, apwanne hamunawerya woona ntata nakuru na Mpatuxa? Soopatuxiwa seiho nnoonaahu sinnuupulula vanlakani vene mikhalelo soohooneya sa Yehova. (Aro 1:20) Moorweela wa wiivaha elukuluku wi nuupuwelele ichu seiho nnoonaahu ni meetho ahu, nnanwerya woona ikuru sa Muluku, osivela, miruku, ekhaikhai, vamoha ni mahala awe.—Sal 104:24.

Soopatuxiwa taani sa Yehova seiho nyuwaano munoonaanyu nihiku nnihiku? Naamwi mukhalaka opooma, nyuwaano munnawerya owoona apalame vamoha ni miri. Ovareryela ichu Yehova opatunxeiye onamunikhaviherya okukuca wuukhuwa, okuha makacamiho ahu mu nipuro noophwanelela, ni waaceererya nroromelo nahu wa Yehova wi owo onamunikhapelela okhala wookhala. (Mat 6:25-32) Wakhala wi mookhalano anamwane, mwaakhaviherye othamalela mikhalelo sootikhiniha sa Yehova. Vaavaa aninnuwaaya ethamalelaka soopatuxiwa anoonaaya, anahaala omwaacamela vancipale Mpatuxa. —Sal 8:3, 4.

MOONE EXILEMA OTIKHINIHA WA SOOPATUXIWA ONNUUPULULA NCICIMIHO NA MULUKU—WAARYA NI IKOORE, NAVE MWAAKHULE MAKOHO ANACHARELA:

• Echu eniichaniwa epikimento enanikhaviherya hai woona ikoore?

• Tiheeni enatannya echu eniichaniwa iritesensiya?

• Ntakhara heeni nnoonaahu ikoore soohiyanahiyana wirimu?

• Ikoore taani sootikhiniha sa soopatuxiwa nyuwaano munoonaanyu waacamela owannyu?

• Ntakhara heeni nnaphwanelaahu wiivaha elukuluku wi noone soopatuxiwa?